Македонија
Европска недела на тестирање за ХИВ: 35% од луѓето со ХИВ не се свесни дека го имаат вирусот

Од 22 до 29 ноември, под мотото „Тестирај. Лекувај. Превенирај“ се одржува Европската недела на тестирање за ХИВ кон која, веќе шеста година по ред, се приклучува и здружението ХЕРА – Асоцијација за здравствена едукација и истражување.
ХЕРА е само една од над 750 организации од 53 европски држави кои учествуваат во активностите на Европската недела на ХИВ-тестирање со цел да се зголеми пристапот и свесноста за важноста од тестирањето за ХИВ. На тој начин, информациите за превенција на ХИВ стануваат подостапни, повеќе луѓе можат да го дознаат својот ХИВ-статус и да добијат пристап до терапија, грижа и поддршка.
Денес, соопшти ХЕРА, се проценува дека во нашата држава 35% од луѓето со ХИВ не го знаат својот ХИВ-позитивен статус, односно не се свесни дека се ХИВ-позитивни.
„Подобро е да се знае својот ХИВ-статус што поскоро, затоа што денес со терапијата за ХИВ, која е достапна и кај нас, луѓето со ХИВ може да живеат квалитетно и долго доколку се дијагностицирани навремено. Луѓето што живеат со ХИВ имаат речиси изедначен животен век со лицата кои немаат ХИВ, доколку добиле навремен третман. Редовното земање на терапијата за ХИВ е и еден од најефективните начини на превенција на вирусот, бидејќи луѓето кои редовно примаат терапија, имаат недетектибилно ниво на вирусот, со што целосно се спречува преносот на ХИВ по сексуален пат, дури и доколку не се користи заштита, односно кондом. Затоа е толку важно навременото тестирање“, велат од ХЕРА.
Во рамки на годинешната Европска недела на тестирање за ХИВ, од денес до следниот петок во Младинскиот центар на ХЕРА „Сакам да знам” на Водно ќе биде достапно бесплатно и доверливо тестирање и советување за ХИВ со брзи тестови, секој работен ден од 17 до 21 часот и за време на викендот од 11 до 15 часот. За подетални информации, граѓаните можат да се јават на телефонскиот број 02/3176 950.
Европската недела на тестирање за ХИВ започнува денес, со настанот „Минус или плус – се живее со секој статус“ со почеток во 19 часот во кафе-бар „Котур“. Настанот е од отворен карактер, а ќе се состои од проекција на неколку кратки видеа со лични приказни за животот со ХИВ и разговори околу нормализирање на разбирањето за ХИВ денес.
Дали треба да направат ХИВ-тест и други информации поврзани со ризикот од пренос и заштитата од ХИВ, граѓаните може да дознаат и на мобилната андроид апликација Направи ХИВ-тест. Преку неа може да се информираат за сите локации низ земјата каде што може да се направи бесплатно и доверливо тестирање и советување за ХИВ. Апликацијата може бесплатно да се преземе на Google Play.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Состојбата со пожарите е под контрола, ангажирани се и Армијата и полицијата, вели Мицкоски

Премиерот Христијан Мицкоски, одговарајќи на новинарско прашање во врска со состојбата со пожарите и тоа како државата се справува со ситуацијата, изјави дека е повикан ЕУ-механизмот за помош, но мобилизирани се сите капацитети во Македонија за справување со пожарите и состојбите сега се под контрола.
„Имаме од 30, па и повеќе пожари секој ден. Вчера беа над 50 пожари. За повеќето од нив постојат основани сомневања дека се подметнати или, пак, се случиле од негрижа. До сега можам да кажам дека во јули ја држиме работата целосно под контрола. Во функција се сите оперативни летала што ги имаат Дирекцијата за заштита и спасување, Армијата и полицијата. Во функција се и оние возила, специјални возила, условно да кажам, што ги подготвивме бидејќи знаевме што нè очекува вакво лето. Го активиравме и европскиот механизам, мислам дека е активиран уште пред неколку дена“, посочи Мицкоски.
Огнена стихија има насекаде во Европа, рече премиерот, потенцирајќи за медитеранскиот дел.
„Но имајте предвид дека ваков тип на огнена стихија има насекаде во Европа, зборувам во медитеранскиот дел. Во Грција има жртви, огромни пожари, цели населби се зафатени. Во Турција исто така има жртви и повредени, цели населби, цели градови. Албанија, Косово, Босна, Хрватска, Србија, до пред некој ден знам дека имаше речиси 240 на ден. Шпанија, Италија, Кипар исто така. Така што, во овој момент нема слободни воздухоплови кои би биле дел од тој ЕУ-механизам што би помогнал. Во моментот повеќе од 200 припадници на Армијата се на терен. Полициските службеници, практично полицајците, ги возат оние специјалните возила, БТР, „пинцгауери“ и „хермелини“. Се организираме, работата е под контрола. Пожари ќе има цело лето, ќе има и во август. Во овој момент немаме некаде огнена стихија што е надвор од контрола“, објасни тој.
Македонија
ДУИ: Владата веднаш да ја укине антиуставната и незаконска одлука што ги дискриминира општините и ја исклучува дијаспората

