Македонија
Дополнителни мерки на Општина Карпош за превенција од коронавирусот
На денешната 37. седница на Советот на Општина Карпош, градоначалникот Стефан Богоев ги информира членовите на Советот за сегашната состојба, но и за сите мерки што досега се преземени и тековно самостојно ги презема локалната самоуправа на планот на превенција од ширењето на коронавирусот.
Освен веќе важечките препораки и протоколи што ги донесе Министерството за здравство, односно Владата на Република Северна Македонија, Богоев ги извести советниците за мерките што ги презема самата Општина, при што веќе од утре стапува во сила привременото укинување на приемните денови во секторите урбанизам, финансии и во даночното одделение, во Инспекторатот, како и во делот за социјала, во состав на Секторот за јавни дејности, сè со цел да се превенира понатамошно евентуално ширење на вирусот.
Како дополнителен механизам, Богоев ја нагласи теренската кампања, која почнува од утре во сите урбани и месни заедници, во рамките на која ќе се истакнат телефонските броеви, имејл-адресите и контакт-личностите од сите споменати сектори и одделенија со кои ќе може да комуницираат жителите на Карпош. Таа се воведува со цел да не застане целосно работата на локалната власт, туку работите и натаму да може да се вршат, но со што поголемо избегнување физички контакт за да не дојде до целосно блокирање на општинските активности.
Од утре, паралелно со оваа кампања, соопшти градоначалникот на Карпош, ќе се спроведе информативна теренска кампања за сите препораки, насоки и задолженија, кои вчера ги изнесе министерот за здравство, а се однесуваат на целата популација, односно сè она што се однесува на секој граѓанин, поточно како секој граѓанин да се заштити себе и да ги заштити оние околу него од опасноста од зараза и пренесување на коронавирусот.
Екипите за дезинфекција, дезинсекција и дератизација од Карпош од средината до крајот на февруари ги извршија своите задолжителни активности во сите градинки и училишта на територијата на општината. Сега тие екипи се во состојба на висока подготвеност да извршат и вонредна дезинфекција во сите училишта и градинки и во нивните клонови. Таа ќе се темпира пред повторниот почеток на работа на училиштата и градинките, односно неколку дена пред повторниот почеток на наставата.
„Економскиот оператор што работи и стопанисува со кујните во основните училишта ме информира, рече Богоев, дека досега во два наврата извршил дезинфекција, дератизација и дезинсекција на кујните, и тоа еднаш редовно и еднаш вонредно, пред два дена.
Службите што се грижат за хигиената во општината добија 100 литри дополнителни количини дезинфекциски средства и средства за заштита при работа.
Конечно, продолжува и миењето на улиците и јавните површини во две смени, а по потреба ќе се мијат и во трета смена на целата територија на локалната самоуправа. Истовремено, Градот ги дезинфицира контејнерите за ѓубре и просторот околу нив како потенцијални места за ширење зарази, ги информира советниците градоначалникот на Карпош.
Во натамошниот дел од седницата на Советот на Општина Карпош беше одлучено да се формира комисија за процена и утврдување на висината на штетата од природни непогоди и други несреќи. Всушност, станува збор за утврдување финансиски надоместок за направената штета од неодамнешното невреме, со кое беше зафатена локалната самоуправа, и од кое настанаа значителни материјални штети. Советниците ја изгласаа и одлуката за воспоставување меѓуопштинска соработка помеѓу Општина Карпош и Град Скопје за подготвителни работи, чистење и рамнење на теренот на потегот од булеварот Илинден до пешачкиот мост „Газела“, односно за предвидениот голем парк на кејот на реката Вардар (зад хотелот „Александар палас“), кој ќе се уреди хортикултурно и со урбани реквизити.
Советниците изгласаа неколку одлуки со кои се одобрија парични средства за Здружението за граѓани за спортски, едукативни, хуманитарни активности, забава и спорт, за изготвување и реализација на проектот од областа на спортот „Активности и ориентација во природа“, за Здружението на психотерапија и едукација АМИГДАЛА за изготвување и реализација на проектот од областа на детската, социјалната и здравствената заштита „Превентивна програма за работа со деца во градинки за надминување на последиците од разводот на родителите “, како и за Пливачкиот клуб „Делфини спорт“ за изготвување и реализација на проектот од областа на спортот „Делфините од Карпош пливаат“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Се вршат разговори и се прибираат докази по трагедијата во Карпош, соопшти Обвинителството
Дежурен јавен обвинител од Основно јавно обвинителство Скопје извршил увид на локацијата во скопската општина Карпош, каде попладнево животот го загубија жена и малолетно дете по пад од зграда.
Од Обвинителството соопштија дека е наредена обдукција на телата, како и обезбедување и анализа на сите траги и материјални докази, со цел да се утврдат причините и околностите на настанот.
„Јавниот обвинител нареди обдукција на телата на починатите и прибирање траги и докази.
Се вршат разговори со повеќе лица кои би можеле да имаат сознанија за причините за настанот“, соопшти обвинителството.
Македонија
„Денес потфрли целиот наш систем“: се огласи братот на жената која заедно со ќерката паднаа од зграда во Карпош
„Иако ми е тешко, сакам да се обратам во име на моето семејство – денес се случи убиство“.
Ова на социјалните мрежи го објави Александар Стојаноски, брат и вујко на починатите мајка и ќерка кои денеска починаа по пад од зграда во скопски Карпош.
Стојаноски во објавата се обрати во име на семејството, обвинувајќи дека институциите потфрлиле, посочувајќи дека жената пријавувала насилство, а институциите не реагирале.
„Иако ми е тешко, сакам да се обратам во име на моето семејство, денес се случи убиство
Денес потфрли МВР, Социјалните служби, денес потфрли целиот наш систем. После години на пријавувано семејно насилство, физичко и психичко насилство врз двете, закани, пријавувања, обид за убиство во сред државна институција, ги загубив внуката и сестрата.
Државата овозможи да згаснат млади животи, ве молам да не шпекулирате што се случило, никој нема да ми ги врати најмилите, но правдата ќе мора да се истера до крај и нема да запреме додека не се случи тоа!
Со оглед на тоа што и покрај сите пријави и случувања, институциите не постапија до сега, барам фокус од јавноста и медиумите за ова, нема да дозволиме да помине само како бројка, правдата мора да го стигне секој еден!
Сестра ми денес требала повторно да иде во социјално, за сите овие работи, а со внуката се слушнавме за Прочка, ми рече – вујче прости ми ако сум ти згрешила нешто … вујчино, прости ми ти, прости на овие неспособни институции, а јас вујче, нема никогаш да простам и да заборавам
Споделете, да не се заборави и изгуби низ нашиот систем“, пишува Стојаноски во објавата.
Македонија
Поради утрешната посета на Руте посебен режим на сообраќај во Скопје
Утре во официјална посета на Република Северна Македонија ќе престојува генералниот секретар на НАТО, Марк Руте, соопшти МВР.
Поради посетата, Единицата за безбедност на патниот сообраќај ќе преземе мерки за воспоставување посебен режим на сообраќај во централното градско подрачје на Град Скопје.
СВР Скопје апелира до сите граѓани учесници во сообраќајот да ги почитуваат наредбите и насоките што ќе ги даваат полициските службеници, со цел безбедно и непречено одвивање на сообраќајот.

