Македонија
Дојранското Езеро пак ќе се полни: со соларни панели Владата ќе ги намалува трошоците за струја од 2,5 милиона евра годишно на хидросистемот „Ѓавато“

По неколкугодишен прекин, Дојранското Езеро повторно ќе се полни со свежа вода преку хидросистемот „Ѓавато“. Премиерот Христијан Мицкоски денес од самото место најави дека цевките и пумпите на хидросистемот, кои се нефункционални четврта година по ред, најбргу што може ќе бидат санирани и тој повторно целосно ќе биде ставен во функција, а превисоката сметка за струја ќе се намалува со соларни панели.
„Инженери дојдоа на самото место да го скенираат просторот. Ова земјиште е сопственост на Република Македонија и тука практично во догледно време ќе бидат инсталирани соларни панели бидејќи сметките за електрична енергија сега се на ниво од 200 илјади евра месечно, тоа значи 2,5 милиона евра годишно. Со инсталирање на тие сончеви панели и батериски системи проценивме дека инсталираната можност ќе биде приближно два мегавата и четири мегават-часа батериски системи, сметките драматично ќе се намалат. Заштедата ќе биде огромна и средствата што ќе се заштедуваат ќе се користат за одржување на цевководот и за одржување на хидросистемот ‘Ѓавато’, а со тоа ќе се овозможи поголема достапност на вода за земјоделците за наводнување на земјоделските површини“, рече денес премиерот Мицкоски.
Дел од штетите на хидросистемот ќе ги поправи општествено одговорна компанија, чие име премиерот денес не го откри, но рече дека од вкупно десет пумпи што носат вода до резервоарот на „Ѓавато“, функционални се само две, а регистрирани се и пукнатини во цевководот.
Освен поправка на пумпите што ја носат водата до резервоарот, премиерот Мицкоски, во рамките на системското решение за хидросистемот, најави дека ќе ги обноват и пумпите што ја туркаат водата од резервоарот кон езерото.
„Во насока на ова системско пристапување, покрај овие бунари и санација на овие цевководи и пумпи, и пумпите што се потисни и кои ја туркаат водата кон Дојранското Езеро ќе бидат санирани. На следната седница на Владата ќе донесеме одлука фабриката за опрема и делови во склоп на РЕК ‘Битола’ да демонтира две, да ги санира и потоа да ги монтира. Во комуникација со инженерите од РЕК ‘Битола’ добив информација дека во рамките на десет дена од демонтажата до монтажата и тие ќе бидат целосно санирани“, рече премиерот Мицкоски.
Хидросистемот „Ѓавато“ е нефункционален од февруари 2022 година кога поради енергетската криза, Владата одлучи да ги исклучи пумпите за да се избегнат огромни сметки за струја. Министерството за животна средина тогаш објасни дека сметката за струја од еден милион годишно скокнала на 3,9 милиони, кои не може да си ги дозволат. Откога хидросистемот беше исклучен, жителите на Дојран постојано алармираа за нова еколошка катастрофа оти водостојот на езерото видливо опадна по само неколку месеци, а укажуваа и на кражби на пумпите и уништување на цевководите.
Следуваа цела низа состаноци, одлуки, најави за проекти и на централно и на локално ниво, поминаа парламентарните избори, на кои многу се зборуваше и се ветуваше за езерото и за враќање на хидросистемот, но тој остана нефункционален, а во меѓувреме водостојот беше во постојан пад.
Хидросистемот, кој веќе еднаш го спаси Дојранското Езеро од еколошка катастрофа, е дело на владата на ВМРО-ДПМНЕ на чело со Љубчо Георгиевски. По долготрајното празнење на езерото и екстремно нискиот водостој, во 1999 година владата донесе одлука за прогласување елементарна непогода и поведе иницијатива за спас на Дојранското Езеро, во чии рамки во 2001 почна изградбата на хидросистемот за доведување дополнителни количини вода од „Ѓавато“ кај Богданци, а првите количини беа испумпани во 2003 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Даниловски алармира: Глувците во Скопје шират ризик од болести, преминат е Рубиконот, потребна е итна интервенција

