Министерката за образование и наука, Рената Дескоска, денеска присуствуваше на конференцијата „Образовни реформи: предизвици и перспективи во образованието на наставниците“, во организација на Фондацијата „Отворено општество“.

Дескоска во своето обраќање напомена дека дури и да се испланирани најдобрите образовни реформи, тие нема да дадат соодветен ефект доколку нема сојузништво со наставниците, односно доколку тие почувствуваат дека не се воопшто или доволно вклучени во целиот тој процес или, пак, доколку не го добиваат потребниот третман од страна на државата и дигнитетот на професијата со која се занимаваат е на ниско општествено ниво.

„Како Влада ги вклучивме наставниците во промените што ќе значат подобро образование, од кои некои се подготвени, а други се во фаза на подготовка и тоа е најдобриот начин за да се постигне зацртаната цел“, изјави Дескоска додавајќи дека паралелно се работи на обезбедување пристојни услови за реализација на работните обврски.

Наставниците, рече Дескоска, ќе добијат и нови можности за професионален и кариерен развој, а од овој септември ќе добиваат и поголема плата за што веќе се предвидени средства во државниот буџет.

„Секако, нашите планови во овој дел не се поврзани само со актуелниот вработен наставен кадар, туку се поврзани и со новите генерации наставници што допрва ќе се создаваат, ќе стануваат дел од воспитно-образовниот систем и ќе мора да бидат подготвени да одговорат на новите образовни, социјални и економски предизвици што ги носи со себе оваа благородна професија“, изјави Дескоска.