Македонија
Дел од Домот за доенчиња и мали деца во Битола ќе се преадаптира во градинка
Градоначалникот на општина Битола Тони Коњановски и министерката за труд и социјална политика Јованка Тренчевска, денес потпишаа два значајни договори, преку кои е дефиниран начинот на реализација и финансирање на активностите за адаптација на дел од објектот на Домот за доенчиња и мали деца во Битола во детска градинка, која ќе биде во состав на ЈОУДГ „Мајски цвет“.
„Преку овие два договори, практично, ќе обезбедиме подобра иднина за нашите сограѓани, овозможувајќи им згрижување на нивните деца во објект наменет за детска градинка. Општина Битола ќе финансира 30% од предвидената сума за градежните работи и адаптацијата на објектот, односно околу 4 милиони денари, средства кои се веќе обезбедени од Буџетот и планирани во Годишниот план за јавни набавки, а исто така, општината обезбеди средства за изработка на Проектот за адаптација.
Општина Битола со години има долга листа на чекање на деца за прием во детските градинки. Како локална самоуправа, максимално се залагаме да се изнајдат законски решенија, со кои ќе биде надминат овој горлив проблем за родителите, особено за оние кои одат на работа и немаат каде да ги остават своите најмили. Потпишувањето на денешните договори е токму во таа насока, да се обезбеди капацитет од нови 80 места за деца од претшколска возраст.
Присуството на министерката исто така во искористивме за да разговараме и за преостанатите две детски градинки кои се започнати во Битола, а треба да се завршат со поддршка од Министерството за труд и социјална политика, а кои се уште не се реализираат со потребната динамика“ – рече градоначалникот Тони Коњановски.
Ваквата инвестиција и е потребна на Битола, истакна министерката Тренчевска и посочи дека ги охрабрува и другите општини да доставуваат проекти за изградба, доградба и адаптација на простори со цел нивно наменување во детски градинки.
„Заедно со општината ќе делуваме во рамките на стратешките определби преку поддршка на активности од јавен интерес за унапредување, промоција и поддршка на политиките за развој на детската заштита. Целта е да придонесеме кон зголемување на опфатот на деца во детските градинки . Како министерство се залагаме за што поголема соработка со општините и унапредувањето на животот на граѓаните да доаѓа токму преку заложбите на локалните самоуправи“, рече Тренчевска.
Предвидениот рок за изведба на градежно-занаетчиските работи на градинката изнесува 10 месеци, сметајќи од денот определен за вовед во работа на изведувачот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Филипче: Нека не води победничкиот дух на 11 Октомври во сите битки и одлуки кои се пред нас
Претседателот на СДСМ, Венко Филипче во своето видео обраќање по повод 11 Октомври, Денот на народното востание, направи паралела на партизанската борба за слобода и сопствена држава во 1941 и денешната битка пред која се исправени граѓаните и државата.
„Денеска нашите граѓани и нашата држава повторно како и тогаш се наоѓаат пред нови битки и историски одлуки. Ако тогашната битка беше за слобода и човечки правдини, денешните битки се за стабилна, интегрирана и просперитетна Македонија. Нашиот просперитет можеме најдобро да го реализираме интегрирани со нашите европски сојузници како полноправна и рамноправна членка на Европската Унија“, вели Филипче во своето обраќање.
За жал, констатира Филипче, актуелната власт е првата македонска влада што свесно се откажува од европската иднина на земјата што е определба на многу генерации. Според него, членството во Европската Унија е стратешка цел и никој не смее да им го одземе ова право на граѓаните.
„Наместо храбро да се бори за остварување на нашиот сон таа го турка народот во самосожалување и откажување од остварување на нашите цели. Токму затоа на овој светол ден клучното прашање кое треба да го поставиме е дали ќе ја извојувавме слободата доколку бевме малодушни и западневме во самосожалување тој октомври 1941 година наместо храбро да се соочевме со предизвикот на борбата? Одговорот на ова прашање веќе го даде историјата“, истакна Филипче.
Филипче упати порака дека СДСМ останува со граѓаните и на вистинската страна на историјата уверен дека само така победата е сигурна.
