Владата донесе одлука да обезбеди поддршка за медиумите и медиумските работници, кои се погодени од кризата што ја предизвика коронавирусот.

Вицепремиерот Бујар Османи рече дека е донесена одлука за државата да обезбеди 100 отсто покривање на придонесите на плата за сите вработени во медиумските куќи, а тоа ќе трае исто колку што траела вонредната состојба. Со оглед на напливот на лажни вести, според Османи, на овој начин ќе им се даде поддршка на оние што ги пренесуваат точните вести.

„По извршените консултации, ако сакате и преговори со Самостојниот синдикат на новинарите и медиумските работници, денес можам да констатирам дека постигнавме пристојно решение за тоа како ние како Влада можеме да обезбедиме поддршка за медиумските работници, кои заедно со нас ја водат битката против пандемијата. Донесовме одлука државата да обезбеди средства за 100 отсто покривање на придонесите на плата на вработените во медиумите и медиумските куќи вклучувајќи ги тука телевизиските и радиодифузерите, печатените медиуми, како и електронските интернет-портали. Времетраењето за кое ќе важи оваа одлука се изедначува со времетраењето на вонредната состојба, а почнува по нејзиното укинување. Задоволен сум што за реализација на оваа мерка одредивме и неколку услови со кои се заштитуваат токму работниците“, рече Османи.

За да се искористи мерката од Владата, има три услови, односно медиумите што им ги намалиле платите на вработените во кризата да ги вратат на нивото пред почетокот на вонредната состојба, да немаат отпуштено ниту еден вработен поради кризата и да имаат најмалку тројца вработени на неопределено време.

„Оваа мерка ќе може да ја искористат медиумите кои за време на кризата не отпуштиле ниту еден вработен поради кризата, а тоа право ќе го немаат ниту за времетраењето на субвенцијата или нема да отпуштаат ниту еден вработен најмалку во следните три месеци. Второ, оние медиуми што поради кризата им ги намалиле платите на одредени или сите вработени, за да може да ја искористат субвенцијата, ќе треба да им ги вратат платите на нивото пред почетокот на вонредната состојба. И, трето, бидејќи интересот на Синдикатот се самите вработени новинари и медиумски работници, право на оваа мерка ќе имаат медиумите што имаат најмалку тројца постојано вработени работници“, додаде Османи.

Според него, новинарите се во првите борбени редови заедно со полицијата, армијата, медицинарите и другиот кадар кој се бори со коронавирусот. За лажните вести, Османи рече дека се светска хибридна закана, која од општествен и безбедносен, сега се и здравствен проблем.