Македонија
Дијабетичарите пак молат за инсулин, недостига терапијата без која не можат, Сојузот ги советува да бараат замена

Сојузот на здруженијата на дијабетичарите на Северна Македонија извести дека повторно има недостиг на инсулин.
Од СЗДСМ велат дека за овој проблем се обратиле до Министерството за здравство, од каде што им било одговорено дека поради ревидирање на количините „ризодег“ во согласност со количните предивдени во реализација на тековниот тендер, се делат само останати количини по бројка.
„За жал, повторно ни се случува недостиг на инсулин за кој поставивме прашање до Министерството за здравство, од каде што добивме официјален одговор дека поради ревидирање на количините ‘ризодег’ во согласност со количините предвидени во реализација на тековниот тендер, се делат само останати количини по бројка, а за сите други пациенти треба да се консултираат со своите специјалисти еднокринолози/дијабетолози и заеднички да направат вистински избор за замена на инсулинската терапија“, соопшти СЗДСМ.
Од Сојузот информираат дека се појавува недостиг на терапија со „оземпик“ и „рибелсус“.
„Побаравме информација од Министерството за здравство, чиј одговор во моментот не мислиме дека е реален и продолживме со консултација со компаниите. Нашите информации говорат дека има терапија за сите постојни пациенти до потпишувањето на договорот за набвака и планираните дополнителни количини, но, за жал, не сите и секој ја добива континуирано и навремено. Затоа ќе споделиме дополнителен став за состојбата со овие терапии“, велат од СЗДСМ.
Од таму додаваат дека моментната состојба „само ги потврдува нашите долгогодишни барања за промени во моделот на достапност на терпија и помагала со отворен пазар и воведување референтни цени. Ние сакаме сериозно да им го подигнеме квалитетот на животот на лицата со дијабетес со конкретни мерки и активности од државата“.
Од СЗДСМ апелираат на сериозност на Министерството за здравство и транспаретно да се дејствува и навремено да имаме информации во тековниот период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Скандалозен тендер за возачки испити, СДСМ бара истрага и одговорност од Тошковски

СДСМ алармира за нов скандал во Министерството за внатрешни работи, овој пат поврзан со сомнителен тендер вреден милиони денари за лиценца за организирање возачки испити во Пелагонискиот регион.
Министерот Панче Тошковски, како што изнесува потпретседателката на СДСМ, Каја Шукова, доделил тендер на новоформирана фирма „Супер Возач“, регистрирана само три месеци пред распишувањето на тендерот. Според Шукова, зад оваа фирма стои Филип Митрески, функционер на ВМРО-ДПМНЕ и советник во Советот на Општина Кичево, преку компанијата „Стрит рајд“, која е нејзин сопственик.
„Станува збор за класичен пример на партиска злоупотреба на институциите за лични и бизнис интереси. МВР под ВМРО-ДПМНЕ дели милионски тендери на луѓе блиски до партијата, а институциите стануваат алатка за испумпување народни пари“, изјави Шукова.
Со овој потег, како што посочуваат од СДСМ, на фирмата „Супер Возач“ ѝ е овозможен монопол од 5 години врз еден профитабилен бизнис – сите полагања за возачки испити во Битола, Прилеп и Ресен ќе се одвиваат преку оваа компанија блиска до власта.
„Фирмата е основана непосредно пред тендерот. Дали однапред било договорено кој ќе го добие? Како знаел функционер на ВМРО-ДПМНЕ дека токму за тоа ќе се распише тендер и токму таму да отвори фирма? Не веруваме во случајности“, додаде Шукова.
Од СДСМ потсетуваат дека ова не е изолиран инцидент, туку втор сериозен скандал по спорниот тендер за полициски униформи, кој исто така беше проследен со јавни реакции и обвинувања за корупција.
„Ова е моделот на владеење на ВМРО-ДПМНЕ – партиски тендери, бизниси за блиските, а државните институции се користат како банкомати за партијата. Наместо борба против корупцијата, гледаме корупција во живо“, рече Шукова.
СДСМ бара итна реакција од надлежните институции:
– Државната комисија за спречување на корупцијата да отвори предмет.
– Основното јавно обвинителство да постапи по допрен глас.
– Институциите да не останат неми набљудувачи, туку да ја исполнат својата законска обврска.
„Македонија не смее да биде плен на организиран партиски грабеж. Граѓаните заслужуваат отчетност, одговорност и институции кои работат за нив. Одговорност мора да има и ќе има“, заклучи Шукова.
Скопје
Герасимовски: „Центарска симфонија” ги сплоти скопјани, Тарабунов и граѓаните пееја и танцуваа на најпознатите филмски евергрини

„Центарска симфонија” синоќа ги сплоти скопјани. Со македонска и светска филмска музика изведена од музичката ѕвезда Александар Тарабунов и камерниот оркестар, граѓаните уживаа во оваа културна манифестација којашто за првпат ја организираше Општина Центар.
Градоначалникот Горан Герасимовски упатува благодарност до сите центарци, но и жители на Градот Скопје кои вчера вечер дојдоа и уживаа во најпознатите мелодии од македонската и светската кинематографија како „Исправи се Делфина”, „Каде песно моја”, „До Балчак”, „Beautiful Maria of my Soul” и многу други. На „Центарска симфонија”, беше изведена и новата песна на Тарабунов „Заедно” со камерниот оркестар.
„Центар останува место за најубавите културни настани. Среќен сум што синоќа ‘Центарска симфонија’ ги сплоти скопјани на Плочникот кај Градски ѕид. Сите во еден глас ги пееа најубавите филмски мелодии, уживаа во добра музика и се забавуваа. Оваа манифестација е новина и останува традиција. Не застануваме тука, летово ќе имаме уште многу настани во делот на културата и за истите ќе бидете навремено информирани. Ви благодарам на сите коишто дојдовте и заеднички уживавме”, рече Герасимовски.
Македонија
Охридската полиција спаси четири лица заглавени во езерото откако силниот ветер им скрши дел од едрилицата

Четири лица беа спасени синоќа од водите на Охридското Езеро откако нивната едрилица останала без управување поради механичко оштетување. Брзата реакција на полициските службеници од Полициската станица за граничен надзор „Охридско езеро“ спречи трагедија.
Како што информира Министерството за внатрешни работи, на 28 јуни 2025 година, во 19:30 часот, било пријавено дека од пловен објект, кој се наоѓал на околу 2,5 километри од езерскиот брег спроти авто-кампот „Извиднички“, е упатен повик за помош.
„Наши полициски службеници веднаш излегоа на терен со службен глисер и ги лоцираа четирите лица на едрилица кои се наоѓаа во неволја. Сите четворица се успешно и безбедно извлечени и пренесени до станицата кај каналот Студенчишта“, соопштија од МВР.
Од полицијата појаснуваат дека поради силен ветар и бранови дошло до кршење на крмениот лист на едрилицата, по што лицето кое управувало со пловилото ја изгубило контролата.
„Благодарение на навремената интервенција, случајот заврши без повредени. Безбедно е извлечена и едрилицата“, додаваат од полицијата.
МВР уште еднаш апелира до сите граѓани и туристи да внимаваат при користење на пловни објекти и да ги следат временските услови, особено кога се работи за едрилици и објекти без моторен погон.