Македонија
ДУИ: Силјановска – Давкова застана на страна на Владата во поткопувањето на мултиетничкиот карактер на државата

Во време кога мултиетничкиот карактер на Република Северна Македонија е под сериозна закана, претседателката Гордана Силјановска Давкова отворено се позиционираше на страната на Владата, занемарувајќи ги механизмите за заштита од етничка мајоризација, велат од ДУИ.
„Со нејзината изјава дека „не е важно колку пратеници Албанци ќе го напуштат парламентарното мнозинство, сѐ додека Владата има 61 пратеник – нема потреба од предвремени избори“, претседателката испраќа јасна порака дека етничкиот баланс и чувствителноста на коалициските партнерства не се дел од нејзиниот политички приоритет. Силјановска многу лесно ја напушти клучната улога која претседателот на државата треба да ја има – да биде фер арбитар на различните политички позиции со цел да ги обединува сите граѓани, без разлика на нивната етничка, политичка или било каква друга припадност. Наместо обединувач, таа избра да биде дел од партиската поларизација“, реагираат од ДУИ.
Наместо да биде глас на уставната обврска за градење соживот и консензус, велат од партијата, претседателката избра да стане гласноговорничка на едноетничката доминација.
„Овој пристап потсетува на темните времиња кога мајоризацијата, прикриена зад „мерит системи“ и „почитување на закони“, беше средство за системско потиснување на Албанците. Очигледно е дека сѐ додека не се обезбедат дополнителни уставни и политички механизми кои ќе ја гарантираат консензуалноста во изборот и дејствувањето на функцијата Претседател, оваа функција ќе остане перцепирана како исклучиво етничка – насочена само кон потребите на македонскиот народ. Доколку Силјановска Давкова не ја преиспита својата позиција, таа ризикува да биде призната само од дел од населението. Албанскиот народ нема да ја препознае нејзината функција како своја, туку како отуѓена и неавтентична за мултиетничкиот карактер на државата“, пишува во соопштението на ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Викендов нуркачи ќе го чистат дното на Охридското Езеро

Во организација на Нуркачкиот центар Амфора од Охрид оваа сабота ќе се изведе подводна еколошка акција за чистење на дното на Охридското Езеро од цврст отпад.
Во акцијата ќе бидат вклучени околу 100 нуркачи на Амфора и нуркачи од домашните и балканските нуркачки клубови.
Акцијата ќе започне на Градското пристаниште – Охрид во 11:00 часот.
„Оваа година нуркаме речиси на целото езеро. Членови на Нуркачкиот центар АМФОРА, нуркачи од македонските и балканските нуркачки клубови по четврт пат ја започнуваaт големата акција за отстранување на цврст отпад од дното на Охридското Езеро. Датум: 10.05.2025. Локации: Градско пристаниште, Љубаништа, Залив на коските, Камп Градиште, Калишта. Акција: Отстранување на пластика, метал и друг отпад од езерското дно“, пишува на профилот на „Фејсбук“ на Амфора.
Како што велат од таму, целта на акцијата е заштита на биодиверзитетот, подигнување на свеста и зачувување на природната убавина на eзерото.
Македонија
Општина Гази Баба доделува 2500 денари за пензионери со ниски пензии

Општина Гази Баба објави јавен повик за доделување на финансиска поддршка на пензионери со ниски пензии од општина Гази Баба.
Потребните услови кои треба да ги исполнуваат пензионерите се следни: Да биде жител на општина Гази Баба; Да биде примател на старосна, семејна, инвалидска пензија или социјална пензија (корисници на правото на социјална сигурност); Износот на пензијата која ја прима да не биде повеќе од 23.000 денари.
Потребна документација за аплицирање на јавниот повик е:
Барање за доделување на финансиска поддршка на пензионери во социјален ризик;
Фотокопија од лична карта;
Фотокопија од трансакциска сметка;
Чек од банка за примена последна пензија;
За корисници на социјална панзија – Потврда/Решение од надлежниот Центар за социјални работи (ЦСР Гази Баба).
Јавниот повик ќе се спроведува по принципот „прв дојден – прв услужен“ и ќе трае од 06.05.2025 до 20.05.2025 година, односно додека не се потрошат предвидените средства.
За оваа намена, општина Гази Баба има определено 7.695.000,00 денари.
Градоначалникот Стефковски во објава на социјалните мрежи ги повика сите пензионери кои ги исполнуваат условите да аплицираат и да ја искористат можноста за добивање на финансиска поддршка.
Македонија
(Фото) Кисела Вода со целодневна програма го одбележува својот патронат-Ѓурѓовден

Со света литургија во црквата „Св. Ѓорѓија“ во населбата Кисела Вода, на која присуствуваше градоначалникот Орце Ѓорѓиевски, денес започна одбележувањето на патрониот празник на Општина Кисела Вода. Голем број граѓани, верници се собраа во храмот посветен на заштитникот на општината, заеднички, со молитва да го започнат празничниот ден.
Одбележувањето на денешниот Ѓурѓовден, продолжува во паркот „Македонија“, каде што дечињата од градинките „Весели цветови“ и „8 Март“ учествуваат во креативна цветна работилница. Веднаш потоа, најмладите ќе уживаат во бесплатната театарска претстава „Плашливиот лав“, во изведба на театарот „Отпишани.
Во вечерниот дел од програмата, од 19:30 часот, во Домот на култура „Билјана Беличанец“ ќе биде отворена изложбата на уметникот Драган Кузмановски под наслов „Ѓурѓовденско будење“. За љубителите на филмот, вечерта е резервирана за бесплатна кино проекција на анимираниот филм „Кучиња во операта“, наменета за младите жители на општината.
„Одбележувањето на Ѓурѓовден, патрониот празник на Општина Кисела Вода, претставува значаен ден за сите нас – ден кога заеднички се навраќаме на традицијата, ги вреднуваме духовните вредности и ја истакнуваме посветеноста кон напредокот на нашата локална заедница. Св. Георгиј Победоносец, како заштитник на општината, е симбол на храброст, на верба и снага – вредности што се вградени и во нашиот општински идентитет и мисија. Во таа насока, денешната програма е внимателно осмислена за да го опфати секој граѓанин – од најмладите, преку учениците и културните работници, до сите љубители на духовноста и уметноста. Овој ден не е само симболично чествување, туку и потсетник дека со единство, посветеност и заедничка визија можеме да изградиме подобра, поквалитетна средина за живеење. Ги поканувам сите жители на Кисела Вода, како и сите скопјани, да бидат дел од прославата и да го споделиме празничниот дух во чест на нашиот патрон – Св. Ѓорѓија“, изјави градоначалникот Орце Ѓорѓиевски.