Македонија
Директорот на Царинската управа на регионална конференција за напредокот на реформите за забрзана интеграција во единствениот пазар на ЕУ

Директорот на Царинска управа учествува на конференција на високо ниво „Создади, интегрирај, овозможи раст“, што се одржува во Бечичи.
На конференцијата ЦЕФТА страните информираат за проектите коишто се дел од Планот за раст, но и за севкупните политики коишто ги преземаат Царинските управи во областа на олеснување на трговијата, а како дел од реформскиот процес за забрзана интеграција во ЕУ.
Целта на конференцијата е презентација на резултатите, споделувања на искуства во имплементација на проектите што ги спроведуваат институциите.
Посебно осврт се даде на Планот за раст во рамки на којшто Царинската управа предвидува понатамошна дигитализација на царинското работење и усогласување со системите во ЕУ. Во рамки на Планот за раст предвидена е имплементација на нов компјутеризиран транзитен систем – фаза 6, нов автоматизиран извозен систем, како и нов систем за контрола на увозот. Целта е создавање на целосно дигитално царинско работење во секој сегмент и поголема сигурност на стоките што влегуваат и излегуваат од државата.
Во рамки на конференцијата се одржа и завршниот состанок на Управувачкиот комитет за имплементација на проектите „Поддршка за регионалната економска интеграција“ и „ЕУ за бизнисот: поттикнување на заеднички регионален пазар преку квалитетна инфраструктура и е-трговија“ финансиран од ЕУ и ГИЗ. На состанокот беа презентирани резултатите реализирани во рамките на проектите за поддршка на е-трговијата, овластен економски оператор и управување со ризик, како и поддршката на ЦЕФТА структурите во нивните напори за понатамошно продлабочување на регионалната економска интеграција и усогласување со законодавството на ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
1570 сообраќајни прекршоци минатиот викенд, 758 за брзо возење

Изминатиов викенд полициските службеници од сите сектори за внатрешни работи, постапувајќи во делот на контролите на сообраќајот на патиштата низ земјава вкупно издадоа 1570 платни налози за сторени сообраќајни прекршоци повеќето по основ на Законот за безбедност на сообраќајот на патиштата, извести МВР.
Притоа, заради непрописно паркирање издадени биле 216 платни налози, за возење со брзина поголема од дозволената 758 санкции, а пак по основ на непоседување возачка дозвола 141 лице било отстрането од сообраќајот.
Исто така, евидентирани се 62 прекршоци за неносење сигурносен појас, изречени се 31 санкција за возачите на мотоцикл за управување без заштитна кацига, 27 мерки се изречени за користење на мобилен телефон при возење, а осум санкции за возачи кои минале на црвено светло, додека пак 61 возач е отстранет од сообраќај заради недозволено количество алкохол во крвта.
По основ пак на Законот за возила во посочениот период од сообраќај се исклучени 39 возила од кои 11 поради техничка неисправност, а 28 заради тоа што биле нерегистрирани, соопшти МВР и додава дека сообраќајните контроли продолжуваат и во наредните денови.
Македонија
Двајца браќа обвинети за убиство и за обид за убиство на подмолен начин

По спроведена истражна постапка, јавен обвинител од Основното јавно обвинителство Скопје денеска поднесе Обвинителен акт против две лица кои како соизвршители се товарат дека сториле едно кривично дело – Убиство од член 123 став 2 точка 1 и уште едно кривично дело – Убиство во обид предвиден со член 19 од Кривичниот законик.
Во текот на истрагата се обезбедени докази кои потврдуваат дека на 01.11.2024 година во Арачиново двајцата браќа на возраст од 23 и 31 година со умисла и на подмолен начин лишиле од живот едно лице и се обиделе да лишат од живот уште едно. Со двајцата оштетени – татко и син обвинетите се договориле да се најдат и да разговараат за наводен долг од 7.000 евра. Со автомобил пристигнале на договорената локација, но по краток разговор, едниот од обвинетите извадил огнено оружје – пиштол и започнал да пука кон жртвите. Од нанесените огнострелни повреди оштетениот татко починал, а синот се здобил со тешки телесни поврeди.
Јавниот обвинител до Основниот кривичен суд Скопје достави и предлог за продолжување на претходно определената мерка притвор за двајцата обвинети, бидејќи се уште постојат законските основи за најстрога мерка за обезбедување.
Македонија
Филипче ја следи политиката на Заев, кој со една раката на срцето се колнеше во македонската жичка, а со другата ја распродаваше, велат од ВМРО-ДПМНЕ

Венко Филипче се гордее со неговиот претходник, Зоран Заев и учи од него. Тој призна дека не сака да се одвои од неговата сенка и дека и народот треба да учи од неговото искуство и политики спроведени во минатото, велат од ВМРО-ДПМНЕ.
„Неговите политики спроведени во минатото од Заев, покрај криминал и корупција се предавството на националните интереси. Зоран Заев е човек кој со едната рака на срце се колнеше во македонската жица и тврдеше дека си ја сака земјата, додека со другата ја распродаваше. Откако со Бугарија влезе во процес на преговори и без око да му трепне, Заев прифати се што Бугарите од него побараа. Сега, таа попустлива политика на Зоран Заев спрема Бугарија, до најмал милиметар ја следи и неговиот наследник во СДС, Венко Филипче. Наместо државничка политика за заштита на националните интереси, Филипче инсистира на попустлива и политика на предавство на националните интереси“, според партијата на власт.
Од оваа партија оценуваат дека политиката на Филипче и СДС е предавничка.
„Пред некој ден потврди и Бујар Османи, кој призна дека со дозвола на СДС, со Бугарија преговарал за етнички прашања.
Со вакви погубни и предавнички политики и послушнички и поданички однос кон Заев, не е ни чудно што на последните анкети на јавното мислење, половина од граѓаните Филипче не го препознаваат за лидер на опозицијата“, додаваат од ВМРО-ДПМНЕ.
Со неговите потези, како што велат, Филипче само потврдува дека СДС продолжува да биде синоним за неспособност, криминал и предавства.