Демократската унија за интеграција изразува загриженост и револт поради како што истакнуваат, дискриминаторската одлука на Владата за намалување на бројот на советници, со што директно се оштетуваат општините во кои значителен дел од населението се Албанци.
Од партијата на Ахмети додаваат дека уште во првата недела од својот мандат, оваа Влада презела незаконска и неуставна акција, еднострано менувајќи ја методологијата за пресметка на процентот на населението преку исклучување на „нерезиденти“, што во пракса значи исклучување на дијаспората.
„Како резултат на тоа, процентот на Албанците во државата беше вештачки намален од 29,5%, според пописот од 2021 година, на 24,3% – процент што е дури и понизок од оној од пописот во 2002 година, кога Албанците сочинуваа 25,17% од населението.
Оваа намерна статистичка манипулација веднаш беше искористена во формулата на балансерот, со што Албанците беа намалени за 5,2%, а потоа и за деформирање на нивното претставување во повеќе од 20 општини преку намалување на бројот на советници во овие единици на локалната самоуправа. Оваа одлука претставува директно кршење на член 34 од Законот за локална самоуправа, каде јасно стои дека бројот на советници се определува врз основа на бројот на жители, а не врз основа на нивниот резидентен статус“.
Спорната одлука, велат од ДУИ, е спротивна и на Уставот на државата, како и на основните принципи на еднакво претставување и право на учество. „Поради тоа, ние инициравме постапка за оценка на уставноста, по што Уставниот суд донесе одлука во наша полза, констатирајќи дека институциите не смеат да ги игнорираат нерезидентните граѓани, бидејќи тоа е спротивно на духот на еднаквост и инклузивност што го гарантира Уставот.
Сепак, и покрај оваа јасна одлука на Уставниот суд, Владата сè уште нема преземено конкретни чекори за укинување на дискриминаторската одлука и за враќање на легитимното право на општините за пропорционално претставување. Обидите за вметнување на оваа дискриминација и во Законот за локална самоуправа пропаднаа поради отсуство на двојното мнозинство (Бадинтер), но политичката волја за наметнување на оваа неправда останува очигледна“.
ДУИ бара Владата веднаш да ја укине антиуставната и незаконската одлука, да го врати бројот на советници согласно реалните податоци од пописот и во согласност со одлуката на Уставниот суд и законот.
Сега е моментот, додаваат од оваа партија, кога може да се дејствува за да се спречат сериозни последици врз легитимноста на претстојните локални избори.
Според ДУИ, доколку Владата не ја коригира оваа неправда, тогаш одговорноста ќе падне врз сите оние кои, со своето молчење или соработка, го легитимираат институционалната дискриминација против граѓаните и исклучувањето на дијаспората од јавниот живот.
„Во спротивно, ние како политички субјект ќе бидеме принудени да ги искористиме сите правни и институционални средства за поништување на оваа одлука и за заштита на легитимните права на општините и на нашите граѓани“.
Македонија
Мицкоски за интерпелацијата на Коцевски: Јас не ги менувам ставовите преку ноќ

На еден ден пред расправата за интерпелацијата на државниот јавен обвинител Љупчо Коцевски, поднесена од партијата Левица, премиерот Христијан Мицкоски вели дека не го менува ставот ниту тој како човек ниту, пак, го менува ставот партијата ВМРО-ДПМНЕ. Мицкоски уште во март, по пожарот во Кочани, рече дека ќе им даде шанса и на Коцевски и на другите обвинители да работат и да сработат имајќи ја предвид чувствителноста на ситуацијата.
„Јавноста ќе види утре. Ние како политичка партија и јас како човек не ги менувам ставовите преку ноќ“, рече премиерот Мицкоски одговарајќи новинарски прашања по свеченото отворање базен во ООУ „Невена Георгиева-Дуња“ во Кисела Вода.
Интерпелацијата за Коцевски ја поднесе партијата Левица во јуни поради селективност во истрагата за пожарот во Кочани, политичко влијание во работата на Обвинителството, функционален хаос во Вишото јавно обвинителство Скопје и непостапување по службена должност за дивоградбите во Скопје.
Пратениците утре ќе расправаат за интерпелацијата на Коцевски во рамките ја 64. пленарна седница на Собранието.
Обвинителот Коцевски ги отфрли сите наводи во интерпелацијата и рече дека функцијата ја врши чесно и одговорно.