Македонија
Дескоска: Во животот сум вршела неколку функции, но потпретседател на партија никогаш не сум била

Професорката по уставно право и ексминистерка за правда, Рената Дескоска, рече дека во животот вршела неколку функции, но потпретседател на партија никогаш не била, откога ова го посочи министерот Кренар Лога на денешната конференција. Лога ја обвини Дескоска дека како министерка била лош пример.
„Кога немате аргументи, тогаш користите ad hominem напади и навреди. Јас лично посакувам секој следен министер да биде подобар од претходните бидејќи само така може да одиме напред. А тоа може само со политики засновани на точни информации и со почитување на најдобрите меѓународни практики.
П.с. Во животот сум вршела неколку функции, но потпретседател на партија никогаш не сум била“, пишува Дескоска во својата објава.
Претходно, разните ставови на актуелниот министер за правда, Кренар Лога, и ексминистерката за правда, Рената Дескоска, за вметнување на графата за националност – доведоа до јавен конфликт. Лога ја претстави својата претходничка како лош пример за министер кога беше прашан за упатството, кое има привремена забрана за примена во пракса од Уставниот суд.
Лога рече дека Дескоска може да дава изјави само како професорка, а како министер е лош пример.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.
Македонија
Проектите што се реализираат не се на ВМРО-ДПМНЕ или на СДС, туку на македонските граѓани, реагира ВМРО-ДПМНЕ

СДС мора да почне да се однесува како сериозна партија, а не како мало дете на кое му ја земале играчката, велат од ВМРО-ДПМНЕ, на обвинувањата од СДСМ дека проектот за изградба на патот Охрид – Св. Наум е нивен.
„СДС мора да прифати дека проектите кои се реализираат, не се во нивна или наша сопственост, туку за граѓаните и за државата.
Исто така, многу е важно да се напомене дека проектите кои се почнуваат мораат и да се завршат. Е сега, разликата меѓу ВМРО-ДПМНЕ и СДС е во тоа што ние кога работиме и остваруваме, се е во временски рок, јавно и транспарентно, а додека пак СДС, ако отпочне некаков проект, тој проект потоа е корумпиран, со тендери договорени во 4 очи, поскапи цени двојно од набавните, класифицирани договори или пак, проекти кои остануваат така да блеат во празно, и никој за ништо да не одговара.
Проекти кои СДС ги има до крај завршено се, проектот за златната виза на Филипче, пари од ископ на јаглен на фирми на Филипче и Заев, проектите за уништување на Македонија, како што беа името, знамето, идентитетот и Уставот, потпишувањето на Преспанскиот и договорот со Бугарија, проектот Француски предлог и многу други проекти слични на овие.
За разлика од нив, ВМРО-ДПМНЕ вистински работи на реализација на проектите, без разлика која Влада ги започнала и ги решава на брз и ефективен начин во интерес на граѓаните“, велат од ВМРО-ДПМНЕ.
Македонија
СДСМ: Мицкоски повторно промовира наш проект, овој пат обновата на патот Охрид – Св. Наум

Проектот за реконструкција на патниот правец во охридскиот регион е започнат од СДСМ уште во август 2023 година, како дел од сеопфатниот план на Владата предводеа од СДСМ за раст и развој на регионот, унапредување на туризмот и подобрување на патната инфраструктура кон граничните премини со соседните земји, велат од СДСМ.
„Средствата за овој проект, во вредност од 11,7 милиони евра, беа обезбедени од буџетот на ЈП за државни патишта и истиот беше планиран, одобрен и започнат од претходната влада на СДСМ со реализација од околу 50%. До летната сезона во 2024 година комплетно се заврши реконструкцијата на патот од Св. Наум до пред селото Пештани и заради туристичката сезона имаше мал прекин на работите. Претходно, во 2019 година беше започната и завршена реконструкција на патот од бензиската Билјанини извори до с. Коњско“, велат од СДСМ.
Дополнително, додаваат од таму, и цела Туристичка како главна магистрална трансверзала во градот во должина од 5,6 км по 60 години беше реконструирана исто така од страна на СДСМ.
„Токму во време на СДСМ беа рехабилитирани и обновени и патните правци кон граничните премини Блаце, Деве Баир, Ќафасан и Меџитлија. Ја поздравуваме довршувањето на проектот, но до кога власта ќе се кити со проекти на СДСМ. Кога ќе промовира Мицкоски некој проект од неговата Влада? Или тоа не може да се случи затоа што таков проект нема“, велат од СДСМ.