Заменик-министерот за надворешни работи и надворешна трговија, Зоран Димитровски, од 9 до 11 септември предводеше делегација, која учествуваше на „Ереван дијалог форумот“, кој првпат се одржува оваа година во Ереван, Република Ерменија.

Во дебатата Димитровски нагласи дека на почетокот од 90-тите, по падот на Берлинскиот ѕид, имаше две клучни сценарија за иднината на светот, геополитиката и светскиот поредок. Едното е опишано во книгата на Френсис Фукујама, „Крајот на историјата“, според кое либералната демократија е конечно пронајдениот систем по мерка на човекот и ќе завладее со целиот свет. Второто сценарио е на Семјуел Хантигтон, за судирот на цивилизациите, според кое, светот го очекуваат нови војни помеѓу различните, пред сѐ, етнорелигиски цивилизации.

Димитровски истакна дека денес, за жал, го живееме второто сценарио или сме блиску до него. Војната е втората природа на човештвото. Балканот, земјите од Кавказот и Блискиот Исток се три тензични географски точки, каде што историјата на војни и етнички судири продолжува со децении, а големите светски сили и регионалните играчи ги преплетуваат своите интереси. Во моментот силата, сојузите, империите се тие што се наметнуваат и заземаат позиции – НАТО, ЕУ, БРИКС, глобалниот Југ, Кина, Индија – ќе бидат играчи во новиот светски поредок. Заканата од авторитарни режими и агресивни империјалистички држави ги тера малите земји на сојузување во алијанси.

Димитровски потенцира дека мултилатерализмот не ги дава очекуваните резултати зашто организациите што треба да ги спречат војните и да ги управуваат со конфликтите, како ОН и ОБСЕ, на пример, се блокирани. А тоа се гледа и на микроплан, на случајот со Македонија. Нашиот јужен сосед, на пример, не ја почитуваше пресудата од Меѓународниот суд на правдата во Хаг за членство на Македонија во меѓународните организации под референцијата БЈРМ, а источниот сосед не ги почитува пресудите од Судот за човекови права во Стразбур за регистрирање на здруженијата на Македонците. Очигледно повторно силата и интересите се оние што ќе ги определуваат контурите на светскиот поредок, кој е во транзиција, но алијансите, како НАТО и ЕУ, кои се сојузи на слободни и демократски општества, не треба да применуваат двојни стандарди кон кандидатите. Македонија сака да стане членка на ЕУ и да ги исполни Копенхашките критериуми, владеењето на правото, демократијата, човековите права, пазарната економија, а не условувањата за идентитетот, историјата, потеклото на нашиот јазик или етничката припадност на македонските револуционери“, истакна Димитровски.

Димитровски во рамките на „Ереван дијалог форумот“ се сретна и со министерот за надворешни работи на Унгарија, Петер Сијарто, а оствари и билатерални средби и разговори со заменик-министерот за надворешни работи на Ерменија, Парјур Хофханисјан, заменик-министерот за надворешни работи на Грузија, Лаша Дарсалија, државниот секретар во Министерството за надворешни работи на Словенија, Марко Штуцин, како и со претставници на Светскиот економски форум.