Македонија
Димовски: За Македонци во Уставот на Бугарија никој не спомнува ни збор, а ние очите си ги вадиме за Бугарите во нашиот Устав

Илија Димовски од ВМРО-ДПМНЕ преку статус на социјалните мрежи напиша дека денеска во Бугарија е започната процедура за измени на Уставот на Република Бугарија.
„За Македонци во Уставот на Бугарија никој не спомна ни збор, а ние очите си ги вадиме меѓу себе за Бугари во нашиот Устав“, вели Димовски.
Според него, да бевме сериозна држава која има некаква дипломатија или сериозен Претседател како што вели, темата за внесување на Бугарите во Уставот на Република Македонија ќе беше заедно со реципрочно барање за внесување на Македонците во Уставот на Република Бугарија.
Додава дека никој од власта во Македонија не побарал реципроцитет, а имаме, како што појаснува, стотици аргументи кои се и правни, цивилизациски, врз база на меѓународните повелби, европски резолуции, добиени судски случаи итн.
Таквата позиција, според членот на ВМРО-ДПМНЕ, ќе беше разбирлива, полна со аргументи и доволно прифатлива за меѓународната заедница како патека за разрешување на недоразбирањата.
Оценува дека лесно ќе можевме да дојдеме до состојба во која меѓународната заедница ќе ги видеше двојните стандарди на соседната држава и ќе го олабавеше притисокот за промена на Уставот на Македонија.
„Или двете држави ќе пристапевме кон надминување на недоразбирањата или немаше да имаме состојба во која недоволно зрели политичари со напади, прогон и злоупотреби сакаат да ја покријат својата неспособност. Но, ние имаме дипломатија, Влада и Претседател чија цел е да внесат кавга дома и по цена на губење на виталните и стратешки интереси на македонскиот народ и на Република Македонија.
Ние, како држава, играме фудбал цели 90 минути во нашите 16 метри, природно е да знаеме дека ќе примиме гол.
Нам ни треба излез од наша половина на стадионот.
Но, со ваква Влада и Претседател ние всушност играме со тим кој е или повреден, или престарен, или нема кондиција, или нема техника“, истакнува Димовски.
Според него, како што пишува во фејсбук статусот, уставните измени кои се предлагаат во Македонија се плод на слабата власт, а не на противничкиот фудбалски тим.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
90 отсто од дишните органи на 29-годишниот Карадакоски биле изгорени од пламенот што го вдишал, утврдиле лекарите во Литванија

Директна причина за смртта на 29-годишниот Александар Карадакоски, кој утрово почина во Литванија, се изгореници на дишното стебло, извести попладнево Небојша Настов, директор на Клиниката за хируршки болести „Св. Наум Охридски“, каде што Карадакоски бил згрижен пред за отпатува во Литванија. Во болницата бил примен околу 6 часот на 16 март. Во текот на денот му се влошила состојбата, па во попладневните часови бил ставен на вештачко дишење, а истовремено му ги лекувале и изгорениците.
„Вкупната површина на изгорениците е некаде околу 36 %, кои претежно се наоѓаа во пределот на главата, вратот и горните екстремитети со длабочина од втор и трет степен, што само за себе кажува за интензитетот на пламенот што го има зафатено. Поради делот од пламенот и чадот што ги вдишал, доаѓа до оштетување на внатрешните дишни органи, што е потврдено и од страна на колегите од Литванија во разговор со нашите анестезиолози при брифирањето за здравствената состојба на пациентите, што морам да кажам дека се одвиваше редовно, секој ден или на секои два дена. Утврдено е со бронхоскопско испитување дека е оштетен голем дел од дишното стебло и како последица на тоа доаѓа до влошување на состојбата, која на крајот резултирала со подлегнување на повредите на 29-годишниот Александар Карадакоски“, рече директорот Настов.
Карадакоски останал во „Св. Наум Охридски“ речиси 24 часа пред да биде транспортиран во Литванија со медицински санитетски авион.
Министерот за здравство Арбен Таравари рече дека Карадакоски бил во најкритична состојба од сите 193 лица повредени во пожарот во дискотеката.
„Тој беше најтешкиот пациент. Му откажа функцијата на бубрезите на 1 април, беше ставен на дијализа, практично имаше рани на 36 % од телото од втор и трет степен, што отвора простор за инфекции и тоа е таа компликација плус дишните патишта, изгореници на дишните патишта околу 90 %“, рече министерот Таравари.
Министерството за надворешни работи веќе го организира враќањето на телото на Карадакоски. Министерот Таравари рече дека обдукцијата ќе ја направи Судска медицина во Скопје, а сите трошоци ќе бидат покриени.
Карадакоски е еден од 116 пациенти испратени на лекување во странство по пожарот во дискотеката во Кочани. Денес, од лекување во странство треба да пристигнат уште шестмина пациенти, по двајца од Бугарија, Шпанија и Унгарија, па во странските болници ќе останат 69 пациенти. Од нив тројца се во критична состојба.
Во болниците во Скопје во овој момент се лекуваат 14 пациенти, а за петмина веќе е договорен испис.
Македонија
Филипче: Велеа дека лидерска е губење време, па обвинуваат за моноетничност, ги повикувам повторно

