Македонија
Доделени 4,2 милиони денари за најуспешните истражувачки проекти од 20 основни и средни училишта
Прогласување на најуспешните 20 училишта од Предизвикот за млади истражувачи се одржа денеска во објектот на Владата, во организација на Фондот за технолошки развој и иновации.
Премиерот, Зоран Заев, им посака топло добредојде на присутните ученици, ментори, наставници и присутни гости и заедно со министрите за образование и здравство, Арбер Адеми и Венко Филипче и директорот на Фондот за иновации и технолошки развој, Јован Деспотовски, им доделија вредносни ваучери на најуспешните истражувачки проекти на 20 основни и средни училишта од цела Македонија.
Премиерот Заев во своето поздравно обраќање рече дека креативното размислување и истражувачкиот дух кај децата и учениците треба да бидат поттикнувани во рамки на образовниот процес, од општеството, во семејствата.
„Мотивирани млади луѓе се градителите на стабилна и економски перспективна иднина. Такви млади луѓе и се потребни и на нашата Македонија. Во вас драги ученици, млади истражувачи го препознавам тој креативен потенцијал што и е потребен на Македонија. И со вашиот вложен труд и резултатите што ги постигнавте денеска го потврдувате тој факт“, порача Заев.
Министерот за образование и наука, Арбер Адеми рече дека знаењето и иновациите ги движат земјите и светот напред и во тој правец подвлече дека Владата има јасна стратегија преку конкретни мерки и активности за поттикнување на иновативноста и креативноста.
Директорот на Фондот за иновации и технолошки развој, Јован Деспотовски, во детали зборуваше за истражувачките проекти кој беа наградени и рече дека околу 100-тина училишта се пријавиле на предизвикот и изрази уверување дека на вториот предзивик ќе земат учество уште поголем број на училишта.
„Иновацијата ве предизвика и на неа одговоривте со изработка на дрон, со хидрапонична градина, систем за детекција на гасови во воздух во работни простории, фотоволтаична централа, стаклена градина Индиго Росе, отпорност на градинарските култури на кисели дождови и десетици други успешни истражувачки проекти. Со нив само се уверивме дека во вас има креативен, критичен и иновативен потенцијал независно во кое училиште учите и од кој дел на Македонија ни доаѓате. И затоа, првичниот буџет за награден фонд на Предизвикот од 1,5 милиони денари, го зголемивме за скоро трипати и денес тој изнесува 4,2 милиони денари бидејќи наш приоритет е да вложуваме во вашиот развој и идеи. Верувам дека меѓу вас денес е идниот Закерберг, Илон Маск, Џек Ма“, порача директорот Деспотовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Со видео надзор, општината ќе ја зголеми безбедноста на граѓаните и ќе ги заштити јавните добра
Советот на Општина Центар на 35. Седница на советот го прифати предлогот на градоначалникот Горан Герасимовски во општина Центар да се постави видео надзор.
Станува збор за видео надзор поради обезбедување заштита на имотoт и имотните права на општината односно Заштита на урбаната опрема (автобуски постојки, опрема во функција на туристички и културни и спортски настани, самостоечки рекламни паноа, детски игралишта, фонтани, чешми, клупи, корпи за отпадоци и други согласно законите), Заштита на инфраструктурните објекти (улици, плоштади и други инфраструктурни објекти во надлежност на Општината), Заштита на сообраќајни знаци и семафори и друга вертикална и хоризонтална сигнализација, Заштита на улична јавна осветлување, броење и евиденција на возила за статистички мерења.
Герасимовски во образложението за дополнувањето на дневниот ред истакна дека одлуката е преземена и модифицирана од други општини во кои веќе неколку години има поставен видео надзор и каде по поставувањето има намалување на штетите во општината.
„Се обидовме да ја заштитиме урбаната опрема особено детските игралишта но по сите напори не успеваме да го направиме тоа. Тие не ни траат ниту два месеци, се кршат детските реквизити, обрачите на спортските игралишта, се крши се. Затоа овие снимки може да служат како доказ за нечие дивеење. Но Министерството за внатрешни работи или Јавното обвинителство, исто така ќе може да ги користат при евентуално сторено кривично дело, нарушување на јавен ред и мир, или кршење на друга урбана опрема. Верувам дека снимките ќе ја зголемат и безбедноста во општината. Суштината е снимката да се користи како доказ за евентуална судска кривична или прекршочна постапка со цел да имаме намалување на девијантните појави во општината“, рече Герасимовски на седницата.
Македонија
Маскиран со „фантомка“ влегол во казино во Лешок, репетирал автоматската пушка и украл 329.780 денари: притвор за 28-годишник
Јавен обвинител од Основното јавно обвинителство Тетово донесе Наредба за спроведување истражна постапка против 28-годишен жител на Непроштено, осомничен за разбојништво и поседување автоматска пушка.
На 24 април, осомничениот, маскиран со „фантомка“, влегол во казино во Лешок и со автоматска пушка која на граѓаните им е забранета им се заканил на вработениот во обезбедувањето и на уште едно присутно лице. Ја репетирал автоматската пушка и им наредил на оштетените да легнат на подот, по што од фиоките на касите одзел 329.780 денари.
На овој начин осомничениот сторил кривично дело – Разбојништво по член 237 став 4 во врска со став 1, како и кривично дело – Неовластено изработување, држење, посредување и тргување со оружје или распрскувачки материи по член 396 став 2 во врска со став 1 од Кривичниот законик, соопшти Обвинителството.
Јавниот обвинител до судијата на претходна постапка од Основниот суд во Тетово достави предлог за определување мерка притвор за осомниченото лице, бидејќи постои опасност од бегство, можност тој да влијае врз сведоците и да го повтори делото. Судот го прифати предлогот и определи притвор во траење од 30 дена.
Скопје
Градоначалникот Георгиевски на увид во реконструкцијата на игралиштето за мал фудбал во Текија, општина Илинден
Увид во работните активности за реконструкција на игралиштето за мал фудбал во рамки на подрачното општинското основно училиште во населено место Текија направи градоначалникот на општина Илинден, Александар Георгиевски.
Како што истакна градоначалникот Георгиевски и на ова фудбалско игралиште целосно ќе биде обновен асфалтниот слој, проширување на теренот, ќе биде поставено лед осветлување, обновување на заштитната ограда, а ќе бидат поставени нови голови, клупи, корпи за отпадоци, просторот ќе биде партерно уреден. Со обновувањето на игралиштето ќе се создадат услови за реализација на часовите по физичко образование како и комплетно реконструиран, убаво уреден простор каде младите во спортски дух ќе го поминуваат слободното време, соопшти општина Илинден.
Покрај реконструкцијата на игралиштето за фудбал ќе се обнови и детското игралиште во рамки на училиштето, односно оштетените реквизити ќе бидат заменети со нови.
Со цел уредување на секое населено место како и создавање квалитетни и безбедни услови за жителите, општина Илинден продолжува со реконструкција на постоечките и изградба на нови спортски терени и во останатите населени места, се наведува во соопштението.