Македонија
Димитриевски: Во Македонија има нови сили подготвени да излезат и да работат од граѓаните за граѓаните

Актуелниот градоначалник на општина Куманово и претставник од граѓанското здружение „За наше Куманово“, Максим Димитриевски, вечерва во Прилеп се обрати на граѓанскиот собир со цел претставување на прилепското граѓанско здружение „За нашите граѓани“.
Димитриевски истакна дека тоа што се случило на 11 Октомври 1941 година во една демократска форма, сакале или не, ќе мора повторно да се случи бидејќи ако сакаме работите да се менуваат на подобро, тогаш мора да се биде помеѓу граѓаните и да се направи заедничко движење за Македонија, кое ќе овозможи реални и суштински промени, а граѓаните да ја добијат државата повторно назад.
„Граѓаните ќе ја добијат државата назад бидејќи Македонија е узурпирана држава, Македонија ја водат и лево и десно, но секогаш по ист терк и исто клише. Ја држат луѓе што бараат да им се служи, а не луѓе што сакаат да служат. Ние во Куманово уште пред една година се охрабривме и заедно рамо до рамо со граѓаните застанавме, првиот ден бевме малку, но вредни, чесни и достоинствени. Последниот ден кога се гласаше бевме на 26 илјади гласа и им испративме јасна порака на сите во Куманово и Македонија дека има нови сили во државата што се подготвени да излезат и да работат од граѓаните за граѓаните. Благодарам на сите од иницијативниот одбор што ќе учествуваат во основачкото собрание, а основната цел е првично да се има автономија во делот на одлучување и да се одлучува за граѓаните бидејќи здружението се формира од прилепчани за прилепчани“, потенцира Димитриевски.
Тој истакна дека граѓаните се уморни да слушаат една иста реторика на празни ветувања, каде што во континуитет се ветува, а не се реализира ништо.
„Ве охрабрувам, бидете горди на вашите предци затоа што покрај вас и ние од Куманово ја пишуваме современата македонска историја. Бидете достоинствени затоа што ние никогаш нема да се согласиме ниту со менување во историјата ниту со измените во етногенезата, а најмалку со навредите што доаѓаат до нашиот народ и држава во континуитет. Да, нашата цел се Европската Унија и НАТО, но како достоинствени граѓани Македонци и граѓани на Македонија, кои потекнуваат и со векови биле на овие простори. Не треба и недозволиво е некој да нѐ убедува дека ние денеска треба да се срамиме ако кажеме дека нашите предци се бореле против фашизмот? Ако кажеме дека нашите предци се бореле против бугарскиот фашистички окупатор, со тоа ние немаме цел да ги навредиме граѓаните на Бугарија, но исто така имаме обврска кон нашите предци. Да потсетиме дека ние живееме во наша Македонија и ние живееме со нашата историја која токму тие наши предци ја имаат креирано“, рече Димитриевски. Државата Македонија им припаѓа на сите. Бидете горди, вечерва сме 100, 200, 300, задутре ќе бидеме 500, до крајот на месецот 1.000 и потоа е само пат на математичка прогресија да се постигне конечната цел, а нашата конечна цел е Македонија да ја вратиме назад во рацете на граѓаните бидејќи големо фајде од политичките партии и субјекти не видовме. Нека ни е среќен и долговечен празникот, честитки и успех на здружението „За нашите граѓани“, изјави Димитриевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски со честитка за Курбан Бајрам: Борбата за подобра иднина да бидат нашата заедничка водилка

