„Сите знаеме дека опоравувањето на економијата е најважната работа која влијае на животниот стандард, но за жал, сведоци сме на фактот дека крвната слика на македонската економија во моментот кога оваа Влада стапи на должност, беше застрашувачка. Се соочивме со недостиг на пари за плати, пензии, субвенции итн., кои ги имаше само на збор, без планирани, а уште помалку обезбедени средства за исплата“, истакна пратеничката од ВМРО-ДПМНЕ Лидија Петкоска на денешната собраниска Комисија за финансирање и буџет.

Таа продолжи и додаде:

„Токму од овие причини, со самото превземање на власта, започна процесот на стабилизирање на јавните финансии, со усвојувањето на ребалансот за 2024 година кој ја наметна потребата од буквално воена дисциплина при трошењето на народните пари“, рече Петкоска.

Петкоска истакна дека во буџетот за 2025 година предвидени се повеќе средства за промоција и поддршка на туризмот.

„Во оваа насока, а имајќи предвид дека во изминатите денови се кажаа најголем дел од бројките, главните цели на предлог буџетот и се е предвидено со него за следната 2025 година, јас ќе се фокусирам само на делот којшто се однесува на растот и развојот на македонскиот туризам. Сакам да ја информирам јавноста дека во буџетот за 2025 година се предвидени 123 милиони 619 илјади денари за агенцијата за промоција и поддршка на туризмот, што значи дека туризмот добива 21 милион 262 илјади денари повеќе во однос на 2024 година или 350 илјади евра повеќе“, посочи таа.

Петкоска заклучи дека зголемувањето на средствата е охрабрувачки правец кој е во интерес на целокупниот македонски туризам.

Со новиот буџет на владата планирани се 54 милиони приходи од такси, глоби и судски административни такси. Значи тоа се 11 милиони евра плус, од тоа што се планирало во буџетот во 2004 година. Дали со ова се планира наплата на повеќе глоби или се планира зголемување на некои административни такси или некои други такси од оние што ги плаќаат граѓаните и фирмите, власта треба да им каже на граѓаните, што да очекуваат во наредната година, рече пратеникот на СДСМ, Јован Митрески на Комисијата за финансирање на буџет.

– Во однос на буџетот за 2025 година, имам две прашања. Прво, контото 741 трансфери од други нивоа на власта. Во претходниот буџет, контото е во минус, затоа што се врши поврат на средствата кон други нивоа на власта. Овој пат износот е плус и некаде вредносната разлика од минатиот и овој буџет е 35 милијарди денари. Ова, значително вредносно го зголемува буџетот и значително со тоа се планираат и трошоците.

Друго, контото 722-глоби судски и административни такси, каде имаме плус 673 милиони денари или вкупно 3.3 милијарди денари, или 54 милиони евра се планира да се соберат од судски глоби и административни такси. Значи 11 милиони евра плус од тоа што се планирало со буџетот од 2024. Зошто се планирани 54 милиони евра за приходи од такси, глоби и судски административни такси и дали се планира наплата на повеќе глоби или се планира пак зголемување на некој административни такси или некој други такси од оние што ги плаќаат фирмите и граѓаните?, рече Митревски.

Митревски, зборуваше и за Законот за провизијата на банките, за која рече дека граѓаните плаќаат по 250 денари провизии за едно ливче или извештај кој треба да ги добијат од банка и потенцираше дека СДСМ како пратеничка група ќе поднесе и Закон во врска со провизиите на банките.

– Буџетот на владата за 2025 година нема никаква препознатлива ниту суштинска политика, нема ни економски мерки или предлози, од аспект на понуда, нема ништо ново, туку се е продолжение од она што било претходно, а заради зголемување на дефицитот, јавниот долг носи нови ризици и е фактор на макроекономската дестабилизација, а економијата ќе се движи по инерција. Со ваква економија и вака лошо скроен буџет, каде се исклучуваат сите релевантни фактори, со прекршување на основите договорени фискални правила, буџетот не претставува решение и помош туку извор на проблеми кои ќе треба да се решаваат, рече Митрески.

Пратеникот Јане Мицевски од редовите на ВМРО-ДПМНЕ во своето излагање на денешната расправа за Предлог-буџетот за 2025 година изрази критики кон СДС околу нивната политика во однос на истиот. Мицевски истакна дека не само што нивната политика е неискрена, туку е и политички нерационална. Според него СДС, кои сега го критикуваат Предлог-буџетот, во последните 7 години не реализирале ништо конструктивно.

„Малку треба да се засрамат сите колеги пратеници од СДСМ кои говорат за Буџетот кој го поднесовме сега. Зошто? Затоа што ако имавте искрени намери да нешто се смени, ќе го направевте тоа изминативе 7 години. Имавте 7 години да реализирате се што сега зборувате, наместо да крадете. Ако имате малку џентлменска и рационална политика во вас, свесни ќе бевте дека треба да бидете конструктивни“, истакна Мицевски.

Мицевски додаде дека СДС доколку беа сигурни во своите аргументи, би ги образложиле за истите да имаат реална тежина. Според Мицевски, обвиненијата од страна на СДС се само дел од „голата политика“ која не ги има реалните факти на своја страна.

„Ако малку, ама барем малку бевте сигурни во она што го говорите дека буџетот за 2025 е неразвоен, недомаќински и слично, ќе оставевте да се изгласа, а подоцна ако бевте во право со аргументите ќе имавте тежина со тие критики. Вие сега немате никаква тежина и ви се смеат сите дека водите само гола политика. Но, за жал, вие знаете дека ништо од тоа што го говорите не е вистина. Вие знаете дека ова е сè обратното од тоа што вие сте правеле, а вие освен грабеж, не правевте ништо друго“, кажа Мицевски.

Мицевски истакна дека предлог-буџетот се бори со сите негативни феномени што ги создаде претходната власт како сивата економија, криминалот и застојот во економскиот раст. Мицевски исто така истакна дека овој буџет е дизајниран да биде основа за економски напредок, а не за пад и пропаст.

„Овој буџет се бори со сето она што вие го правевте и затоа не ви се допаѓа. Се бори со сива економија, се бори со криминал, се бори за напредок и повисок економски раст, наместо вашата пропаст којашто ни ја нудевте и прикажавте изминатите 7 години“, рече Мицевски.

Според Мицевски, СДС се чувствуваат загрозени од новата политичка реалност, ВМРО-ДПМНЕ ќе биде носител на реформите, а СДС ќе мора да се соочи со последиците од своето владеење.

„Сега не е така и затоа сте толку исплашени. Затоа што знаете дека новиот буџет е функционален, затоа што знаете дека е развоен и затоа што знаете дека ќе биде основа за да ве фрли на политичкото буниште во следната декада. Затоа што знаете дека долги години ќе бидете опозиција, затоа што сега некој ги прави работите домаќински и различно од вас“, заклучи Мицевски.