Македонија
Денот на народното востание одбележан на три локации во Битола

На три локации во Битола свечено беше одбележан 11 Октомври, денот кога пред 78 години тогашните борци ја започнаа битката за ослободување од фашизмот.
Свежо цвеќе пред споменикот на загинатите борци пред Центарот за култура во Битола положија битолската градоначалничка, Наташа Петровска, претставници на Советот на Општина Битола, Општинскиот сојуз на борците, претставници на политичките партии СДСМ и ВМРО-ДПМНЕ, како и нивните подмладоци.
„Денес е еден од најзначајните празници од нашата историја, денот кој што е поврзан со нашата слобода, со нашата независност, просперитетот и нашата иднина. Токму во оваа прилика сакам да им се заблагодарам на сите наши борци кои што ги положија своите животи, токму за нашата слобода. Нека ни е вечен и честит празникот 11 Октомври“, рече градоначалничката Петровска.
Свое обраќање имаше и претседателот на Сојузот на борци од Битола, Александар Трајковски.
„Овој ден е значаен за нас, затоа што ова беше почеток на добивање на слободата, создадовме држава и посреќен живот за идните поколенија, создадовме и целосно подобри услови за живеење, затоа што тоа беше и социјална револуција. Нека ни е среќен и долговечен овој празник“, истакна Трајковски.
Делегацијата предводена од градоначалничката Петровска положи цвеќе и пред споменикот на народниот херој Стив Наумов, лоциран пред Офицерскиот дом во Битола, како и на партизанските гробишта, со што им оддадоа почит на сите народни херои, кои ги положија животите во Втората светска војна, за слободна и независна држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.