Премиерот, Христијан Мицкоски, упати честитка до пoглаварот на Исламска Верска Заедница, Реис Ул Улема Шакир ефенди Фетаху, по повод денешниот празник Курбан Бајрам.
„Дозволете ми од мое лично име и од името на Владата да Ви го честитам муслиманскиот празник Курбан Бајрам, Вам и на сите граѓани припадници на исламската заедница и да Ви посакам празникот да го поминете во добро здравје, мир, благосостојба и спокој во Вашите срца и домови.
Празникот Курбан Бајрам не потсетува на вистинските вредности и принципи во животот, а тоа е да правиме добри дела, да помагаме и да сме хумани бидејќи хуманоста и солидарноста се најголемите човечки особини.
Исламската заедница и сите нејзини верници се дел од оваа држава, затоа потребно е да си подадеме рака и да ги почитуваме различностите, бидејќи само така ќе изградиме држава на среќни и задоволни граѓани.
Нашата заложба е државата да ја градиме во меѓусебно разбирање, почитување, доверба и толеранција. Тоа ќе го постигнеме само доколку сме обединети заедно.
Како Влада за краток период успеавме да ја трансформираме државата, преку дијалог и соработка да реализираме проекти од кои најголеми придобивки ќе имаат сите граѓани без разлика на нивната етничка или верска припадност.
Но, потребни се крупни чекори за остварување на заедничките цели и затоа нека борбата за подобра иднина, надеж и поквалитетен живот бидат нашата заедничка водилка за успешна и победничка Македонија, држава дом за секој граѓанин и Македонија држава на промените“, пишува во честитката.
Македонија
Православните верници денеска ја одбележуваат Задушница

Во спомен на починатите, православните верници денеска ја одбележуваат Задушница во пресрет на големиот празник кој доаѓа во недела – Духовден.
Сеќавајќи се на покојните претци, верниците на овој ден се молат за простување на гревовите. Во црквата се служи парастос, а по службата се посетуваат гробовите на најблиските, се пали свеќа, се чита молитва и се принесува жртва за спасение на починатите. Наспроти обичаите на гробовите да се носи и раздава огромно количество храна, од Македонската православна црква апелираат дека смислата на овој ден е во молитвата, а жртвата треба да се ограничи на варена пченица, вино и леб.
Спомнувањето на сите починати благочестиви христијани во саботата пред Педесетница е востановено затоа што со собитието на слегувањето на Светиот Дух се завршило домостроителството на спасението на човекот, а во тоа спасение учествуваат и упокоените.
Затоа, Црквата која на Педесетница упатува молитви за оживотворување со Светиот Дух на сите живи, на самиот ден на празникот, ја проси и за упокоените благодатта на сесветиот и сеосветуваштиот Дух-Утешител, којашто тие уште во својот живот се уподобиле да ја имаат за извор на блаженства, бидејќи преку Светиот Дух „живее секоја душа“.
Оние кои не се во можност да одат на гробиштата поради оддалеченоста, треба да одат во најблискиот храм и да извршат помен за своите покојни.
Духовден, пак, го означува слегувањето на Светиот Дух врз апостолите, или како што го нарекуваат светите отци „Роденденот на Црквата“.
На 10-тиот ден од Христовото вознесение, а на 50-тиот од Неговото воскресение, на еврејскиот празник Педесетница, Светиот Дух слезе врз апостолите во вид на пламени јазици, а тие се исполнија со сила и добија дар да зборуваат на разни јазици.
За црквата овој настан има посебно значење затоа што Светиот Дух од тоа време, па се до денес не ја напушта и непрестано слегува врз црквата на литургијата, во молитвите, во сите дела. Тој е оној Дух по кој христијанскиот живот се нарекува духовен.
Македонија
Сончево и многу топло време, попладне локално невреме

Времето денеска ќе биде сончево и многу топло со мала до умерена облачност. Попладне ќе има локален развој на нестабилна облачност со пороен дожд и грмежи, наместа во форма на невреме со засилен ветер и услови за појава на град, информира УХРМ.
Максималната температура ќе биде во интервал од 29 до 36 степени.
Во Скопје, сончево и многу топло со мала до умерена облачност. Попладне во делови од котлината ќе има услови за појава на нестабилност со пороен дожд, грмежи и засилен ветер. Максималната температура ќе достигне до 36 степени.