Директорот на Бирото за јавна безбедност при МВР, Александар Јанев, денеска ја отвори работилницата на Интерпол за сребрена потерница, која се одржува на 2 и 3 април 2025 година во Скопје, на која учествуваат 60-ина јавни обвинители, полициски службеници и претставници од финансиски институции надлежни за враќање на криминално стекнат имот, од европските држави и од САД.

Работилницата е фокусирана на дискусија за имплементација на новата уникатна алатка на Интерпол преку која на државите членки им се овозможува поуспешна борба против организираниот и сериозен криминал и зајакната меѓународна полициска соработка преку упатување барања и размена на информации за лоцирање, идентификување и добивање податоци за криминално стекнат имот во странство.

Како дел од експертската работна група на Интерпол за сребрена потерница меѓу 32 држави од светот, како и дел од пилот-проектот за сребрена потерница меѓу 51 држава од светот, нашата држава е единствената од регионот на Западен Балкан, која дава активен придонес во пилот-фазата за распишување на сребрени потерници, со воспоставена тесна координација на национално ниво помеѓу сите надлежни служби за спроведување на законот. Процесот за враќање на криминално стекнатиот имот е од особена важност во борбата против криминалот и корупцијата, придонесува кон разбивање на криминалните мрежи и зацврстување на довербата кај граѓаните. Преку враќање на криминално стекнатиот имот се удира директно во главниот двигател на криминалната активност – стекнувањето профит и значителната економска заднина, која е од суштинско значење за функционирањето на криминалната мрежа, а од друга страна, се отвара можност за генерирање финансиски средства за понатамошен развој и јакнење на правниот систем во државите.