Македонија
Димовски: Преку Законот за стратешки инвестиции, СДСМ сака да даде предност на свои компании

Пратеникот од ВМРО-ДПМНЕ Илија Димовски обвини дека СДСМ преку Законот за стратешки инвестиции кој го донесоа на вчерашната седница сакаат во изборен период од политички орган составен од политичари со класични политички одлуки да даваат бенефиции на веќе очигледно договорени зделки, без цврсти критериуми со однапред познати фирми и компании.
Димовски вели дека законот бил предложен по скратена постапка, со европско знаменце, а притоа направен бил фалсификат, бидејќи регулативата на која се повикува не тангира повеќе од 90 проценти од содржината на овој закон.
Според него, Владата на СДСМ на овој начин додава нови 12 области кои воопшто не се предмет на наведената регулатива, со што се прави поширока дефиниција за тоа што е всушност стратешка инвестиција.
„Според дефинициите во законот, со овој закон дури и инвестиции коишто се однесуваат на подигање на плантажи со марихуана може да добијат статус на стратешки инвестиции. Овој закон предвидува и формирање на Комисија за стратешки инвестициони проекти која ќе ја сочинуваат премиерот и неколку министри, како и генералниот секретар на Владата како постојани членови, како и министри и градоначалниоци во зависност од областа и локацијата на веќе замислените инвестициски проекти на за нив омилени компании. Влада со овој закон си остава простор за потенцијални злоупотреби, криминал и корупција, давајќи им бенефиции и повластен статус на очигледно претходно одбрани компании“, рече Димовски.
Спроведувањето на овој закон, вели Димовски, за жал, нема да подлежи на никаква стручна, експертска или каква било друга надворешна контрола.
„Она што е значајно да знаете е дека во самиот закон се предвидува дека тој ќе стапи во сила веднаш по неговото донесување, што не е пракса за другите закони во Собранието, заради тоа со објавување во ‘Службен весник’ секогаш се остава простор од најмалку 8 дена за стапување во сила на законите. Втората сомнителна работа е тоа што со овој закон Владата предложи, а Собранието ја задолжи во рок од 7 дена таа да ги подготви подзаконските акти, што исто така е лудо, знаејќи колку е бавна и неработлива оваа Влада, освен ако сето тоа не е подготвено по нарачка на одредени компании пред донесувањето на овој закон“, рече Димовски.
Пратеникот додаде дека СДСМ дури и на одење се обидува на криминален начин да даде бенефиции за нив веќе познати компании.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја делови од Кисела Вода

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, дел од корисниците од ул. 1523, објектите на фирмите Пастор, Орнамакс и други во нивна близина, корисниците од бул. Борис Трајковски од бр. 77 до бр. 85, како и корисниците лоцирани помеѓу објектите на фирмите Циле Инжињеринг и Интеграф. (општина Кисела Вода)
Македонија
Шукова: Време е за резултати, уреден Бутел, нови паркови, подобар превоз и вода за сите

Кандидатката за градоначалник на Град Скопје од СДСМ, Каја Шукова, вчера одржа митинг во Бутел, каде пред жителите порача дека Скопје мора да се гради со дела, а не со празни зборови.
„Вечерва не сум тука само како кандидатка за градоначалничка на Скопје. Тука сум, пред сè, како човек што верува во овој град и во луѓето што го прават Бутел дом,“ изјави Шукова.
Таа се осврна на реалните проблеми со кои се соочува општината запуштеното корито на Серава, недоволната инфраструктура, недостигот на јавен превоз и дотраената водоводна мрежа и истакна дека решенијата веќе се подготвени.
„Серава ќе стане место на кое ќе се гордееме уредено корито, пешачки и велосипедски патеки, зелена зона за сите. Новите паркови и 10.000 засадени дрвја ќе го вратат сјајот што Скопје го имаше пред децении,“ нагласи таа.
Посебен акцент стави и на водоснабдувањето и инфраструктурата:
„Денес, 60 проценти од питката вода се губи во системот. Време е за модернизација и стабилно снабдување со вода за секој дом. Новите мостови, клучки и булевари ќе го поврзат Бутел со целиот град и ќе овозможат безбедно и побрзо движење,“ рече Шукова.
Таа потсети дека во изминатите години градот беше заложник на неработење и популизам:
„Четири години ВМРО-ДПМНЕ ги запоставуваше општините. Време е за резултати, а не за слики и празни зборови. Половина од нашите проекти може веднаш да се реализираат,“ додаде таа.
Во својот говор, Шукова повика на единство и одговорност:
„Бутел не смее да биде изолиран. Бутел е почетна точка на модерното Скопје место каде што се инвестира, се гради и се слуша секој граѓанин.“
Македонија
Претежно облачно со врнежи од дожд, повремено пообилни

Времето денеска ќе биде претежно облачно со повремени врнежи од дожд кои ќе бидат пообилни во западните делови, каде се очекува локално да наврнат и над 25 l/m²дожд. Ќе дува слаб до умерен ветер од југоисточен правец.
Минималната температура ќе биде во интервал од 7 до 12, а максималната ќе достигне од 11 до 15 степени.
Во Скопје, претежно облачно со повремени врнежи од дожд, повремено пообилни. Ќе дува слаб до умерен ветер од југоисточен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Во сабота времето ќе биде променливо облачно со повремени локални врнежи од дожд со послаб интензитет. Потоа следува претежно стабилно време со потпросечни температури за овој период од годината.