Македонија
Директорите на училиштата до 10 септември треба да достават барања за настава со физичко присуство

Министерката за образование Мила Царовска на денешната прес-конференција информираше дека на владина седница е усвоен планот за започнување на учебната 2020/2021 година, под посебни услови и протоколи. Таа ги повика општините и директорите на училиштата до 10 септември да поднесат барања во кои ќе ги образложат условите во нивните училишта за изведување настава со физичко присуство.
„Овој план ги обезбедува сите чекори за намалување на ризиците од ширење на вирусот Ковид-19. Затоа ги ги повикувам општините и училиштата да ги информираат родителите и учениците за своите капацитети и да поднесат барање до владината комисија за започнување на наставата со физичко присуство. Нудиме комбиниран план за настава на далечина и со физичко присуство, а за успешно реализирање се работи на онлајн платформа која ќе ја презентираме наскоро. Секаде каде што просторните услови дозволуваат ќе има настава со физичко присуство, а владата за таа цел формираше комисија која ќе ја следи состојбата во училиштата“, рече Царовска.
Таа информираше дека најважно е децата од прво до трето одделение да ја следат наставата и ги повика нивните родители и старатели да се изјаснат писмено, а училиштата за таа цел да ги искористат сите капацитети што им стојат на располагање за да може поголем број ученици да следат настава со професор.
„Од прво до трето е важно да ја следат внаставата во училиштата со сите заштитни мерки, но и во согласност со родителите и старателите. Оние деца кои ќе следат настава на далечина, односно нема да го пуштат детето во училиште, треба да потпишат писмена изјава. Во рамките на одреден наставен предмет, професорите кои држат настава физички треба да ги вклучат и оние кои следат од компјутер, потоа да го снимат реализираниот наставен час и да го испратат на учениците кои не следеле. Исто така, професорот е должен да одржи посебен час само за учениците кои следат настава на далечина“, рече Царовска.
„Во училница е дозволено да има до 20 ученици, распоредени на 1,5 метар растојание, со задолжителна дезинфекција на раце и носење заштитни маски. Часот ќе трае 30 минути. Во средните училшта, часот ќе трае 35 минути, 5 минути одмор ќе има по секој час, а големиот одмор ќе биде 15 минути по третиот час. Наставниците се должни да држат настава со физичко присуство, со исклучок само оние кои имаат ретки или хронични болести, кои ќе треба да упатат барање до директорот да држат настава онлајн. Учениците кои не можат да следат настава со физичко присуство ќе имаат пристап до печатени материјали, кои ќе им се доставуваат на родителите и учениците во строго контролирани услови и протоколи“, додаде министерката.
Владиниот план, според Царовска, овозможува инклузивно образование и физичко присуство и за ученици со попреченост на кои ќе им се обезбеди присуство со дефектолог, педагог, но родителите ќе треба да дадат согласнот дали ќе одат во училиште или ќе учат онлајн. Децата со ретки и хронични болести ќе следат настава исклучиво од дома.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.