Епидемиологот проф. д-р Драган Даниловски предупреди дека Скопје се соочува со закана за јавното здравје, повикувајќи на итна, координирана интервенција на сите надлежни институции.
Тој потсети дека неодамна дете било каснато од глушец во училишен двор во чија близина имало насобран отпад, што, според него, е „црвена линија што не смееше да се премине“. „Преминат е Рубиконот. Нема назад“, порача Даниловски.
Епидемиологот предупредува дека во услови на постојано натрупан отпад и недоволна дератизација, градот станува биолошки резервоар на зарази.
„Купиштата ѓубре создадоа идеални услови за развој и размножување на глувци и стаорци – познати преносители на сериозни заразни болести: лептоспироза, хантавирус, па дури и бубонска чума. Тие болести се пренесуваат преку урината, изметот, плунката и болвите на глодарите. Познато е дека стаорците се размножуваат според експоненцијална прогресија: во период од само 18 месеци еден пар може да даде повеќе од еден милион потомци. Тоа е биолошки факт. Експоненцијалниот модел претпоставува неограничени ресурси како храна, вода и простор. Таа претпоставка во Скопје е исполнета!“, напиша Даниловски.
Додава и дека историјата нè потсетува дека неконтролираното ширење на глодари може да има катастрофални последици. Во Средниот век, меѓу 1347 и 1352 година, како пример во таа насока, бубонската чума („црната смрт“) однесе од 75 до 200 милиони животи – речиси половина од населението на Европа.
Повика на најитна, координирана интервенција на сите надлежни институции – по потреба и со прогласување вонредна состојба на делови од територијата на градот. Првенствено заради дезинфекција, дезинсекција, дератизација и отстранување на ризикот по јавното здравје.
„Во медицината постои еден етички принцип – Primum non nocere („пред сè, не прави штета“). Тој принцип мора да важи и надвор од медицината: за сите професии и институции што имаат допир со граѓаните. Причините – организациски, политички или финансиски – стануваат ирелевантни кога се доведува во прашање здравјето и безбедноста на децата и граѓаните.“ нагласи тој.
Македонија
ВМРО-ДПМНЕ: Арсовска да каже која одлука за „Комунална хигиена“ не била изгласана од нашите советници

Советничката група на ВМРО-ДПМНЕ и Коалицијата реагираше на тврдењата на градоначалничката Данела Арсовска, која утрово на социјалните мрежи напиша дека одговорноста за состојбата со ѓубрето низ Скопје е кај кадрите на ВМРО-ДПМНЕ и ВЛЕН во Советот на Градот и управниот одбор на ЈП „Комунална хигиена“.
Од партијата велат дека сите одлуки предложени од Арсовска и поврзани со претпријатието биле усвоени од страна на советниците на ВМРО-ДПМНЕ, и ја обвинуваат градоначалничката дека „измислува“ криза за политичка корист.
„Советниците на ВМРО-ДПМНЕ и Коалицијата гласаа за сите одлуки предложени од страна на Арсовска, а кои беа поврзани со ‘Комунална хигиена’. Апелираме да каже која одлука врзана со тековното работење на претпријатието не е изгласана од советниците?“ стои во реакцијата.
Од партијата додаваат дека тезата на Арсовска дека проблемот е намерно создаден е „површна, неточна и нелогична“.
„Зошто ВМРО-ДПМНЕ во сред изборна кампања би го ставило Скопје во ѓубре, ако се знае дека товарот и негативата ќе одат на сметка на ВМРО-ДПМНЕ? Арсовска треба да одговори зошто не се собира ѓубрето и што се прави со парите кои граѓаните уредно ги плаќаат“, наведуваат од партијата.
Тие побараа да се испита и кривичната одговорност на надлежните за хаосот со сметот, оценувајќи дека зад него стои „тајна коалиција која четири години ја поддржуваше Арсовска“.
„Ова го прави некој што сака да наштети на ВМРО-ДПМНЕ во изборна кампања. Ќе дојде крајот на ова и ќе има одговорност“, се вели во реакцијата.
Во објавата претходно, Арсовска обвини дека Советот не презел мерки за нормално работење на претпријатието, ниту ги разрешил управниот и надзорниот одбор на „Комунална хигиена“ кое е составено од кадри на ВМРО-ДПМНЕ и Влен, и надлежно за носењето на сите одлуки поврзани со работата на претпријатието.
Македонија
Мециновиќ прифати дебата на Телма телевизија

Амар Мециновиќ, кандидатот за градоначалник на Град Скопје од редовите на Левица, утрово на социјалните мрежи сподели дека прифатил покана за дебата на телевизија Телма.
„Добро утро Скопје, дебата на Телма за следниот четврток.
Со задоволство ја прифаќам поканата на телевизијата Телма за учество во дебатата за главниот град со мојот противкандидат.
Во духот на демократијата и витешката борба, сметам дека сите дебати се добродојдени“, напиша тој на социјалните мрежи.