Македонија
ДКСК: Богдановиќ не кажал дека планот е под мораториум пред продажбата на земјиштето кај „Холидеј ин“
Државната комисија за спречување корупција (ДКСК) утврдила дека градоначалникот на Центар, Саша Богдановиќ, пред продажбата на земјиштето кај хотелот „Холидеј ин“ издал извод од планот во кој не назначил дека планот е под мораториум и дека постои ризик да претрпи измени. Изводот од планот го издал поради наводно решавање на имотно-правни односи, но на истиот извод се повикало Министерството за транспорт и врски при продажбата на земјиштето. Претседателката на Државната комисија за спречување на корупцијата, Билјана Иваноска, укажува дека градоначалникот и Советот на Општина Центар треба да се придржуваат на стандардите и нормативите со кои се обезбедува зголемување на степенот на хуманоста на живеењето.
„Продажбата ја извршило Министерството за транспорт и врски врз основа на извод од ДУП, кој не се применува, во согласност со одлука донесена од Општина Центар за запирање на спроведувањето. Изводот од планот го издал градоначалникот на општината за наводно решавање имотно-правни односи. Во барањето на подносителот е наведено дека изводот од ДУП е потребен за дооформување на парцелата. Изводот издаден од градоначалникот не содржи известување или напомена дека планот за кој се издава е под мораториум и може да претрпи некакви измени при негова ревизија“, рече претседателката Ивановска.
Парцелата била продадена врз основа на позитивно мислење од државниот правобранител, кој до Министерството за транспорт и врски испратил мислење, во кое вели дека нема правни пречки да се изврши продажбата на земјиштето. Исто така, државниот правобранител во дописот што го доставил до ДКСК истакнал дека градежното земјиште е отуѓено врз основа на важечки детален урбанистички план од 2012 година и укажува дека како прилог на документацијата е доставен и изводот од ДУП издаден од градоначалникот на општина Центар.
„Речиси 625 квадратни метри од земјиштето е на семејство што почнало процес на денационализација во 2013 година, но поради измени во Законот за денационализацијата од декември 2010 година, според кои се дозволува располагање со имот што е предмет на денационализација, земјиштето е продадено пред да биде завршен процесот на денационализација. Пред оваа измена постоела апсолутна забрана за располагање со имотот предмет на денационализација, без никакви дополнителни услови, со што се заштитувал имотот кој е предмет на денационализација, се заштитувале правата на сопствениците или нивните наследници, се овозможувало остварување на целта на законот, а тоа е враќање на имотот на сопствениците, односно наследниците. Наведената измена сметаме дека не е во согласност со Уставот според кој граѓаните се еднакви пред Уставот и законите, а правото е една од темелните вредности на уставниот поредок“, рече претседателката Ивановска.
ДКСК ќе испрати барање до Уставниот суд да изврши оценка на членот 64 од Законот за денационализацијата, а понатаму укажува дека поради фактот дека земјиштето е продадено во време на мораториум кога ДУП се ревидира и може да претрпи одредени измени, постои реален ризик на влијанија од сопствениците на тоа земјиште врз натамошната постапка од ревидирање и донесување ДУП од страна на Советот на Општината.
„Со оглед на големиот интерес на јавноста и сензитивноста на ова прашање, ДКСК ќе поведе иницијативи за преоценка на законските решенија со кои се овозможува системска, односно законска корупција и ќе ја следи судбината на оваа парцела со решенијата што ќе бидат предложени во идниот детален урбанистички план“, рече претседателката Ивановска.
Министерството за транспорт и врски во октомври 2018 година по цена од 19.200 денари за квадратен метар продаде земјиште од 9.048 квадратни метри спроти хотелот „Холидеј ин“. Вкупната површина на парцелата изнесува 13.653 квадратни метри, од кои 4.605 се приватна сопственост, а 9048 квадрати се сопственост на државата. Министерот за транспорт и врски, Горан Сугарески, две години тврди дека земјиштето е легално продадено.
На парцелата, според ДУП, кој е стопиран, беше предвидена изградба на шеесеткатници.
Градоначалникот Богдановиќ, кој рече дека нема да дозволи да се изградат шеесеткатници, не е достапен за објаснување зошто во издадениот извод од планот не назначил дека тој е под мораториум.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Стари кадри од времето на Заев обременети од претходните функции, Филипче ги претставува како нови лица во раководството на СДС
Според ВМРО-ДПМНЕ, СДС продолжува да тоне се подлабоко.
Наместо промени, нови лица и свеж кадар, на раководни позиции, СДС, додаваат од владејачката партија, повторно стави стари и излитени лица уште од времето на Зоран Заев.
„Венко Филипче најави таканаречена „Нова сила“, а всушност врати стари лица на Заев, со кој ја приватизираа и на крај ја раскрчмија СДС.
Старите кадри претставени како ново раководство на СДС, Заев му ги напиша, а Филипче само ги изгласа.
Во нивното т.н. ново раководство влезе Филип Андов кој е поранешен директорот на затворот Шутка со активна кривична пријава за злоупотреба на службена должност, како и Јон Фрчковски кој беше фатен и призна дека на своето работно место консумира наркотични средства, а наместо осуда од СДС доби унапредување.
