Македонија
Димовска: Жените кои активно учествуваат во политичкиот живот, често се изложени на различни форми на насилство
Денеска во рамки на проектот CHANGE се одржа Воведна сесија за справување со насилството врз жените во политиката со поддршка на Мисијата на ОБСЕ во Скопје и ОДИХР.
Учесници на настанот се претставници на ОБСЕ, ОДИХР, пратеници и претставници од службата на Собранието.
Генералната секретарка на Собранието, Марина Димовска имаше чест да ја отвори воведната сесија заедно со Сузан Пенкса, заменик шеф на Мисијата на ОБСЕ во Скопје, Јулија Нетесова, раководител на одделението за демократско владеење и родови прашања и Сања Николин, претставник на проектот CHANGE.
Во своето обраќање Димовска, ја истакна важноста од адресирање на оваа исклучително значајна тема, особено затоа што жените кои активно учествуваат во политичкиот живот, често се изложени на различни форми на насилство. Се соочуваат со закани, навреди и деградирање, особено во онлајн просторот, но и за време на јавни настапи. За жал насилството врз жените во политиката често пати поминува незабележано и несанкционирано, што секако дека влијае на нивната одлучност да продолжат со политичко ангажирање.
Димовска додаде дека како општество, имаме одговорност да создадеме услови во кои жените можат слободно и безбедно да учествуваат во политичкиот живот. Потребна ни е силна политичка волја за да ги заштитиме жените и да ги охрабриме да бидат активни учесници во нашето општество.
Насилството конкретно врз пратеничките во Собранието е сериозен проблем кој не само што го загрозува интегритетот на институцијата, туку и основните принципи на демократијата и равноправноста. Парламентите мора да бидат институции за пример и работно место каде што жените и мажите можат еднакво да ги извршуваат своите претставнички должности.
Со ратификацијата на Истанбулската конвенција во декември 2017 година, Собранието се обврза да превземе законодавни и други мерки заради обезбедување на правна, институционална и организациска рамка за превенција на насилството врз жените, заштита на жртвите на насилство, како и казнување на сторителите на насилство. Следствено на ова се направија многу законски измени, вклучувајќи и измени во Кривичниот закон.
Комисијата за еднакви можности на жените и мажите и Клубот на пратеничките во континуитет одржуваат настани за понатамошно унапредување на правата на жените.
Собранието и понатаму останува посветено да работи на оваа тема и да ја следи имплементацијата и преку своите механизми да врши надзор врз севкупното законодавство и политики за радово базирано насилство, во согласност со принципите на Истанбулската конвенција.
На крај, генералната секретарка на Собранието истакна дека справувањето со насилството врз жените во политиката не е само прашање на правата на жените, туку и на подобрување на демократските процеси и зајакнување на општеството во целина. Со заеднички напори можеме да создадеме услови во кои жените ќе можат слободно и безбедно да учествуваат во политичкиот живот. Жените во политиката се неопходни за создавање на политики кои ќе ги одразуваат потребите на сите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.

