Македонија
Дијабетичарите незадоволни: Буџетот не може да ги покрие потребите од инсулин, бараме вклучување во дефинирање на тендерот

Сојузот на здруженијата на лицата со дијабетес на Северна Македонија (СЗДСМ), во името на 23 локални организации на лица со дијабетес и во името на над 130.000 лица со дијабетес во државата, изрази огромно незадоволство од усвоениот буџет во делот за програмата за инсулинска терапија.
Од тука велат дека сумата од 860 милиони денари е оставена иста како и претходната година, во 2025 очекуваат распишување нов тендер за набавка на инсулинска терапија за периодот 2025 – 2027, добиле и ветувања и од министерот за здравство, Таравари, за зголемување на опфатот на бројот на лица со дијабетес со модерни помагала (CGM-сензори и инсулински пумпи), а кои се соочуваат со сериозни здравствени компликации од оваа хронична болест.
„Со ваков буџет нема да може да се покријат и досегашните потреби од инсулин и терапија за лицата со дијабетес, да не зборуваме за помагала што веќе се достапни во земјите околу нас – Босна и Херцеговина, Косово и Србија. Во согласност со искуството од претходните години буџетот се зголемувал од година на година, а сега е оставен ист како од претходната година, во година кога знаеме дека ќе требаат поголеми средства. Како Сојуз семе загрижени дека, поради недостиг на буџет, ќе се намали квалитетот на инсулин, како и терапијата за лицата со дијабетес, што ќе предизвика трагични последици врз здравјето и животот на 8 проценти од населението (а претпоставките од лекарскиот кадар се дека има недијагностицирани уште минимум 2-3 проценти). Трендот на појава на дијабетесот во нашата држава е нагорен и, за жал, не гледаме дека Владата има соодветен одговор за оваа популација да има најсовремена терапија и помагала за живот“, велат од Сојузот во писмо адресирано до Владата и Министерството за здравство.
Апелираат до сите инволвирани страни при проекцијата на новиот тендер да ги следат нивните потреби и очекувања и да го запазат континуитетот во подобрувањето на третманот на пациентите. Бараат активно да бидат вклучени во сите чекори при дефинирањето на новиот тендер – нивни претставници да бидат дел на средбите и работата на Националната комисија за дијабтес.
Во спротивно, како што најавија, Сојузот и локалните здруженија ќе ги организираат сите над 130.000 лица со дијабетес и членовите на нивните семејства за активно покажување на нашиот револт пред здравствените и владините институции во земјата.
Дополнително, ќе ги известат сите меѓународни здравствени институции на европско и светско ниво за третманот на лицата со дијабетес во Македонија, како и за необезбедувањето предуслови за задржување и зголемување на потребниот квалитет на терапија и помагала за лицата со дијабетес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНАМ: Максим Димитриевски кандидат за градоначалник за Општина Куманово, Мирослав Лабудовиќ за Општина Центар

Движењето ЗНАМ – За Наша Македонија одржа прес-конференција на која беа соопштени одлуките на Извршиот и на Централниот одбор во врска со претстојните локални избори.
„Зад нас се месеци исполнети со динамична работа на терен. Успешно ги реализиравме двете кампањи низ целата држава, преку кои илјадници граѓани ни ја доверија својата визија за подобар живот во своите општини. Наша обврска и задача е таа визија да ја претвориме во конкретни програми и проекти за претстојните локални избори“, рече портпаролот на Движењето, Никола Мемов.
„На вечерашната седница на Извршниот одбор, а потоа и на Централниот одбор, беа донесени значајни одлуки во врска со претстојните локални избори и тоа:
Движењето ЗНАМ за Наша Македонија ќе настапи самостојно на претстојните локални избори со свои листи за советници во повеќе од 50
општини. Централниот одбор ја усвои одлуката за взаемна соработка и поддршка со ВМРО-ДПМНЕ во делот на кандидатите за градоначалници.
Оваа одлука значи дека ВМРО ДПМНЕ ќе ги поддржи кандидатите на ЗНАМ и во тие опшптини нема да имаат свој кандидат за градоначалник, а од дргуа страна Движењето ЗНАМ ќе ги поддржи кандидатите за градоначалници на ВМРО ДПМНЕ во сите општини, вклучувајќи го и градот Скопје, каде што
ЗНАМ нема да има свој кандидат за градоначалник.
За кандидат за градоначалник на Општина Куманово едногласно е избран: Максим Димитриевски, актуелен градоначалник на општина Куманово.
За кандидат за градоначалник на Општина Центар едногласно е избран: Мирослав Лабудовиќ претседател на Градската организација Скопје на Движењето ЗНАМ и актуелен Заменик-министер за енергетика, рударство и минерални суровини“.
Тој нагласи дека на овие локални избори, Движењето ЗНАМ нуди кандидати со искуство и докажани резултати, стручни луѓе со интегритет и визија.
„Нашите кандидати не се само имиња на изборен плакат – тие се личности кои имаат пред се чист образ, јасен план и визија да донесат вистински промени во своите општини, достојни на довербата што ќе ја добијат.
Ние веќе докажавме преку нашето учество во Владата дека знаеме да раководиме со институции на независен и ефикасен начин, со еден и единствен приоритет – интересот на граѓаните и националните интереси на Македонија.
Нашите советници и градоначалници ќе се погрижат секоја општина да стане подобро место за живеење – со современа инфраструктура, квалитетно образование, силна социјална заштита, поддршка за културата и спортот и нова енергија за локалниот развој.
Запрашан зошто ЗНАМ настапува со двајца кандидати и дали се задоволни со бројот на општините каде што ќе имаат кандидати за градоначалник, Мемов одговори: „Во медиумите се креира наратив околу бројот на кандидати за градоначалници. Движењето ЗНАМ многу внимателно го гради својот равој и довербата кон граѓаните. На овие локални избори пристапуваме многу релаксирано, ослободени од било каков притисок за кандидирање на градоначалници во голем број на општини, по секоја цена. Засега утврдивме кандидати за градоначалници во најголемата општина во Македонија, тоа е Куманово и во најзначајната општина во Скопје, тоа е општината Центар.
Процесот на аналитика и проверка за други општини сеуште е отворен и не ја исклучуваме можноста ЗНАМ да има кандидати за градоначаници и во други општини.
Од друга страна, Движењето ЗНАМ ќе настапи со многу сериозни кандидатски листи за советите во над 50 општини во Македонија“.
Македонија
Шукова: „Граѓаните не бараат чуда, туку јавен превоз што функционира“