„Бевме на победничката страна и во 1941-та година и во 1991-та година, ќе бидеме и сега. СДСМ секогаш ќе биде тука заедно со своите граѓани и кога е во владата и кога е во опозиција. Бидејќи борбата за Македонија е борба на сите граѓани, а не само на една политичка гарнитура. Нека не води победничкиот дух на 11 Октомври во сите битки и одлуки кои се пред нас!“, потенцира Филипче.
Македонија
„Владата на СДС и ДУИ потрошила 6 милиони евра за заштита на државата од сајбер напади, а нападнати беа повеќе државни институции“, вели ВМРО-ДПМНЕ
„За да одиме напред мора да знаеме факти за минатото. За да одиме напред мора да знаеме што ни остави претходната влада на СДС и ДУИ. Владата на СДС и ДУИ ги трошела народните пари за свои потреби. Владата на СДС и ДУИ потрошила 377 милиони денари или околу 6 милиони евра за заштита на државните институции од сајбер напади во периодот од 2020 до крајот на 2023 година“, велат ВМРО-ДПМНЕ.
„Неправилностите и за ова ги констатираат и државните институции или Државниот завод за ревизија.
Државниот завод за ревизија констатирал дека владините тела склучиле 283 договори за информациска безбедност, а државата сепак не ги заштитила информациските системи на државата кои располагаат со чувствителни податоци.
Со сајбер напади се соочија повеќе државни институции меѓу кои, Министерствата за образование, Министерството за земјоделие, сајтовите на Влада, Државна изборна комисија, а некои хакерски подвизи воопшто не се регистрирани, бидејќи нема правна регулатива за задолжително пријавување“, соопшти ВМРО-ДПМНЕ
Македонија
Мицкоски: Нашите дедовци имаа за цел да ја ослободат државата, а ние имаме цел економски да ја развиеме
Претседателот на Владата, Христијан Мицкоски упати честитка по повод 11 Октомври, Денот на народното востание.
„Дозволете ми од мое лично име и од името на Владата да Ви го честитам 11 Октомври, Денот на народното востание. Оваа година одбележуваме 83 години од пркоста и желбата за слободна Македонија.
Македонците на тој 11 Октомври 1941 година се впишаа на мапата на слободарските народи, кои заедно со Сојузниците од Втората светска војна го поразија Нацизмот и Фашизмот.
Народниот дух на пркост и непокор кој беше демонстриран на тој 11 Октомври трае и ден денес, тој е движечка сила за промени и подобро утро. Тоа е мислата која не влече напред, дека секогаш може и мора подобро“, се вели во честитката на Мицкоски.
„Ако нашите дедовци имаа за цел да ја ослободат државата, нашата цел е да ја развиеме Македонија.
Почитувани сограѓани, иако се соочуваме со предизвици, ние зачекоривме во ера на економска трансформација и назад од тоа нема. Цврсто се обврзавме пред граѓаните дека посветено, чесно, одговорно ќе работиме за повторно да ја вратиме државата во рацете на граѓаните и работиме на тоа преку конкретни реформи, проекти и промени кои се клучни за рестарт на институциите и на системот.
Ерата пред нас ќе биде одбележана со економски напредок и развој, правна сигурност на системот и владеење на правото што само по себе подразбира бескомпромисна борба против криминалот и корупцијата, иднина за сите граѓани, проекти за развој, надеж која носи позитивни промени, нови работни места, перспектива за младите и конечно обезбедување на подобар и поквалитетен животен стандард.
Како генерација политичари, ние немаме втора шанса, и оваа шанса и доверба која ја ни ја дадовте мораме да ја зграпчиме и од истата извадиме најмногу што можеме, тоа им го должиме на сегашните, но и на идните генерации на кои мораме да им обезбедиме својата иднина да ја градат тука, зошто ни е аманет од тие пред нас.
Само заедно сложни Македонци, Албанци, Турци, Роми, Срби, Власи, Бошњаци можеме да градиме единство, иднина и просперитет.
Продолжуваме посветено да чекориме по патот на борбата за создавање на држава на среќни и задоволни граѓани.
Нека е честит 11 Октомври – Денот на народното востание“, се наведува во честитката на премиерот Христијан Мицкоски.