Докторката од Куманово, Гордана Николиќ, која пред повеќе од еден месец на својот профил на „Фејсбук“ напиша дека има коронавирус, денеска соопшти дека веќе и на вториот брис е негативна на Ковид-19.

Таа првиот негативен брис на Ковид-19 го добила на 3 мај, а денеска и вториот. Во меѓувреме, на сите тестови на Ковид-19 резултатот бил позитивен.

„И, конечно, и вториот брис е негативен! 44 дена поминаа од 23 март до денес. Денес е 5. 5… и, конечно, успеав да се ослободам од вирусот Ковид-19 .Мора да биле во голем број вирусите, мора да биле лоши, затоа што ми ги нападнаа белите дробови, но, за cреќа, успеав да поминам само со пневмонија“. Среќа во несреќа затоа што вирусот е едн големо непознавање и за оние што го истражуваат. Сега ќе можам да излезам слободно да подишам чист воздух затоа што не може на тераса да се пешачи, а е потребно за комплетно заздравување на белите дробови“, напиша докторката на „Фејсбук“.

Таа им се заблагодари на сите лекари, сестри и на другите здравствени работници кои ѝ помогнале во нејзината борба со вирусот. Благодарна им е и на роднините и пријателите, кои ѝ испраќале храна и цвеќиња.

„Му благодарам на моето пошироко семејство и особено на потесното, на сестра ми, која го понесе најголемиот товар, и на син ми, кој ми беше и најсилниот мотив да се изборам во оваа битка“, напиша докторката.

Таа во изминатите недели редовно ги информира своите следбеници на „Фејсбук“ за состојбата и за тоа како ги минува деновите во изолација.