Јас повикав на средба со сите претседатели на политичките партии и, да ве потсетам, претседател на една албанска партија рече дека тоа би било губење време (се мисли на Таравари), а сега нè обвинуваат за некаква моноетничка средба. Ова го истакна претседателот на СДСМ, Венко Филипче, во одговор на новинарско прашање поврзано со обвинувањата од албанскиот блок на политичките партии дека вчерашната средба во Владата со премиерот Христијан Мицкоски е план за моноетничка соработка.
„Јас на тој состанок го претставував СДСМ, а премиерот Христијан Мицкоски ВМРО-ДПМНЕ, и ние се состанавме како лидери на двете најголеми партии во македонскиот блок. Притоа премиерот Мицкоски беше првиот што без забелешка и единствен што ја прифати поканата за средба“, истакна денеска Филипче од Струмица.
Тој уште еднаш упати јавен повик до сите политички партии за организирање лидерска средба.
„Апсолутно, сметам дека треба да продолжиме во следниот период во насока на организација на средба на лидерите на сите поголеми политички партии. Ова нека биде уште еден мој повик до сите партии бидејќи јас тука не гледам никаква потреба да се делиме на македонски или албански блок кога станува збор за интересите на државата“, потенцира претседателот на СДСМ.
Филипче истакна дека никој нема право да го обвинува Социјалдемократскиот сојуз на Македонија за етнички или националистички политики или пристап имајќи предвид дека во извршниот одбор на СДСМ има Албанец, Македонка муслиманка, а во следниот период ќе има и Ромка.
Претседателот на СДСМ повтори дека вчерашната средба со премиерот била конструктивна и на неа било договорено формирање заеднички тела или групи што ќе работат на подготовката на законите од реформската агенда, со фокус на правосудството, енергетиката и стратешките проекти во здравството, а кои треба да стигнат во Собранието.
Македонија
Антикорупциската комисија jа запре постапката за имотниот лист на Филипче, не криел податоци

Антикорупциската комисија jа запре постапката за имотниот анкетен лист на пратеникот и претседател на СДСМ, Венко Филипче.
По проверките во Катастарот, Централниот регистар, МВР, УЈП и повеќе банки, утврдиле дека анкетниот лист на Филипче бил целосен и нема прикривање податоци за имот.
Антикорупциската комисија лани ја отвори постапката за проверка на имотниот лист на опозицискиот лидер. Претходно, владеачката партија ВМРО-ДПМНЕ обвинуваше дека имотниот лист на претседателот на СДСМ бил поголем и тој имал повеќе станови сега како пратеник отколку претходно кога беше министер за здравство. Становите не ги пријавил кога требало и најавија дека ќе поднесат претставка до антикорупциската комисија.