Тројцата воени резервисти, битолчаните Влатко Миленковски и Благојче Силјановски, како и Пеце Матичевски од Новаци, припадници на баталјонот на Воената полиција од Битолскиот корпус, загинаа на 5 јуни 2001 година, во близина на селото Гајре.

Во нивна чест денес пред споменикот „Ангел“ во паркот кај Градскиот часовник и пред споменикот во касарната во Битола, посветен на загинатите бранители, цвеќе положи градоначалничката на општина Битола, Наташа Петровска, претставници од Советот на Општина Битола, градоначалникот на општина Новаци и претставници од нивниот совет, семејствата на загинатите, припадници на АРМ, Сојузот на борци, припадници на резервниот состав, политичките партии и други лица.

„19 година измина од немилиот настан, чувствата не одминуваат дека нашите сограѓани недостигаат. Ваквите моменти малку повеќе треба да нè отрезнуваат за тоа како се однесуваме и во чувањето на споменот кон нив, меѓутоа и во возвраќањето на долгот кон сите нив, со нашите заложби да го подобриме општеството во коешто живееме. И во оваа пригода  изразувам сочувство кон семејствата кои ги загубија тие млади животи за кои нема надоместок, меѓутоа упатувам апел до сите млади да се вградат во нашето општество онака како што треба да се вгради младината и да бидат негови двигатели“, рече градоначалничката Наташа Петровска.

Пред присутните се обрати и Митре Солунчевски од подрачното одделение на Министерството за одбрана во Битола.

„Одделението за одбрана традиционално од 2003 година го одржува овој настан посветен на нашите сожители кои го изгубија животот во 2001 година во извршување борбени задачи во составот на резервниот состав на АРМ. Оваа година поради вонредната состојба ќе има само полагање цвеќе, а нема да се одржи меморијалниот турнир во мал фудбал ‘Влатко, Благојче и Пеце 2001’“, истакна Солунчевски.