Македонија
Добротворна забава за поддршка на луѓе што живеат со ХИВ

Вечерва со почеток од 21 часот во „ShortBus“ ќе се одржи добротворна забава која ја организира „Заедно посилни“, здружение за поддршка на луѓето што живеат со ХИВ, во склоп на активностите за одбележување на Светскиот ден на СИДА. Музика ќе пуштаат диџеите Соња Исмаил, Ивана Драгшиќ и Вера Вендета, а модератори на настанот се телевизиските водители Марко и Цеце.
Светскиот ден на СИДА, кој се одржува на 1 декември секоја година од 1988, е меѓународен ден посветен на подигнувањето на јавната свесност за ХИВ и СИДА, посебно истакнувајќи ги постигнатите достигнувања во превенција на ХИВ-инфекцијата, но и достапноста на терапија со чие навремено почнување и редовно земање се очекува повеќето луѓе да имаат просечно долг и квалитетен живот како и луѓето кои немаат ХИВ. Покрај сеќавањето на оние кои ја изгубиле битката со ХИВ, воедно се изразува солидарност со и поддршка на луѓето што живеат со ХИВ. Меѓународниот симбол за свесност и поддршка е црвената панделка.
По тој повод, здружението „Заедно посилни“ години наназад традиционално организира добротворен настан овој период од годината, на кој се прибираат донации за фондот за поддршка на луѓе што живеат со ХИВ во неповолна социјална положба. Преку овој фонд на „Заедно посилни“ повеќе години континуирано се обезбедува скромна помош за овие лица и тоа: патни трошоци за редовна контрола и подигнување на терапија од Клиниката за инфективни болести во Скопје; ваучери за основни прехранбени и хигиенски производи на месечно ниво; и еднократна помош за лица во исклучително висок социјален ризик.
Воедно, годинава „Заедно посилни“ слави јубилеј – 10 години од основањето – во 2009 г. како неформална група во рамките на ХЕРА, а 2013 г. прераснува во граѓанска организација за поддршка на луѓето што живеат со ХИВ.
Поддршката, и од граѓанските организации кои работат во оваа област и од институциите и од самите граѓани, е клучна во остварувањето на зацртаните цели, а тоа се: нулта толеранција на дискриминацијата, да се зголеми бројот на лица со ХИВ кои примаат терапија и да се намали бројот на нови инфекции кај возрасните. Само преку демонстрирањето обединет фронт и со заеднички напори можеме да ставиме крај на епидемијата на ХИВ и да придонесеме за нормализација на ХИВ притоа креирајќи овозможувачко и инклузивно опкружување за сите. Затоа, оваа година, кампањата не случајно е насловена #ЗаедноПосилни.
Овогодишната кампања „Заедно посилни“ ја организира со поддршка на Министерството за здравство на Република Северна Македонија, Фондот за население при Обединетите нации (УНФПА), Евроазиската коалиција за машко здравје (ЕКОМ) од Естонија и Фондацијата Отворено општество – Македонија.
Во рамките на кампањата, во соработка со „Види Вака“, беше изработен информативен и едукативен видео-спот. „Заедно посилни“ нуди информации, советување и едукација за ХИВ, како и поддршка за луѓето што живеат со ХИВ: врсничка, психосоцијална и правна. Во рамките на нивните простории функционира пункт за проверка на ХИВ-статус со обучен и доверлив персонал, каде што може да се направи бесплатно, брзо и анонимно тестирање за ХИВ, а резултатот се добива веднаш. Термините за оваа услуга се секоја среда и сабота од 17 до 20 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) „Максим Димитриевски е симболот на лажниот патриотизам и профитерството“, велат од СДСМ Куманово

„Денес сите граѓани на Куманово и цела држава гледаат кој навистина е Максим Димитриевски: политичар без чест, без принципи и без срам. Човек кој под маската на „патриот“ и „борец за правда“ всушност трупа личен профит, тера криминал и се спасува од правни постапки“, рече Марина Манојловска, претседателка на Форум на Жени на СДСМ Куманово.
„Овој човек кој со години зборуваше за „независност на правосудството“ и „борба против неправдата“ лично го ништи обвинителството за да ја спаси својата кожа. И токму тогаш, кога требаше да биде донесена пресуда за неговите незаконски дејствија, одеднаш обвинителството се повлече. Дали е ова правдата за која зборува, која важи за сите освен за него. Профит коалицијата на ЗНАМ и ВМРО-ДПМНЕ јасно потврдува дека правда неам да има.
Максим Димитриевски е разобличен и дома, во Куманово. Тој заедно со ДУИ изгласа Детален урбанистички план со кој си обезбеди лично 300.000 евра. Го претвори Куманово во приватна фирма за полнење на неговиот џеб. Со поддршка на ДУИ и со молк од ВМРО-ДПМНЕ, тој ги продаваше интересите на граѓаните за лични зделки.
Димитриевски не е борец за правда туку манипулатор кој во политиката е само за свои профити. Неговата „борба“ завршува таму каде што почнува неговиот интерес. Наместо да им служи на граѓаните, наместо да го чува Куманово, тој го претвори во своја приватна фирма.
Максим Димитриевски денес е симбол на политичар кој си ги погазил сите принципи и ветувања. Човекот го надмина дури и Христија Мицкоски со лажење и превртливи политики. Политичар кој ја продаде сопствената чест за заштита од кривично гонење и за неколку станови и евро повеќе.
Со кој образ Димитриевски ќе бара нов мандат во Куманово? Ги погази ветувањата за правда, правда нема, има само спас од прогон за него. Се откри дека е лажен патриот, молчи пред сите национални понижувања кои ги приредува владата. Се потврди дека е лажен борец против криминалот на албанските партнери за кои по цели денови трубеше на телевизија. Си гласа ДУП-ови со ДУИ, молчи за криминалот со дивоградбите на ВЛЕН. Куманово пропаѓа во смет, хаос и безредие, нема реалзиирано ништо од ветувањата. Ваков човек не заслужува Куманово.
На крај, сите го гледаат за што се бори Максим Димитриевски – за власт по секоја цена, за свои пари, за свои интереси, и со кого и да треба ќе се коалицира, само ако него го спасат. Такви луѓе немаат место во иднината на Куманово и на Македонија. Време е граѓаните да го вратат градот и државата од рацете на ваквите профитери“, изјави Марина Манојловска, претседателка на Форум на Жени на СДСМ Куманово.
Македонија
Муртезани во Париз: Зајакнување на француско-македонското партнерство и на европската интеграција

