Mинистерот за надворешни работи, Никола Димитров, вчера оствари средба со Јосип Јуратовиќ и Мартин Розман, пратеници во германскиот Бундестаг од редовите на политичката партија СПД и со претставници од Фондацијата „Фридрих Еберт“.

Димитров изрази благодарност за активната и исклучително значајна поддршка на СР Германија во изминативе месеци во насока на постигнатиот напредок на нашиот пат кон ЕУ и НАТО. Притоа изрази задоволство од важната улога што германскиот Бундестаг ја има во овој процес. Информирајќи за текот на реформите и имплементацијата на постигнатиот Договор за решавање на билатералниот спор со соседна Грција, Димитров нагласи дека „зголемениот интерес и зачестените посети на официјални германски претставници се јасна порака за тоа каква Македонија нашиот најважен европски партнер поддржува и силно охрабрување за чекорите што мораме да ги изодиме во овој клучен период за нашата земја и нејзините граѓани.“

Германските пратеници Јуратовиќ и Розман го поздравија видливиот напредок на Македонија на планот на домашни реформи и во процесите на приближување кон ЕУ и НАТО, посебно акцентирајќи го постигнатиот Договор со Грција. Пратеникот Јуратовиќ потенцираше дека таа претставува „светла точка не само за двете земји туку и за целиот Балкан и Европа и јасен пример за тоа дека две демократии можат да дојдат до договор и за најкомплицирани прашања, единствено преку отворен дијалог и политика на компромис.“ Јуратовиќ оцени дека овој успех претставува и поттик за сите демократски сили во регионот и пошироко и дека официјален Берлин силно го поддржува и активно се залага за целосна имплементација на Договорот.

На средбата беше изразено заемно задоволство од одличната билатерална соработка меѓу Република Македонија и Сојузна Република Германија и позитивната динамика во комуникацијата со претставниците на германскиот Бундестаг, а беа разменети и мислења за актуелни прашања од поширок регионален карактер.