Денеска, на 3 јуни, во „Струшката соба“ од Собранието на Република Македонија, пратениците од Левица, Реџеп Исмаил и Амар Мециновиќ, остварија средба со Н.Е. Амбасадорката на Швајцарската Конфедерација Вероник Улман.

„На средбата се дискутираше улогата на Левица во склоп на новиот собраниски мандат како најистакната опозиција на најавеното владејачко мнозинство, но беа потенцирани и недостатоците во новиот собраниски Деловник кој ја оневозможува функционалноста на опозицијата преку интервенциите во процедурата на носење закони“, велат од Левица.

„Дополнително, се разговараше и за претходната и тековна соработка помеѓу двете држави во поглед на институционалното зајакнување и поддршката кон поголема функционалност на македонското Собрание.

Очекуваме оваа соработка да продолжи и да се продлабочи, како и да се остварат дополнителни средби во текот на мандатот“, се додава во соопштението на Левица.

Министерството за траснпорт и врски објави дека по верификацијата на пратеничкиот мандат на досегашниот министер за транспорт и врски Благој Бочварски, се до избор на нов министер, со министерството ќе раководи заменик министерот за транспорт и врски Беким Реџепи.

Во овој период, согласно законските прописи, заменик министерот за транспорт и врски Беким Реџепи, ќе ги извршува тековните активности за непречена работа на министерството.

Учениците од 4в одделение од ООУ „Лазо Трповски“ (општина Карпош) освоија награда во рамки на Меѓународниот училиштен натпревар за воздушен и вселенски сообраќај 2024, кој традиционало се одржа во Берлин (Германија). Станува збор за заедничкиот проект „Летаме со Ербас“, кој го изработија четвртоодделенците во координација со двајцата наставници – ментори, Александра Неделковска – Петровска и Стефан Симовски, извести општина Карпош.

„Главен организатор на натпреварувањето беше Сојузното германско здружение за воздушна и вселенска индустрија од Берлин, во соработка со Сојузното министерство за економија и енергија на Германија и Сојузната конференција за образование и истражување на Германија. Во организацијата на ова елитно натпреварување учествуваа и реномираните Луфтханза Техник АД и концернот ЕАДС (во чиј состав влегува и познатиот производител на патнички авиони „Ербас“).

Инаку, конечната одлука во врска со наградите на овој екипен меѓународен натпревар за ученици од трето и четврто одделение, годинава ја донесе деветчлено стручно жири. Поточно, за квалитетот на изработените проекти одлучуваа претставници на организаторот, универзитетски професори (астрофизичари), наставници, германски владини претставници, германски парламентарци, медиумски работници и претставници на концернот Ербас“, соопштуваат од општината Карпош.