Македонија
Дескоска: Предлог-законот ја гарантира независноста на Обвинителството

Предлог-законот за Јавното обвинителство подразбира градење силно Обвинителство за гонење организиран криминал и корупција, кој, покрај тековните надлежности што ги има, ќе ги преземе и случаите што ги водеше СЈО, изјави министерката за правда, Рената Дескоска.
„Ова Обвинителство, во согласност со предложениот текст, има одредени финансиски и статусни гаранции, кои треба да му овозможат и да му гарантираат независност од извршната и законодавната власт, со цел да не може да биде уценувано ниту од финансиски аспект ниту да се врши какво било влијание“, потенцира Дескоска.
Министерката истакна дека во текот на вчерашната расправа биле изнесени неколку, како што рече, естрадни тврдења дека има неуставност во овој концепт, што, според министерката, е апсолутно неточно бидејќи концептот со зајакнати надлежности на Јавното обвинителство за гонење организиран криминал и корупција постои и во други земји.
За прашањето за предлагање јавен обвинител од страна на опозицијата, Дескоска истакна дека во текот на јавната расправа никој не ја поддржал оваа идеја како добра процедура кој било обвинител да биде предлог на опозицијата.
„Слушнавме предлог кој е вреден за размислување за зголемување на транспарентноста на постапката за избор на обвинител за организиран криминал и корупција и тој предлог ќе биде земен предвид“, потенцира Дескоска.
Во однос на членовите 108 и 109, кои важат за најтешките прашања во законот за Јавното обвинителство и каде што се лоцирани клучните барања на опозицијата, министерката истакна дека ја охрабрува ставот истакнат од повеќе експерти, дека дури и да не биде изречно наведено дека постапките продолжуваат – тие ќе продолжат во согласност со Законот за кривичната постапка.
„Тоа значи дека во согласност со она што беше истакнато вчера во текот на јавната дебата, дава простор за градење консензус бидејќи една од забелешките што ја истакнува опозицијата е дека не сакаат да се дозволи постапките да продолжат. Ако нема изрична одредба дека продолжуваат, тогаш тие ќе продолжат во согласност со Законот за кривичната постапка. Но, нема простор за ставање одредба дека одредени постапки ќе запрат“, потенцира Дескоска.
Во однос на делот што се однесува на бројот и систематизацијата на Обвинителството за гонење организиран криминал и корупција, Дескоска смета дека треба да се размисли оти ако се има вистинска желба за градење капацитетно обвинителство, треба да му се дадат обвинители за да ја вршат таа работа. Исто така, министерката истакна дека не е пречка и прашањето што може да доведе до тоа законот да не влезе во Собранието.
Дескоска потенцира дека е добро што и пратениците биле дел од јавната расправа и можеле да направат процена кои ставови се аргументирани.
Во однос на предлогот во законскиот текст, наместо уставното име на државата, да се користи терминот Република, Дескоска вели дека така всушност се брише зборот Македонија.
„Вчера слушнавме и предлог во законскиот текст, наместо уставното име на државата, да се користи терминот Република. Размислував за тој предлог, но не мислам дека е добар бидејќи со таков предлог и концепт во законот всушност го бришете зборот Македонија од целиот текст и тој ќе биде спомнат само еднаш. Вие знаете дека првичната и најтврда позиција на која Грција долго време инсистира, тоа беше зборот Македонија да не биде дел од нашето уставно име. Со ваков концепт, каде што ќе го избришете во сите закони зборот Македонија, мислам дека доаѓате, всушност, до градење на она што беше суштински интерес на Грција во тоа време. Се надевам дека тоа не е соломонскиот концепт на ВМРО-ДПМНЕ за избегнување на уставното име преку избегнување на зборот Македонија“, потенцира Дескоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.