СДС кои 7 години беа на власт и тоа само до пред една година, се однесува како никогаш да не биле владејачка партија, а уште помалку се чувствуваат виновни за она што го направија во тие години владеење. Најверојатно, СДС секојдневно ќе држи прес-конференции, на кои без аргументи, издржани критики и факти, ќе зборува дека полошо се живее, реагираат од ВМРО-ДПМНЕ.

Точно е, додаваат од владејачката партија, дека се живее тешко, но граѓаните знаат кој ги донесе до питачки стап и денот да го поминуваат со 150 денари.

Според партијата на власт, заради СДС, задолжени сме како никогаш досега, па кредитите и каматите кои тие ги оставија, Владата на ВМРО-ДПМНЕ ќе ги враќа сега и во следниот период.

Навистина е апсурдно, додаваат од партијата на Мицкоски, СДС да говори за економија и плати, кога во нивно време инфлацијата беше над 20%, платите и пензиите стагнираа, јавниот долг растеше, сметките се покачуваа, а тие не понудија никакво решение.

Им порачуваат на СДС, да го слушнат говорот на претседателот Мицкоски, на вчерашната свеченост по повод една година Влада, и ќе дознаат и научат многу од него.

Пред само 4 години ВМРО-ДПМНЕ во Аеродром ветуваше нови 100.000 метри квадратни паркови и зеленило. Нашите сограѓани се сведоци, ниту еден нов парк во Аеродром не е подигнат за 4 години, истакна на прес-конференција Марина Кусакатска од СДСМ Аеродром.

Наместо тоа, вели таа, неискосени и пожолтени тревници полни со ѓубре и искршена урбана опрема, се последиците од управувањето на Дејан Митески, Тимчо Муцунски и ВМРО-ДПМНЕ со Општина Аеродром.

„Паркот „Радост“ на 5.000 метри квадратни во Реонски центар кои требаше да биде готов во првата година од мандатот, уште не е готов.

Градежни маркици наводно се бришеа, а Мицкоски се појави уште во 2022 година на почетокот на активностите за уредување на овој парк.

Нов парк на 5.000 метри квадратни ветија дека ќе подигнат и кај касарната „Гоце Делчев“. За ова немаат ниту проект.

Уште еден нов содржински парк на 5.000 метри квадратни требаше да биде подигнат во срцето на Ново Лисиче, со нови реквизити и содржини за сите возрасти на деца.

Нема ништо од тоа. Само неискосена и пожолтена трева го дели Реонски центар од Ново Лисиче“.

Ветија, додава таа, паметен систем за наводнување на тревниците меѓу зградите, а не можат да ги поправат ни постоечките системи за наводнување.

„Паркот Авионче требаше да прерасне во мал луна парк, а паркираните возила на патеките и во тревниците требаше да биде минато.

Нови паркови за миленици ветија во секој нов и во секој постоечки парк. Ниту еден не е направен во последните 4 години.

Дејан Митески и Тимчо Муцунски беа неспособни да ги одржуваат ни парковите подигнати од нивните претходници, а не да подигнат нови.

Аеродром важеше најзелената општина во Скопје до пред само 4 години.

Денес Аеродром е општина со најзапуштени паркови полни со отпадоци и паднати суви гранки на секој чекор“, оценува Кусакатска.

Праша, со кое лице Дејан Митески ќе бара втор мандат во Аеродром.

„Имаат ли господата од ДПМНЕ трошка срам?

Времето на Дејан Митески и ВМРО-ДПМНЕ во Аеродром истече“, подвлече Кусакатска.

Министерот за локална самоуправа, Златко Перински, заедно со вицепремиерот и министер за односи меѓу заедниците Иван Стоилковиќ и министерката за образование и наука Весна Јаневска учествуваше на денешната панел-дискусија „Ги градиме темелите на промените. За твоето време кое доаѓа“, организирана по повод една година од работата на Владата.

Министерството за локална самоуправа со години било ставено во сенка, без јасна улога и без вистинска поддршка, истакна Перински, но Владата одлучила да ја врати неговата суштинска мисија, тоа да биде мост помеѓу централната власт и општините и клучен двигател на рамномерниот регионален развој.

Перински посочи дека Министерството за локална самоуправа во изминатава една година посветено и со јасна визија пристапило кон анализа на затекнатите состојби на локално ниво, а притоа биле идентификувани сите пропусти и работеле на препознавање на потребите на граѓаните и општините. Како резултат на тоа, посочи Перински, Министерството реализираше и поддржа конкретни решенија кои директно веќе ги подобруваат условите за живот во локалните заедници од областа на транспортот, животната средина и енергетската ефикасност, до културата, спортот, образованието, туризмот и социјалната политика.

„Овие резултати се реализирани преку програмите за рамномерен регионален развој, за намалување на диспаритетите меѓу и во рамките на планските региони и за зголемување на регионалната конкурентност, како и преку потпрограмата за инфраструктурни проекти во општините. Реалност станува и дигитализацијата на општинските услуги, со поставени јасни патокази за полесен пристап до услуги и зголемена отчетност на локалните власти. Посебно значајно е тоа што, по повеќе од две децении, Министерството иницираше суштински измени на Законот за локална самоуправ со цел унапредување на директната демократија и транспарентноста. Поставуваме темели на промени што ќе обезбедат подобро функционирање на системот на локалната самоуправа. Целта е јасна, пофункционални општини и позадоволни граѓани“, заклучи Перински.