Министерот за европски прашања на Северна Македонија, Орхан Муртезани, денеска во Париз, со средба со министерот делегиран за Европа во Министерството за Европа и надворешни работи на Франција, Бенжамен Хадад, ја започна својата работна посета на Француската Република. Разговорот се одвиваше во светло на новата геополитичка реалност во Европа, во која партнерството меѓу Северна Македонија и Франција добива нов импулс во насока на продлабочување на европската интеграција, политичката стабилност и отпорноста на регионот кон надворешни влијанија.
Во фокусот на средбата беа перспективите за унапредување на билатералната и институционалната соработка, особено во доменот на политиката на проширување на Европската Унија со регионот на Западен Балкан, како и зајакнувањето на политичкиот дијалог и координацијата во клучните политички европски и безбедносни прашања, извести Министерството.
Муртезани ја реафирмираше подготвеноста на Северна Македонија да понуди стабилно, демократско и реформски-ориентирано партнерство, поддржано со конструктивен придонес за добрососедските односи и регионалната соработка. Во таа насока, Муртезани ја истакна потребата од континуирана и принципиелна француска поддршка за евроинтегративниот процес, потенцирајќи дека целосната интеграција на Северна Македонија и регионот во Унијата останува најсилниот гарант за долгорочна стабилност, демократска консолидација и европски просперитет. Во таа смисла, тој нагласи: „Потребна ни е посветеноста на Франција за да постигнеме заеднички успех и решителен напредок кон консолидирањето на Европа во овие турбулентни геополитички времиња.“
Министрите се согласија дека зајакнувањето на политичкиот дијалог, економската размена и културната соработка остануваат приоритети за обете земји. Беа истакнати и веќе постојните француски иницијативи, меѓу кои ангажманот на технички експерти во македонски институции, како конкретен придонес за унапредување на реформските процеси и ускогласување со европските стандарди. Од страна на министерот Хадад беше повторена цврстата поддршка на Франција за европската перспектива на Северна Македонија.
На средбата беа разгледани и натамошните чекори за продлабочување на стратешката рамка на соработка меѓу Северна Македонија и Франција, особено преку промоција на нови можности за француски инвестиции во енергетиката, дигиталната трансформација и инфраструктурата, како и зајакнување на размената во сферата на образованието и културата. Министерот Муртезани ја реафирмираше определбата на Владата за продолжување на реформите и за иницирање на нови форми на институционално партнерство со Франција, препознавајќи го Париз како незаменлив сојузник во реализацијата на стратешките евроинтегративни цели на Северна Македонија, се додава во соопштението на Министерството.
Македонија
Апелот на Министерството за здравство да не се снимаат пациентите од дискотеката во Кочани е загрижувачки, смета Хелсиншкиот комитет

Хелсиншкиот комитет за човекови права изразува сериозна загриженост поради апелот на Министерството за здравство до медиумите да не ги фотографираат или снимаат пациентите кои беа повредени во трагичниот пожар во дискотеката „Пулс“, а кои се лекуваат во болницата во Кочани.
Од Хелсиншкиот комитет наведуваат дека иако заштитата на приватноста и достоинството на пациентите е од голема важност, состојбата и условите во кои се лекуваат жртвите од оваа трагедија претставува највисок јавен интерес.
„Апелите што имаат за цел да ограничат медиумско покривање во вакви ситуации се проблематични и претставуваат потенцијален обид за институционално ограничување на слободата на изразување и правото на јавноста да биде информирана. Со тоа Министерството ризикува да воспостави штетна пракса која може да води кон цензура и самоволни ограничувања на медиумската работа. Ја потсетуваме институцијата дека новинарската етика и професионалните стандарди се предмет на саморегулација и дека за овие прашања се надлежни телата како Советот за етика во медиумите и Судот на честа при Здружението на новинари на Македонија (ЗНМ)“, велат од Хелсиншкиот комитет
Од таму наведуваат дека Член 16 од Уставот на Република Северна Македонија гарантира слобода на изразување, како и забрана на цензурата.
Според нив, вакви инструкции што доаѓаат од државни институции, дури и кога се претставени како апели, можат да се сфатат како форма на институционален притисок.
Хелсиншкиот комитет апелира до Министерството за здравство да се воздржи од наметнување на неформални ограничувања врз работата на медиумите и ги охрабрува новинарите да продолжат да известуваат професионално, етички и со чувствителност кон жртвите – но и со јасно чувство за одговорност кон јавниот интерес.