Кој е Бране Петрушевски да одговара на прашања упатени до МВР и Јавното обвинителство, прашува СДСМ.

„Скандалозно е ова што го прави власта. Поминаа два дена од поставените легитимни прашања на СДСМ кон МВР и Јавното обвинителство, а досега одговори нема.

Дали актуелните командири, инспектори и раководството на БЈБ и МВР во ОВР Кочани и СВР Штип – кои биле одговорни по закон да го обезбедат настанот – се изземени од истрагата?

Дали е точно дека сите седум вработени во МВР кои се приведени, не биле на функции вечерта на трагедијата?

Како е можно да не се истражуваат лица кои вечерта биле на одговорни позиции со законска должност да постапат – но не го сториле тоа?

Зошто актуелниот директор на ДПИ, Влатко Стојкоски не е опфатен со истрагата?

За овие легитимни прашања молчи Јавното обвинителство, молчи МВР, во нивно име одговара ДПМНЕ.

Тоа што наместо институциите одговара партијата ДПМНЕ уште повеќе ги подгрева сомнежите за селективна правда и политички манипулации со случајот.

Селективната правда не е никаква правда. Граѓаните очекуваат неселективна правда и одговорност од сите!

А ДПМНЕ нема што да одговара во името на институциите“, се вели во соопштението на СДСМ.

Левица алармира за скандалот со пациент кој избегал од психијатриската болница во Демир Хисар, при што повредил едно лице во Прилеп.

Лицето, како што истакнуваат од партијата, издржувало мерка задолжително психијатриско лекување, а при бегството се упатил во Центарот за социјални работи во Прилеп каде што пукал со пиштол кон вработена во Центарот, а имало и расправија со директорот на Центарот. Според Левица, против сторителот биле водени соодветни кривични постапки, но и покрај сите информации за него, сепак лицето успеало да избега, што е сериозен индикатор за аномалиите во работењето на оваа установа. Го поставуваат прашањето, како бегалецот успеал неколку дена да биде надвор од болницата.

Левица бара итно разрешување на Жан Лозановски, директорот на ЈЗУ Психијатриска болница во Демир Хисар, како кадар на коалициониот парнер – ЗНАМ.

„Поради крајно лошо менаџирање со болницата, таа со години наназад, но и денес се наоѓа во очајна состојба.

Претходно, за оваа болница и вработените алармираа за очајната состојба и лошото менаџирање кои се континуирани и по доаѓањето на директорот Жан Лозановски. Ниту една машина за перење не е во функционална состојба и вработените се принудени да позајмуваат алишта за пациентите од Црвениот крст. Дополнително, вработените кои работат со години со договори на определено време, секоја година се во неизвесност дали ќе им биде продолжен договорот.

После ваквиот скандал со бегство на пациент, при што беше загрозена безбедноста и на други лица, потребно е министерот Таравари веднаш да го разреши директорот Лозановски и да се утврди одговорност за сериозниот пропуст поради кој дојде до загрозување на животот на едно лице“, потенцираат од Левица.

Собранието преку соопштение се огласи во врска како што велат, неточните информации и широко распространетите обвинувања за одложување на работата на Собранието минатата и оваа недела.

Појаснуваат дека ваквата одлука е донесена како резултат на согласност на сите присутни пратенички групи на координативната средба одржана на 24.03.2025 година.

„Привременото одложување на активностите на Собранието беше гест на почит кон трагедијата во Кочани, каде што животот го загубија млади луѓе и израз на солидарност со семејствата на жртвите и со сите граѓани погодени од оваа катастрофа.

Повторуваме дека оваа одлука не е резултат на какво било индивидуално или еднострано политичко одлучување, туку е одраз на заедничката институционална волја на сите пратенички групи да дејствуваат со чувствителност во момент на национална жалост“.

Собранието, како што информираат од таму, ќе продолжи со работа следната недела.