Македонија
„ДУИ во име на НАТО-фундаментализмот енергетски ќе ја пороби Македонија“, пратениците на Левицата се против штетните предлог-закони за нови централи
„За денешната собраниска седница, поднесени се четири предлог-закони во скратена постапка, кои се подеднакво погубни за енергетската независност на Македонија како владиниот проект за Чебрен. Подносител на овие закони е министерот од редовите на ДУИ, Крешник Бектеши, додека потписник е вицепремиерот Артан Груби“, велат од партијата Левица.
„Еден од предлог-законите се однесува на грчки „Митилинеос“, кој треба да гради когенеративна електрана во Гази Баба, за што ќе добие 50 милиони евра државна помош. Како што предупредуваат експертите, доколку биде усвоен ваквиот катастрофален закон, ЕСМ ќе биде обврзана да купува најмалку 85% од произведената електрична и топлинска енергија, по цени тројно повисоки од берзанските, затоа што никаде во договорот не е дефинирана цената на струјата. Со други зборови, профитот ќе завршува во странски држави, додека граѓаните ќе плаќаат тројно повисоки сметки!
Дополнително, државата е целосно оштетена со ваквиот договор, затоа што грчкиот инвеститор, после истекот на договорот од 30 години, не е обврзан да ја врати електраната во сопственост на државата. Грчкиот инвеститор ужива и низа привилегии, каде добива бесплатно земјиште од државата и цели десет години добивките од оваа когенеративна постројка нема да бидат подложни на нови даноци“, соопшти партијата Левица.
„Државата нема да има никаков удел во оваа инвестиција, додека истата ја помага со 50 милиони евра државна помош. Јасна е тенденцијата на амнестираните криминалци од ДУИ со ваквите скандалозни енергетски проекти. Како што изјави Битиќи, намерата на власта е целосно да ја исклучи централата „ТЕТО”, затоа што е руска инвестиција – иако истата беше клучна за време на енергетската криза. Ваквиот чекор е директно загрозување на енергетскиот суверенитет на Македонија во име на туѓи геостратешки интереси! Заради ваквите НАТО-вазални политики, Македонија е на дното во однос на гасификацијата, а директна последица од тоа е енормната загаденост на воздухот поради греењето на мазут и дрвја.
Доколку политичкото крило на УЧК по секоја цена сака да ја докаже својата посветеност кон НАТО, ги повикуваме да се приклучат на фронтот во Украина – наместо цела држава да ја ставаат во заложништво на приватниот капитал поради туѓи апетити и интереси!“, се додава во соопштението на партијата Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Шуто Оризари, Сарај и Кисела Вода
Од ЕВН Македонија АД известуваат дека денеска без електрична енергија ќе останат:
· во периодот од 08.30 до 10.30 часот дел од корисниците од ул. Брсјачка Буна, Демирхисарска и Пелагонија (општина Шуто Оризари)
· во периодот од 09.00 до 10.00 часот корисниците во с,Кондово кај пумпата за водовод (општина Сарај)
· во периодот од 10.00 до 13.00 часот дел од корисниците од ул.Михаил и Ефтихиј и ул.Георги Димитров (општина Кисела Вода)
Македонија
Претежно облачно со повремени локални врнежи од дожд
Претежно облачно со повремени локални врнежи од дожд, особено претпладне во југозападните и јужните делови (над 25 l/m² за 24 часа). Ќе дува слаб до умерен ветер од јужен правец. Минималната температура ќе биде во интервал од 7 до 11, а максималната ќе достигне од 12 до 17 степени.
Во Скопје, претежно облачно со повремени врнежи од дожд со послаб интензитет. Ќе дува умерен југоисточен ветер. Минималната температура ќе се спушти до 9, а максималната ќе достигне до 14 степени.
Времето во наредните денови
Под влијание на циклонска активност ќе продолжи периодот на променливо облачно време со повремени локални врнежи од дожд. Денеска во попладневните часови и во четврток врнежите ќе бидат со послаб интензитет. Во петок и во деновите од викендот повторно се очекуваат пообилни врнежи од дожд (над 30 l/m² за 24 часа), локално во форма на невреме со засилен ветер и услови за појава на грмежи. Од недела утринските и дневните температури значително ќе опаднат.
Македонија
Министерот Муцунски домаќин на министерот за надворешни работи на Сојузна Република Германија, Јохан Вадефул
Министерот за надворешни работи и надворешна трговија, Тимчо Муцунски, вчера во Скопје го пречека министерот за надворешни работи на Сојузна Република Германија, Јохан Вадефул, кој во рамки на својата работна турнеја на Западен Балкан ја оствари првата официјална посета на Република Северна Македонија.

На средбата министерот Муцунски изрази задоволство од посетата, потенцирајќи дека таа уште еднаш ја потврдува важноста што Германија ѝ ја придава на регионот на Западен Балкан, а особено на нашата држава. Посетата претставува јасна потврда за силната германска поддршка на европската перспектива на регионот.

Двајцата министри го поздравија интензивниот политички дијалог на високо ниво што двете земји го развиваат повеќе од три децении. Се согласија дека сеопфатната билатерална соработка во сите сектори претставува цврста основа за понатамошно интензивирање на дијалогот и развивање нови форми на партнерство.

Министерот Муцунски се заблагодари за континуираната и недвосмислена германска поддршка на евроинтегративниот процес на нашата земја. Тој го информираше министерот Вадефул за актуелните активности поврзани со европската агенда, реформските процеси, регионалната соработка и добрососедските односи, при што ја потврди силната посветеност на Владата кон спроведување на реформите и напредокот на патот кон членство во Европската унија.

Министерот Вадефул увери дека Германија останува силен поддржувач на интеграцијата на земјите од Западен Балкан во Европската унија, вклучително и на нашата држава. Тој нагласи дека целосната европска интеграција на регионот претставува најсилен гарант за долгорочна стабилност, мир и просперитет во Европа.

