Македонија
Демократскиот сојуз бара разговори со политичките лидери за промените во Изборниот законик

Претседателот на Демократскиот сојуз, Павле Трајанов, денеска, до лидерите на СДСМ, ВМРО-ДПМНЕ и ДУИ, Зоран Заев, Христијан Мицкоски, Али Ахмети, како и до лидерите на други политички партии, упати иницијатива за одржување средби на кои ќе се разговара за потребата од измени на Изборниот законик.
„Во барањето за средби со лидерите на партиите се нагласува дека неодамна Демократскиот сојуз до Собранието на Република Северна Македонија достави иницијатива за измена на Изборниот законик, со која се предлага, наместо шест, Македонија да биде една изборна единица, при што и натаму да остане пропорционалниот изборен модел без изборен праг“, велат од партијата.
Демократскиот сојуз смета дека со овие промени парламентот ќе биде реален одраз на определбата на граѓаните, ќе јакне одговорноста на извршната и другите власти, за круцијалните државни и прашања од интерес на граѓаните ќе се носат одлуки со сериозна дебата во парламентот, ќе се создадат услови за владеење на правото, ефикасна борба против криминалот и основни предуслови за економски развој.
Со овие измени, велат од ДС, како и со промените на начинот на финансирање на партиите, медиумската кампања и други клучни промени, ќе се создадат услови за еднакви шанси на сите партии, што е од интерес на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Партијата Левица: На Локалните избори во конечна пресметка со десничарскиот режим

Партијата Левица ја одржа 28-та редовна сесија на Централниот комитет на која беа донесени стратешки одлуки во пресрет на претстојните Локални избори 2025. Сесијата започна со едноминутен молк за жртвите во трагедијата во Кочани.
„Во духот на демократскиот централизам и борбеноста, оваа сесија ја зацврсти позицијата на Левица како единствена автентична и непоколеблива опозициска сила во државата“, велат од партијата.
„На сесијата на ЦК едногласно беше верификуван актуелниот пратеник м-р Сашко Јанчев како нов член на Президиумот на Левица. Во своето обраќање, Јанчев истакна дека народот е алергичен на корумпираните политички елити кои со децении ја злоупотребуваат државата за лични криминални интереси. Властите пробаа сѐ за да ја подјармат Левица – со притисоци, спинови и пари, но не успеаја! Токму тоа, нивниот неуспех да ја направат Левица како нив, е она што најмногу ги плаши.
Централниот комитет усвои политичка рамка за дејствување во наредниот период, со фокус на есенските Локални избори, како фронт за жестока пресметка со режимскиот апарат. Во услови на постојана репресија, изборен инженеринг и клиентелистички октопод кој го гуши секој обид за народна еманципација – Левица ќе настапи бескомпромисно, чесно и организирано, како глас на обесправените и бастион на некорумпираноста.
Времето на калкуланти, опуртинисти, предавници и квазиопозиционери заврши. Борбата продолжува – на улиците, во институциите и на изборните полиња. Со народот, за народот!“, соопшти партијата Левица.
Македонија
Укината забраната за тешки товарни возила на патниот правец Маврово – Дебар

Забраната за сообраќај за тешки товарни возила на патниот правец крак Маврово – Дебар се укинува во 06.10 часот, извести АМСМ.
Сообраќајот на државните патишта се одвива по претежно влажни коловози, на некои повисоки места во западните и југозападните делови од државата со остатоци од кашест снег на коловозот по интервенција на дежурни екипи на Македонијапат.
Македонија
Променливо облачно и студено со повремено засилен ветер, претпладне услови за слаб снег

Времето денеска ќе биде променливо облачно и студено, претпладне наместа ќе има услови за провејување на слаб снег. Ќе дува умерен до засилен ветер од северен правец (над 70 km/h).
Минималната температура ќе биде во интервал од -4 до 1, а максималната ќе достигне од 3 до 10 степени.
Во Скопје, променливо облачно и студено. Ќе дува умерен, во делови од котлината повремено засилен ветер од северен правец. Минималната температура ќе се спушти до 0, а максималната ќе достигне до 8 степени.
Времето во наредните денови
Во следните денови времето ќе биде стабилно и ветровито со температури под просекот за овој период од годината. Утринските температури на повеќе места ќе бидат негативни, а дневните во постепен пораст.