Македонија
ДКСК: Планирањето 1 денар за квадрат во Центар е можнoст за зделки меѓу планерот и сопствениците
Државната комисија за спречување на корупцијата (ДКСК) утврди дека подготовката на планот „Ново Маало 2“ за еден денар за квадратен метар не ѝ остава на Општина Центар ефикасен механизам за заштита доколку планот не е изготвен навреме и неквалитетно. Договорот со „Билд урбан“ ДООЕЛ Скопје има одредби што го обврзуваат да достави банкарска гаранција за квалитетно и навремено извршување на договорот во износ од 10 % од вкупната вредност на услугите што се предмет на договорот. Предвидена е и договорна казна во износ од 1 промил од вкупната договорена цена на услугите за секој ден задоцнување ако услугите не се завршат во предвидениот рок. Казната не може да надмине 5 % од вкупната вредност на договорот.
„Имајќи ја предвид вредноста на договорот (1 денар), произлегува дека во овој случај Општината не располага со адекватни и ефикасни правни механизми за наплата на штета и постои ризик од ненавремено и неквалитетно извршување на договорот, без сериозни правни и финансиски последици за економскиот оператор, дотолку повеќе што се доведуваат во прашање квалитетот на уредувањето и хуманизацијата на просторот, како и заштитата и унапредувањето на животната средина. Оваа состојба комисијата за ЈН требало да ја согледа и да ја земе предвид при оценувањето на прифатливоста на образложението за невообичаено ниската цена доставено од страна на економскиот оператор ’Билд урбан’ ДООЕЛ Скопје“, утврдила ДКСК кога на сопствена иницијатива отвори предмет за планирањето 1 денар за квадрат во Општина Центар.
Антикорупцинерите не утврдиле слабости во спроведување на тендерската постапка спротивни на Законот за јавните набавки, но сметаат дека за одбележување е поединечниот договор со „Билд урбан“ оти предмет на договорот е изработка на план кој претходно е изработен од истиот планер, а со одлука на Советот на Општината не се применува поради неусогласеност со ГУП. Неусогласеноста се однесува на развиена бруто-површина, максимално дозволена густина на населеност, односно максимален дозволен број жители – корисници на просторот.
Овој план го опфаќа и паркингот спроти „Холидеј ин“ за чија продажба, реализирана во време на мораториум кога ДУП-от се ревидира и може да претрпи измени, ДКСК веќе се произнесе и укажа дека постои реален ризик од влијанија на сопствениците на тоа земјиште врз натамошната постапка на ревидирање и донесување на ДУП-от од страна Советот на Општината.
„Фактот дека планот се изработува по исклучително ниска цена го зголемува и ризикот од коруптивно однесување, односно склучување коруптивни зделки помеѓу планерот и сопствениците на земјиштето, кои се идни инвеститори“, сметаат антикорупционерите.
Од увидот во документацијата антикорупциската утврдила и дека забелешките што Комисијата за урбанизам, формирана од градоначалникот, во повеќе наврати ги упатувала до планерот, не се прифатени во целост, а Општината како нарачател на услугата не го искористила правото да не ја прифати извршената услуга, кое е предвидено во договорот со економскиот оператор.
Антикорупционерите утврдиле и дека градоначалникот не постапил во согласност со Законот за просторното и урбанистичкото планирање, со кој е предвидено обезбедување инклузивност, партиципативност и јавност во процесот на урбанистичкото планирање преку задолжително формирање партиципативно тело, кое ги претставува ставовите, мислењата и интересите на граѓаните, граѓанските организации, но и на стручната фела како најодговорна за оценка на плановите од аспект на почитување на стандардите за изработка на квалитетни планови насочени кон јавниот интерес. За формирање на ова тело не е објави јавен оглас на веб-страницата на Општината, ниту во писмена форма е изложен оглас на јавно место во траење од 30 дена, како што пропишува законот.
Поради сите забелешки, антикорупционерите препорачуваат градоначалникот и Советот на Општината особено да водат сметка за квалитетот на плановите што ќе ги донесат, притоа имајќи предвид дека ДУП треба да биде усогласен со ГУП, донесен во 2012 година, со важност до 2022 година, и задолжително формирање партиципативно тело и обезбедување инклузивност, партиципативност и јавност на процесот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.
Македонија
Утрото претежно ведро и студено, преку денот сончево со мала до умерена облачност
Утрото претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