Тука е и поранешна директорка на Државниот санитарен и здравствен инспекторат, Рената Младеновска која и досегашен член на ИО на СДС, па Драган Крајовски, претседател на ОО на СДС во Битола во времето на Ковачевски а директор на затворот „Црн мост“ во времето на Зоран Заев и член на ЦО на партијата, а за претседавач Филипче го избра Герасим Лазов.
Следниот е Дејан Николовски, кој беше вработен во кабинетот на Заев, задолжен за странските инвестиции и досегашен претседавач на ЦО, како и Андреј Жерновски, неуспешен и скандалозен дипломат, неуспешен градоначалник и градежник кој за функција прелета од ЛДП во СДС на Заев, кого јавноста не го памети по ништо добро, туку само по ширење на паника дека ќе се урне стадионот кој Скопје ден денес го користи.
Агрон Демири, поранешен советник во секторот за ЕУ и меѓународна соработка, па во Одделението за правни услуги во АД ЕСМ, коносител, односно втор на листата во шеста изборна единица на минатогодишните парламентарни избори кога СДС го претрпе најголемиот пораз а тој не успеа да пратеничко место.
Организацискиот секретар, Љупчо Фармаковски, наречен Фосил, државен советник во МВР и во влада уште од времето на Хари Костов, кој до ден денес му е главен координатор за човечки ресурси во Комерцијална Банка. Во 2008 година беше претседател на Националната комисија за интегрирано гранично управување, а и до сега ја извршуваше истава партиска функција.
Да не ја заборавиме и Јована Тренчевска, поранешна министерка за труд и социјална политика во владите на Заев, на работа го врати директорот на меѓуопштински Центар за социјална работа во Радовиш, Александар Филев од СДС, откако беше разрешен затоа што беше фатен во трговија со дрога.
Тренчевска лани се повлече од функцијата како Претседателка на форумот на жени, при што на социјалните мрежи пишуваше дека е време во СДС да приклучат нови лица блиски до народот на кои им се верува, неизвалкани од бремето на претходните функции“.
А Филипче, според ВМРО-ДПМНЕ, избра спротивно на ова, сите до еден стари кадри, со што се потврдува нашата, како што велат, и на цела јавност констатација, СДС продолжува да тоне, наместо да направи суштински структурни и кадровски промени.
Според нив, ова е убедливо најлошиот состав на СДС кој Филипче и Заев го избрале, што на следни избори и 100 илјади гласа ќе им бидат недостижни.
Македонија
СДСM: ДПМНЕ-ЗНАМ ја гушат демократијата во Македонија, сакаат да ја замолчат опозцијата по секоја цена
ДПМНЕ-ЗНАМ ја гушат демократијата во Македонија со усвојување на предавничка Резолуција во Собранието, велат од СДСМ.
„Ја загрозуваат слободата на говорот и мислењето, сакаат да ја замолчат опозцијата по секоја цена, само да не се зборува за договорот мигранти за пари.
Целта е на опозицијата да ѝ биде забрането да зборува на темата мигранти, под зкана на кривични пријави, кои судовите по итна постапка би ги прифаќале. Затоа и забрзано работат на воспоставување целосна контрола врз судството и обвинителството.
Секој што ја зборува вистината за мигрантите е таргет, да му се заканат со кривична, со затвор, и на тој начин да замолчат каква било дебата за тоа што се случува надвор од очите на јавноста.
Во меѓувреме ќе пласираат лаги и ќе фабрикуваат разни лажни вести, за опозицијата, за новиот тим на СДСМ, се за и сешто“.
Затоа, според оваа партија, во предавничката Резолуција, како што наведуваат, внеле и измислици дека СДСМ подготвувала мигранти, што е целосна лага.
„Кога се носат предавнички резолуции против опозицијата тоа е автократија, вовед во диктатура, режим 2.0.
СДСМ нема да дозволи гушење на демократијата, заедно со граѓаните ќе ја одбраниме Македонија, ќе ја одбраниме демократијата.
Ќе поднесеме претставка до Уставниот суд за уривање на уставниот поредок и основните слободи за да избегаат од националните предавства.
Ќе се обратиме до сите релевантни меѓународни институции. Помош ќе побарме и од институциите на ЕУ, од сестринските партии во Европа“.
Со сите демократски алатки и механизми кои ни стојат на располагање, додаваат од СДСМ, ќе се бориме за Македонија, за слободата и демократијата.
Македонија
Променливо облачно со сончеви периоди, претпладне по одделни котлини ќе има појава на магла
Времето денеска, променливо облачно со сончеви периоди. Претпладне по одделни котлини ќе има појава на магла. Ќе дува слаб променлив ветер. Минималната температура ќе биде во интервал од -5 до -1, а максималната ќе достигне од 6 до 13 степени.
Во Скопје, променливо облачно и претежно тивко. Претпладне во делови од котлината ќе има појава на магла. Минималната температура ќе се спушти до -4, а максималната ќе достигне до 6 степени.
До понеделник ќе се задржи стабилно и претежно тивко време. Наместа ќе има појава на магла и зголемена облачност. Во вторник се очекуваат локални врнежи од дожд.

