Македонија
Демократското движење: Антикризните мерки на Владата се театар, сиромаштијата само расте

Додека секојдневно се зголемуваат цените, особено цената на горивата, која е еден од доминантните фактори за формирање на цените на производите и услугите, Владата ја започнува кампањата за контролирани цени на основните прехранбени производи.
Дека ова е само уште една измама на власта објавена од министерот Крешник Бектеши, зборуваат економските анализи, бидејќи во основа „чекорите“ за кои предупредува владата немаат економска логика, реагираат од Демократското движење.
Ова, како што велат, може да се аргументира вака:
„Ниту една економска мерка не може да ги контролира цените на производите и да ја намали инфлацијата во период од 45 дена, значи неопходно е мерките да бидат од 6 месеци до 1 година,
Што ќе се случи кога во екот на зимата ќе престанат мерките и граѓанинот ќе се соочи со неконтролирано поскапување на прехранбените производи, струјата, дрвата, пелетите.
Дали власта со вештачки мерки се обидува да ги смири граѓаните за да не излезат на протести, по предупредувањата од повеќе сектори?
Целата оваа ситуација докажува дека ниту министерот за финансии Бесими, ниту министерот за економија Бектеши немаат капацитет да ја менаџираат состојбата со инфлацијата. Бидејќи замрзнувањето на цените се случува само во случаи на вонредни кризи, како што беше случајот со пандемијата или енергетската криза“, истакнуваат од партијата во нивниот допис.
Констатираат дека додека владата експериментира со континуирани мерки, куповната моќ на граѓаните е намалена за 46 отсто во однос на претходната година, а со тоа, од ден на ден, како што оценуваат, граѓаните ќе продолжат да осиромашуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре, сончево и топло време со мала локална облачност

Времето утре ќе биде сончево и топло со мала локална облачност. Ќе дува умерен, наместа повремено засилен ветер од јужен правец. Минималната температура ќе биде во интервал од 11 до 19, а максималната ќе достигне од 30 до 37 степени, информира УХМР.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 17, а максималната ќе достигне до 36 степени.
В петок и в сабота во западните и во северните делови ќе има услови за повремен локален дожд и појава на ретки грмежи. В петок ќе дува засилен, повремено силен ветер од западен и југозападен правец.
За време на викендот ветерот ќе го смени правецот во северен со умерен, по должината на Повардарието повремено засилен интензитет, а температурите ќе бидат во опаѓање.
Македонија
ДОМ: Новиот нацрт-закон за Рударство е директна закана за здравјето на луѓето

Зелената партија ДОМ категорично го отфрла новиот нацрт-закон за Рударство предложен од Министерството за енергетика, рударство и минерални суровини. Наместо да поставува линии за стратешки развој, според ДОМ, овој закон е директна закана за животната средина, здравјето на граѓаните и демократските принципи на одлучување.
ДОМ цени дека ова законско решение силно ја централизира моќта во Владата, дозволувајќи ѝ да прогласува минерали за „стратешки“ без јавна дебата и учество на граѓаните и граѓанките.
„Спорна е и можноста за дозволување на концесии до 60 години, како и овозможување на експропријација на приватно земјиште, што ќе претставува правна основа за удар врз имотните права. Со предложените одредби ќе се врши и привилегирање на државни и странски компании, без спроведување на јавен повик. Особено загрижува воведување на можност за користење на опасни технологии во постојните рудници, како и признавањето на загадување, но не и понуда на механизми за превенција. ДОМ оценува дека моделот на „управување со ризик“, не преставува правен механизам за заштита на животната средина и здравјето на граѓаните и граѓанките“, велат од ДОМ.
Според партијата, ова законско решение не е во јавен интерес, туку истото е насочено и дизајнирано за задоволување на корпоративни структури и финансиски интереси, притоа создавајќи остри ризици за здравјето на идните генерации, распродавајќи ја земјата и претворајќи го природното богатство во профит за малкумина.
ДОМ порачува дека Македонија не е ничија лична сопственост и апелира до граѓаните и граѓанките активно да се вклучат во јавната расправа за која преостануваат уште девет дена.
Македонија
Мицкоски за акцијата за намалување на училишниот прибор: Трговците треба да обезбедат попуст меѓу 10 и 15 проценти, ДПИ е на терен

Државниот пазарен инспекторат е на терен и гледа дали се почитува, засега немаме објективни нарушувања на веќе договореното, изјави премиерот Христијан Мицкоски одговарајќи на новинарско прашање како е задоволен од акцијата за намалување на училишниот прибор.
„Владата на седница донесе одлука со која заедно со трговците и со снабдувачите на училишниот прибор обезбеди попуст помеѓу 10 и 15 % на маржата во зависност дали е на големо или на мало, а репер е цената од 1 јуни 2025 година. Задача е на трговците да означат која била цената на 1 јуни 2025 година и врз база на тоа да обезбедат попуст помеѓу 10 и 15 % и да истакнат на влезот од продавницата натпис на кој има ‘Помалку трошоци, повеќе за граѓаните’. ДПИ е на терен и гледа дали се почитува, засега немаме објективни нарушувања на веќе договореното“, потенцира премиерот Мицкоски.