Македонија
Демократскиот сојуз: Османи ги загрозува евроинтеграциите на Македонија, треба да си поднесе оставка

Демократскиот сојуз оценува дека министерот за надворешни работи, Бујар Османи, со претераните, необјективни и манипулативни ставови за внатрешнополитичките состојби ги загрозува евроинтеграциските процеси на Македонија.
„Прво, во јуни 2022 година Османи ги прифати францускиот предлог, општиот став и заклучоците на Советот на Европската Унија, без претходни пошироки стручни и политички консултации. Второ, консултациите што подоцна под притисок на експертите, невладиниот сектор и политичките партии се одвиваа имаа неискрен и крајно манипулативен карактер. Османи тврдеше дека доколку парламентот и Владата ја прифатат преговарачката рамка, ќе има една меѓувладина конференција за почеток на преговарачкиот процес, а не две, како што сега најавува“, велат од ДС.
Министерот тврдеше, како што велат од оваа партија, дека протоколите, кои секоја година ги усвојуваат Бугарија и Македонија, не се дел од преговарачката рамка, а тие всушност се, дека македонскиот јазик е признат без какви било забелешки за што како круцијален доказ го користеше договорот со ФРОНТЕКС, но вистината е дека во ниту еден од документите, вклучително и во преговарачката рамка, не е предвидено дека по приемот на Македонија во ЕУ, македонскиот јазик ќе биде официјален и еден од службените јазици во ЕУ.
„Османи тврдеше дека по прифаќањето на преговарачката рамка, ќе почнат пристапните преговори со ЕУ, но во суштина почнат е само скрининг-процесот, а за преговорите и за отворање на кластерите неопходни се уставни промени, без реципроцитет и гаранции дека Бугарија нема да може историските прашања да ги користи за вето на процесите поврзани со евроинтеграциите на Македонија. Доколку има 80 пратеници, кои би гласале за уставните промени, Османи нема потреба да се конфронтира со сите што не поддржуваат уставни промени под диктат на Бугарија, која не ги признава македонскиот народ и јазикот“, се истакнува во соопштението од оваа партија.
Анализите на ДС, како што велат, покажуваат дека Османи лекомислено прифатил обврски за целата држава, а сега не може да ги исполни. Потенцираат дека по ваков дебакл, Османи треба да си поднесе оставка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: За време на СДСМ улица во Драчево е преименувана во Азем Морана

Срамно и дрско е СДС да зборува за темелите на македонската државност откако променија знаме, име и Устав на државата, реагира ВМРО-ДПМНЕ на обвинувањата од СДСМ.
„СДС која тоне се подолу во рејтингот меѓу граѓаните, заборава дека име на училиште го дава општинскиот совет, а не Владата. За да ги потсетиме, токму тие во време Зоран Заев како премиер и градоначалник на СДС во Скопје, во Драчево улица е преименувана во Азем Морана, откако претходно се викала Јустинијан Први. СДС говори за македонска државност, а во нивно време се променија и името, и знамето и Уставот на Македонија. Ги распродаваа државните интереси на кој стигнат за ден повеќе власт. Затоа граѓаните не им дадоа доверба и тонат секојдневно се повеќе. Подлоста на СДС оди во невидени размери, а ние како ВМРО-ДПМНЕ сме вчудоневидени на нивното однесување“, пишува во реакцијата.
Македонија
Клиниките за Токсикологија, Неврологија и Кардиологија добија нови директори

Министерството за здравство информира дека се именувани нови в.д. директори во четири јавни здравствени установи.
На Универзитетската клиника за токсикологија за в.д. директор е именуван д-р Арѓенд Имери, на местото на д-р Андон Чибишев.
На Универзитетскиот институт за клиничка биохемија за в.д. директор е именувана д-р Мимоза Бафќари-Бакији, на местото на д-р Николина Граздановска.
На Универзитетската клиника за неврологија за нов директор е именуван д-р Игор Кузмановски, на местото на д-р Фатмир Меџити.
На Универзитетската клиника за кардиологија за нов директор е именувана д-р Даница Петкоска Спирова, на местото на д-р Беким Поцеста.
Новоименуваните директори ја извршуваат оваа функција почнувајќи од вчера.
Македонија
СДСМ: Осуда за скандалозната одлука за именување на училиште во Студеничани со името на Азем Морана

Социјалдемократскиот сојуз на Македонија најостро ја осудува, како што велат, скандалозната одлука на Владата за именување на општинското основно училиште во Општина Студеничани со името на Азем Морана, според СДСМ, познат балист и соработник на фашистичкиот окупатор за време и по Втората светска војна.
„Ова именување е историски неосновано и претставува директно понижување на антифашистичката борба на македонскиот и албанскиот народ. Тоа е навреда за сите борци од НОБ, за жртвите од фашистичкиот терор, за вредностите врз кои е изградена нашата држава, слободна, демократска и европска Македонија. Преку рехабилитација на фигури поврзани со балистичкото движење што ја прават ВМРО-ДПМНЕ и ВЛЕН се нарушуваат темелите на идеологијата врз која е изградена македонската државност: антифашизмот, народниот суверенитет и демократските вредности. Според десничарската матрица, тие свесно и систематски го бришат антифашизмот од колективната меморија заменувајќи ги партизанските имиња со имиња на балисти, соработници со фашистичкиот окупатор“, велат од СДСМ.
Од партијата додаваат дека бескомпромисната борба против фашизмот не е само дел од нашето историско наследство, туку е структурна вредност на нашиот уставен поредок, на нашиот идентитет и на нашата евроинтегративна определба.
„Срамно е една влада којашто тврди дека е за Европа да дозволува вакви опасни чекори. Наместо да ги едуцира младите за вистинските херои на слободата, таа ги учи да ги слават соработниците и поддржувачките на фашистичката идеологија. Тоа е образовно и морално злосторство за едно деморкатско општество коешто се стреми кон европските вредности“, велат од СДСМ.
Партијата ја повикува Владата итно да ја преиспита одлуката, водејќи се од почитта кон борците и да поднесе итна иницијатива до надлежните институции за нејзино укинување. Од СДСМ велат дека ќе побараат и отворена расправа во Собранието, како и поддршка од Сојузот на борците и од сите прогресивни сили во државата.
„Нема да дозволиме ВМРО-ДПМНЕ и ВЛЕН да ја поткопуваат идеологијата на антифашистичката борба и македонската историја. Македонија е изградена врз темелите на антифашизмот, а не врз ревизионизам и така мора да остане“, велат од СДСМ.