Македонија
Елези: Над 300 деца во Желино ќе добијат подобри услови за образование

Над 300 деца во општина Желино ќе добијат подобри услови за образование, преку реконструкција на училиштето во село Палатица, додека локалното население ќе добие подобра инфраструктура преку реконструкција на локалните патни правци Групчин и Ново Село. Преку Проектот за подобрување на општински услуги – МСИП, кој го спроведува Министерството за финансии со поддршка на Светска банка, на општина Желино ` се доделени 21 милион денари за спроведување на овие проекти.
Денеска заменик-министерката за финансии, Ширет Елези, и градоначалникот на општина Желино, Блерим Сејдиу, извршија увид во реализацијата на проектите. Заменик-министерката Елези при посетата на училиштето „Фан Ноли“ во Палатица истакна дека Проектот за подобрување на општински услуги – МСИП има за цел да обезбеди подобри услови за сите, било да живеат во урбана или рурална средина.
„Преку Проектот за подобрување на општински услуги – МСИП, 300 деца кои учат во основното училиште во Палатица, општина Желино, ќе добијат подобри услови за образование, односно ќе добијат училиште кое ќе биде опремено со нов училиштен мебел, каде кровот нема да прокиснува и кое зимно време ќе биде топло. Ова значи многу за локалното население, бидејќи решава реални проблеми и креира реално подобри услови за живот за граѓаните”, рече Елези.
Преку проектот ќе се реконструираат и локалните патни правци кај Групчин и Ново Село во вкупна должина од околу 3 километри. Со реконструкција на овие патни правци ќе се подобри поврзаноста со Тетово и Скопје.
Градоначалникот на Желино, Сејдију, истакна дека општината учествува во кофинансирање на проектите со околу 10 милиони денари, како и дека поддршката преку Проектот за подобрување на општинските услуги – МСИП е од големо значење за неговата општина. Тој посочи дека преку реализација на овие проекти ќе се подобрат и условите за образование во општината, како и локалната инфраструктура.
Проектот за подобрување на општински услуги-МСИП, Министерството за финансии го спроведува со поддршка на Светска банка и Европска комисија. Тој се состои од финансиска поддршка на општините за реализација на капитални проекти, како: реконструкција и изградба на патишта, на училишта и градинки, набавка на механизација за општините, изградба на комунална инфраструктура и други капитални проекти. Целта е преку вложување во општините, да се подобрат условите за живот за сите граѓани во земјава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за тешки товарни возила на неколку патни правци

Од 19:45 часот на магистралниот пат Маврово – Дебар воведена е забрана за тешки товарни возила поради задржување на снег на коловоз, извести АМСМ.
Од 19.55 часот воведена е забрана за тешки товарни возила и за патниот правец Гостивар – Стража, додаваат од АМСМ.
Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.
Македонија
Судијата за врски на Франција за балканскиот регион во посета на Јавното обвинителство

Јавниот обвинител на Република Северна Македонија Љупчо Коцевски денеска се сретна со францускиот амбасадор Кристоф Ле Риголер, на средба за претставување на новоназначениот судија за врски на Република Франција за регионот Сирил Лакомб.
Тој е еден од вкупно 20 судии за врски на Франција во светот, а од државниот обвинител Коцевски се информираше директно за состојбите во обвинителството. Притоа, судијата за врски Лакомб понуди поддршка со оперативна и техничка помош, но и експертиза преку француските правосудни органи.
Бидејќи и самиот бил јавен обвинител и лице за врски на Република Франција со Европравда, Лакомб се интересираше и за постапката за делегирање на обвинителот за врски на Република Северна Македонија во оваа меѓународна институција.
Јавниот обвинител Коцевски, од своја страна, изрази благодарност за континуираната француска поддршка за работата на Јавното обвинителство.