Македонија
„ДУИ ја сака власта по секоја цена, би направиле влада и со Мицкоски и Левица“ – Меџити отворено и за Груби

ДУИ е завршена приказна за мене, вели Изет Меџити предводникот на „Огнените“ и иницијаторот на новото политичко движење од албанскиот политички блок, во интервју за „Макфакс“. Појаснува дека со лидерот на ДУИ Али Ахмети немал контакт веќе осум месеци, по ѕидот, кој, како што вели, се издигнал меѓу нив.
На прашањето дали се плаши од сенката на Ахмети или на Груби по одлуката за излегување од ДУИ, Меџити нагласува дека е подготвен да ја плати политичката цена за неговите убедувања.
Вели дека е свесен оти на ДУИ им пречи окрупнувањето на опозицискиот фронт и тоа што нема да имаат монопол во албанскиот кампус.
„ДУИ комуницираа добро и со ВМРО-ДПМНЕ до скоро, тие уште комуницираат и со Никола Груевски и со Сашо, немаат проблем да се прегрнат и со Вучиќ, Вулин и Дачиќ. Утре без никаков проблем би направиле влада со Мицкоски, без размислување. Тие сакаат по секоја цена да се на власт за да се заштитат, па и Левица да биде внатре“, истакнува Меџити.
Груби го познава од училишните денови, и како што вели, за него, разочарувачки е на крај и после долгото искуство, Ахмети да заврши по паметот на Груби.
„До сега де-факто лидер во ДУИ е Груби. Ахмети му има препуштено се. Ахмети е само формално лидер, песните ги пушта Артан наместо него. Функцијата која ја има, бара многу работа, да се бави со политика, но човекот за жал не знае да го прави тоа. Жално е тоа што го прави. За мене не е чудно оти класен другар ми беше, го познавам добро. Во овие 3-4 години не видовме ништо освен овие концертите што ги организира како да води уметничко естрадно друштво“, вели Меџити.
Според него, Груби и нешто добро кога прави, тоа звучи и изгеда лошо, алудирајќи притоа на Коридорот 8 и посочувајќи ја корупцијата и пренагласената политизација на проектот.
Дали власта има мнозинство за уставните измени, ќе имаме ли жежок период по прекројувањето на политичката карта во државата, дали Меџити очекува дополнителни притисоци по најавата за нова партија, за ова и поопширно во интервјуто за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ: Албанците се недоволно застапени во неколку клучни институции

Демократската унија за интеграција изразува длабока загриженост во врска со најновите извештаи за недоволната застапеност на Албанците на одлучувачки позиции во државните институции на Република Северна Македонија, велат од ДУИ.
„Според анализа објавена во неколку медиуми, Албанците се недоволно застапени во неколку клучни институции, вклучително и Претседателството, Министерството за дигитална трансформација, Министерството за спорт, Народната банка, МЕПСО и Агенцијата за администрација.
Овој диспропорционален однос е особено загрижувачки по укинувањето на механизмот „Балансер“ од страна на Уставниот суд на 9 октомври 2024 година, кој претходно обезбедуваше правична застапеност на заедниците во државната администрација. По оваа одлука, отсуството на ново законско решение доведе до исклучување на Албанците од клучните одлучувачки позиции.
ДУИ потенцира дека правичната и соодветна застапеност на сите заедници претставува темелен столб на Охридскиот договор и предуслов за еднакво и демократско општество. Апелираме до надлежните институции итно да преземат мерки за надминување на оваа нееднаквост и да обезбедат правична застапеност на Албанците на сите нивоа во јавната администрација.
ДУИ останува посветена на унапредувањето на еднаквоста, правичната застапеност и целосната интеграција на Албанците во институционалниот живот на државата“, пишува во соопштението на ДУИ.
Македонија
(Видео) Петрушевски: Филипче лично имал профит од препродажбата на трипати поскапиот јаглен од Грција на ЕСМ

Венко Филипче лично имал профит од препродажбата на трипати поскапиот јаглен од Грција на ЕСМ од 2022 до 2024 година, рече денеска на прес-конференција Бране Петрушевски, пратеник на ВМРО-ДПМНЕ.
„Најскап договор за јаглен, кој го склучила ЕСМ, а е по цена од 82.5 евра за еден тон со вкалкулиран ДДВ, е со компанијата „Зобек мининг груп“. Договорот со „Зобек мининг“ бил склучен во септември 2023 година, првично за испорака на 200 илјади тони јаглен за РЕК „Битола“ во рок од една година. Со два анекса количината на испорака била зголемена, прво за 40 илјади тони, а потоа за уште 48 илјади тони, со што доаѓа до вкупна цифра од 288 илјади тони. Според официјално соопштение од „Лигниторихиа Ахладас“, рудникот во Грција каде се копал јагленот, пратено до грчкото Министерство за енергетика, а до кое дошле истражувачките новинари од Македонија, од овој рудник во 2023 година во Македонија биле продадени 768 827 тони лигнит, по цена помеѓу 28-30 евра по тон. Тоа е три пати помалку од тоа што Зобек мининг груп продава“, рече Петрушевски.
Тој на прес-конференцијата истакна дека „Зобек мининг груп е компанија која води директно до Венко Филипче“.
„Ова е возилото Ауди Q8 кое Венко Филипче го вози од изборната кампања наваму. Истото е купено на лизинг од компанијата Зобек мининг груп и дадено на Венко Филипче. Газдата на Зобек мининг груп за новинарите потврдил дека тој го купил аудито на Венко Филипче, преку фирмата која препродавала три пати поскап јаглен на ЕСМ и дека сега возилото е на Филипче. Ова е фрапантно и безобразно. Народот плаќа поскапа струја денес за Венко Филипче да вози Ауди Q8. И истиот овој Венко Филипче без грам срам води политичка партија и бара гласови“, кажа пратеникот Петрушевски.
Македонија
(Видео) Филипче: Бугарија треба да каже дека нема да има барања на непринципиелна основа

Бугарија треба да каже дека нема да има барања на непринципиелна основа, рече претседателот на СДСМ, Венко Филипче, на маалска средба во Прилеп.
„Бугарите треба да направат навистина еден чекор, еден нивни сосед којшто имаа аспирации да стане земја членка во Европска Унија да се однесуваат по европски. Ако ние стравуваме дека утре може да има некаква блокада на непринципиелна основа, на основа на јазикот, идентитетот итн нека покажат европско однесување и нека кажат дека нема да го има. Толку. Нека кажат не, ние сакаме нашите соседи да се во Европа, еве ќе ви дадеме поддршка, не се грижете нема да има такви барања. Е тоа е вистинска добрососедска политика не само да притискаш некого што е помал и послаб од тебе“, рече Филипче.
Тој додаде дека СДСМ работи и лобира кај сестринските партии од ПЕС за поддршка на извештајот потенцирајќи дека благодарение на храбрите и државнички политики на владите на СДСМ, денес македонскиот јазик е признат во ЕУ.
„Ние нашиот идентитет и јазикот го потврдивме. Се потпиша договор за првпат со Европска унија – Фронтекс договорот, на македонски јазик, нема ѕвездички, нема фусноти – е тоа е патриотизам“, порача претседателот на СДСМ, Венко Филипче.