Македонија
Единствена Македонија: Со редовните претседателски избори во март да се одржат и предвремени парламентарни избори
Единствена Македонија побара предвремени парламентарни избори во контекст на извештајот на Европската комисија и извештајот на Русија, а кои би се одржале заедно со предвремените претседателски избори по претстојната одлука за аболиција и оставка на претседателот Ѓорге Иванов.
„Вчера видовме една голема манипулативна лага од Зоран Заев, кој се обиде на извештајот на Европската комисија да му даде историско значење иако се работи за вообичаена препорака која претставува неизвесен факт и обично ветување за преговори за членство во ЕУ кое не може со сигурност да се тврди дека и ќе се реализира во наредните петнаесетина години.
Истовремено, Зоран Заев свесно премолчи дека прифаќањето на препораката на Европската комисија од страна на Европскиот совет претпоставува една претходна постапка на целосно обезличување на Македонците со менување на името и идентитетот на македонскиот народ.
Од друга страна, условно кажано, имаме своевиден извештај од Русија, која нуди алтернатива за Македонија и другите држави од Балканот. Значи, на политичкиот терен во Република Македонија сега имаме кристално чиста ситуација.
Од една страна е партијата „Погреб за Македонија“, која ја сочинуваат СДСМ и ВМРО-ДПМНЕ и кои велат дека Македонија нема алтернатива за НАТО и ЕУ и нивните либерални вредности, како што се хомосексуализам, истополови бракови, посвојување деца од истополови бракови, дрогирана младина, редефинирање на државното уредување, промена на македонското име и идентитет.
Од друга страна е Единствена Македонија, која вели дека Македонија има алтернатива, што подразбира стратешки сојуз со Русија и членство во Евроазиската економска унија, што се темели на традиционализмот, национален и религиски идентитет на нациите, почитување на семејните вредности, почитување на територијалниот интегритет, суверенитет и унитарност на Република Македонија, почитување на исконското македонско име и идентитетот на македонскиот народ.
За вака крупно национално и државно прашање за иднината на Македонија и Македонците нема мандат да одлучува ниту еден орган на државната власт. За ваква одлука мандат има единствено македонскиот народ и сите граѓани на Република Македонија.
Затоа, Единствена Македонија бара предвремени парламентарни избори на кои народот ќе каже кој пат ќе го фати Република Македонија.
Во однос на времето, најрационално е предвремени парламентарни избори да има заедно со претседателските избори. Едната варијанта е со редовни претседателски избори во март в година да се одржат и предвремените парламентарни избори.
Меѓутоа, многу е веројатно претседателските избори да бидат предвремени бидејќи претседателот Иванов веќе е при крај со размислувањето да даде помилување за Никола Груевски и неговата група и веднаш да поднесе оставка за да го избегне притисокот од странците како во случајот со аболицијата од пред две години и при давањето на мандатот на Заев кога странски емисари упаѓаа во резиденцијата на Водно и го премислуваа Иванов.
Како и да е, ајде да се соочиме со народот на избори за историската иднина на Република Македонија – членство во НАТО и Европската Унија или стратешки сојуз со Русија и членство во Евроазиската економска унија“, порача претседателот на партијата, Јанко Бачев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.