Македонија
Димовски до Груби: Седнете со Џафери и гласајте сами за ДИК

Пратеникот од ВМРО-ДПМНЕ, Илија Димовски, му порача на претседателот на Комисијата за европски прашања, Артан Груби, дека Владата ставила европско знаменце на предлог-законот за измени на Изборниот законик, што е спротивно на деловникот. Димовски рече дека треба да се затвори расправата бидејќи, како што истакна, оваа комисија не е матично тело за расправа, туку Комисијата за избори и именување. Ако Џафери постапува согласно со деловникот, според Димовски, ќе треба да го врати законот до Владата и тие од почеток да го поднесат.
„Ако ги запре граѓаните полиција ззшто возеле побрзо од дозволеното, не смее никој да ги казни ако покажат европско знаменце. Младите можат да си купат часовник, цигари, што било со знаме од ЕУ и да не бидат казнети за ништо. Ваков пример оставате на граѓаните. Груби, вие не можете да отворите амандманска расправа, туку општа бидејќи ова не е матично тело”, рече пратеникот Илија Димовски обраќајќи му се на Артан Груби.
Димовски тврди дека законот се носи без консултации со опозицијата. Тој даде предлог да се укине Собранието, а да доаѓаат на работа само Груби и Џафери. Вториот предлог е да се намали кворумот за донесување на Изборниот законик и да се гласа со 42 пратеници затоа што мнозинството тешко собирало кворум за гласање.
„Седнете вие со Џафери и гласајте сами за ДИК. Отидете кај Џафери, напишете ги предлозите, отидете во пленарна и гласајте го. Потпишете се вие двапати, Џафери двапати и објавете во ‘Службен весник’, медиуми, каде сакате”, рече Димовски.
Груби отвора претрес за бришење на првиот амандман, а ВМРО-ДПМНЕ се буни дека прво треба да ја отвори расправата пред да се разгледуваат амандманите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Перински: Ветувањето на Владата влегува во завршна фаза и проектите го гледаат светлото на денот

На денешниот Саем-Отчет по повод „4 години работа за тебе“, дискутираше министерот за локална самоуправа Златко Перински, се осврна на работата на Владата и нејзината поддршката кон општините со цел да се мотивираат градоначалниците и општинската администрација за креирање на проекти согласно потребите на граѓаните.
-Оваа Влада даваше средства на сите локални самоуправи на база на проекти коишто ги добивме како инпут од самите локални самоуправи, сакавме да ги мотивираме градоначалниците, да ја мотивираме општинската администрација да креира проекти коишто ќе бидат издржани согласно потребите на граѓаните и врз основа на тоа да испорачаме средства од централниот буџет за истите да се реализираат, рече Перински.
Министерот посочи дека во првиот јавен повик има 288 проекти од кои веќе 137 се завршени, а од двата повика се изградени и реконструирани училишта, изградба на патна инфраструктура, како и изградба на градинки, и спортски објекти.
-Во првиот јавен повик имаме 288 проекти којшто се влезени во рамка на финансирање во вториот јавен повик веќе се склучени договори за 828 проекти коишто се ефектуираат на терен, од првиот јавен повик од оние 288 проекти, 137 се завршени, ветувањето на Владата влегува во завршна фаза и проектите го гледаат светлото на денот. Од првиот и од вториот јавен повик се изградија и реконструираа 55 училишта за само една година, имаме преку 702 проекти коишто се насочени кон подобрување или изградба на нова патна инфраструктура, имаме градинки, 9 градинки се реконструирани или се изградени, 36 спортски објекти, кога ќе видете дека од 288, 137 проекти се веќе завршени не може да не очекувате или не може да не бидете мотивиран да продолжите понатаму, нагласи Перински.
Македонија
Пратениците се одморија, од утре почнуваат со редовни активности во Собранието

