Македонија
ДУИ: За Владата, Албанците се невидливи: ниеден Албанец во делегацијата во Обединетите Арапски Емирати
„ДУИ најостро ја осудува одлуката на премиерот и владата да заминат на еднонеделна посета во Обединетите Арапски Емирати – во Абу Даби и Дубаи – без присуство на ниту еден претставник од албанските политички партии во Владата. Овој чин претставува уште едно во низата понижувања и демонстрации на потценување кон коалициските партнери и уште поважно – кон албанскиот народ во земјата“, велат од ДУИ.
„Со оваа одлука, Владата јасно покажува дека албанските партии што одлучија да бидат дел од овој владин состав се сосема ирелевантни.
Дека се неми статисти, без тежина, без глас, без право на учество во носењето на државните политики. Оваа делегација не беше туристичка, туку државна – со директни импликации врз економските и политичките односи на нашата земја.
Оттука, отсуството на претставници на Албанските партии испраќа порака дека Албанците не се фактор кога се гради иднината на државата. Но ова не е само понижување за партиите – ова е уште поголемо понижување за сите Албанци.
Ги игнорираат нашите експерти, нашиот бизнис-сектор, нашата дијаспора и нашиот придонес во државата. Владата на тој начин создава две категории граѓани: едните што се носители на државата и другите – кои се третираат како гости во сопствениот дом.
ДУИ, како партија која со децении се борела за рамноправност, учество и достоинство на Албанците, не може и нема да молчи.
Ваквите постапки се уште една потврда дека Владата не ја сфаќа и не ја почитува суштината на мултиетничкиот карактер на државата.
Наместо рамноправност – добиваме игнорирање. Наместо партнерство – добиваме понижување.
Го повикуваме премиерот да се извини јавно пред Албанците и да даде отчет пред јавноста – дали ова е неговата визија за иднината?
И ги повикуваме албанските партии во Владата – да размислат дали со своето молчење стануваат соучесници во оваа дискриминација. ДУИ останува гласот и штитот на Албанците. И не смееме да дозволиме оваа политика на игнорирање и асиметрија да стане нормалност“, се наведува во соопштението на ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.
Македонија
Утре без вода делови од Карпош
Од ЈП Водовод и Канализација известуваат дека утре ( Четврток )поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхолмска.
Водоснабдувањето ќе биде прекинато од 09:00 часот до завршување со работните активности. (општина Карпош).