Кандидатката за градоначалник на Скопје од СДСМ, Каја Шукова, денеска предупреди дека јавниот превоз во главниот град се наоѓа во состојба на целосен колапс, со што секојдневно се соочуваат десетици илјади граѓани, ова Шукова го разговараше со претставници на приватните превозници.
„Граѓаните се оставени без автобуски линии, особено во делови од градот како Маџари, Ново Лисиче, Сарај и Аеродром. Линиите се ретки, пренатрупани или воопшто ги нема, особено во ударните термини“, изјави Шукова.
На средбата се разговараше за најитните проблеми и можни краткорочни решенија за стабилизирање на јавниот превоз.
Во таа насока, Шукова истакна дека од Советничката група на СДСМ во Советот на Град Скопје ќе побара да поднесе иницијатива за итна вонредна седница.
„Целта е јасна – да предложиме конкретни и законски можни мерки, кои нема да значат враќање на хаосот, туку враќање на функционален јавен превоз“, нагласи таа.
Во фокусот на иницијативата ќе бидат:Изменет возен ред со засилени критични линии; Редовно сервисирање на долговите кон приватните превозници од страна на ЈСП;
Засилена обврска на приватните превозници за покривање на најоптоварените линии во клучните периоди од денот.
Покрај краткорочните мерки, Шукова повика и на системски пристап:
„Нам ни треба јасен и отчетен план за стабилен јавен превоз. Тоа значи субвенции за набавка на нови, еколошки автобуси, поголема поддршка за превозот на ученици и студенти, решавање на недостигот од возачи, и нов модел на соработка со стручните училишта за обучување на автомеханичари“ истакна Шукова.
Шукова предупреди дека ако не се преземат итни мерки, ЈСП до крајот на 2025 ќе остане со едвај 60 функционални автобуси, што ќе значи крах на јавниот превоз во градот.
„Граѓаните не бараат чуда бараат јавен превоз што функционира. Јас и СДСМ тоа ќе го обезбедиме“, заклучи таа.
Македонија
Тим од ОЈО ГОКК во АНБ: договорена динамика за увид во документацијата за можните злоупотреби и следења

Во врска со можните злоупотреби на овластувањата на припадници на безбедносните служби и незаконско следење на комуникациите, ОЈО ГОКК известува дека постапува согласно своите законски надлежности и уставно загарантираниот принцип на законитост и еднаквост пред законот.
„Во рамките на предистражната постапка денеска тим од истражители од ОЈО ГОКК беа примени во АНБ каде што беше договорена динамиката за спроведување на увидот во документацијата со која располага АНБ, а која се однесува на наводите содржани во известувањата доставени до ОЈО ГОКК. Во рамките на денешниот работен ден, двете институции демонстрираа коректен и професионален однос во насока на ефикасно спроведување на законските надлежности и заштитата на јавниот интерес. Со оглед дека станува збор за обемна и сензитивна документација врз основа на која треба да се обезбедат релевантни докази, како и фактот дека истата има степен на доверливост, увидот ќе трае во наредниот период, а ќе се преземаат и други предистражни дејствија“.
ОЈО ГОКК информираат дополнително од таму, постапува исклучиво врз основа на докази, во рамките на законските процедури и со целосно почитување на правата на сите засегнати страни.
„Притоа, во интерес на постапката, а имајќи ја предвид тајноста на предистражната постапка, апелираме до медиумите и до јавноста да се воздржат од прерано изнесување на заклучоци додека трае постапката и не се утврдат фактите. ОЈО ГОКК навремено ќе ја информира јавноста за текот на постапката тогаш кога споделените информации нема да ја загрозат тајноста на предистражните дејствија“.