Пратениците од утре официјално почнуваат со работа по годишниот одмор. Претседателот на Собранието, Африм Гаши за утре закажа неформална средба со собраниските известувачи, на која ќе информира за тековните активности во законодавниот дом, по редовната координација со координаторите на пратеничките групи. До петокот на собраниската веб-страна освен брифингот со новинарите, Собранието немаше закажано други активности за следната недела.
Одморот на пратениците беше прекинат на 16 август кога беше свикана итна седница за Предлог на законот за изменување и дополнување на Изборниот законик, по скратена постапка кој не помина поради немање на Бадентерово мнозинство. Претходно, на 13 август седница одржа и Комисијата за прашања на изборите и именувањата, која формира Комисија за селекција на кандидатите за претседател на Државната комисија за спречување на корупцијата. Вообичаено одморот на пратениците започнува по Националниот празник Илинден.
Претседателот на Собранието Гаши на 9 август ги распиша локалните избори за 19 октомври. Се очекува Собранието да одржува пленарни седници и седници на комисиите до пред почетокот на кампањата за локалните избори на 29 септември.
На последниот брифинг со новинарите претседателот на Собранието потсети дека законодавниот дом е во постојано заседание и дека доколку е потребно пратениците ќе бидат повикани за седници.
Македонија
Османи: Овие избори се референдум за достоинството и еднаквоста на Албанците

Кандидатот за градоначалник на Чаир, Бујар Османи, остро ја критикуваше, како што рече, системската политика на новата влада насочена кон маргинализација и потиснување на Албанците. Во своето обраќање, тој порача дека не станува збор за изолирани случаи, туку за „координиран проект на елиминација“.
„Владата на ВМРО и ЗНАМ, предводена од Христијан Мицкоски, во полн интензитет продолжува да ја спроведува политиката која треба да ги отстрани Албанците од општествените текови, враќајќи ги на нивните периферни позиции од пред Рамковниот договор“, изјави Османи.
Тој го обвини премиерот Мицкоски за „длабока нетолеранција кон Албанците“, која, според него, се манифестира и на лично и на институционално ниво.
„Оваа политика на Мицкоски неретко ја гледаме како израз на неговиот личен карактер: ‘ќе ги вадиме за уши’, ‘ќе им го покажеме местото’, но и во неговата професионална, или службена поставеност на отстранување на Албанците од концентричните кругови на неговото најтесно окружување“, додаде Османи.
Како „особено понижување за Албанците“, тој го наведе и доделувањето на ресорот за Охридскиот рамковен договор на, како што го нарече, „Српскиот свет во земјава“.
„Како поинаку да се толкува доделувањето на клучната Владина позиција за спроведување, негување и унапредување на вредностите и придобивките од Охридскиот Рамковен договор директно во рацете на Српскиот свет во земјава“, рече Османи.
Тој предупреди и на други чекори кои, според него, ја потврдуваат оваа политика – укинувањето на Балансерот, маргинализацијата на Бадентеровиот механизам и исклучувањето на Албанците од политиките на Централната банка и финансиските институции.
„Овие механизми – Бадентер, Балансер, јазична застапеност итн., – претставуваат механизми за заштита од мајоризација, и токму тие се најголемата пречка за спроведувањето на крајната радикална националистичка политика на Мицкоски, ВМРО и ЗНАМ кон Албанците“, нагласи Османи.
Османи ја критикуваше и улогата на институциите, како Уставниот суд, ДИК и Централната банка, за кои рече дека се „прокси играчи“ на премиерот. Според него, особено „бедна“ е позицијата на, како што ги нарече, остатоците од ВЛЕН во Владата.
„Тие и самите се понижени и отстранети од масата кога Македонците носат одлуки, но уште потрагично, потоа мора да ја играат улогата на поданици – да ги спроведуваат, правдаат и да им даваат легитимитет на овие одлуки“, изјави Османи.
Тој порача дека претстојните избори се историски за Албанците.
„Ова не е повеќе обична политичка битка. Ова е историски миг во кој Албанците мора да се изјаснат – дали ќе прифатат повторно да бидат неми набљудувачи додека ги бришат од системот? Дали ќе дозволат повторно да бидат ‘толерирани’ наместо вреднувани?“, праша Османи.
Во своето обраќање, тој нагласи дека Албанците нема да се откажат од европската перспектива на државата.
„Албанците не сакаат да се откажат од европската иднина на оваа земја; не сакаат немо да гледаат како земјава се сели во прегратките на српскиот свет и кинеско – руските прегратки, туку сакаме да ја видиме како современа, прозападна земја, која е полноправна членка на НАТО и ЕУ“, изјави Османи.
Тој заврши со порака дека за сите кои не разбираат зошто овие избори се историски за Албанците – „наскоро ќе им се разјасни“.