Македонија
ЕСЕ: За да се избегне неконтролирано ширење на Ковид-19 во Шуто Оризари, бараме итно да се преземат мерки

Неколку здруженија побараа итно да се преземат мерки во Шуто Оризари по потврдениот прв случај на заболен од коронавирус во оваа скопска општина.
„По најновите случувања во општината Шуто Оризари, односно по дијагностицираното лице позитивно на Ковид-19, три семејства со повеќе членови се ставени во задолжителна самоизолација. Семејствата живеат во една од најзагрозените населби во општината Шуто Оризари – Брсјачка Буна. Проблем претставува што семејствата живеат во импровизирани живеалишта, во супстандарни услови, без проточна вода, канализација и струја. Воедно, повеќето од нив делат иста просторија, без можност за остварување физичка дистанца. Овие лица немаат никакви можности да ги применат основните мерки за заштита од Ковид-19 при појава на случај на заболен член во семејството, како што се физичка дистанца, редовно миење на рацете, дезинфекција на површините, носење заштитни маски и сл. Доколку не се преземат навремени мерки, постои огромен ризик голем некои од овие лица да заболат од Ковид-19“, велат од здруженијата.
Тие сметаат дека поради тоа што жителите немаат можност да ги применат основните мерки за заштита од ширење на Ковид-19, постои голем ризик за ширење на инфекцијата во целата населба, па и пошироко во општината.
„Со цел да се избегне неконтролирано ширење на епидемијата со Ковид-19 во најзагрозените населби и во целата општина Шуто Оризари, бараме итно да се преземат координирани мерки од страна на Владата, главниот кризен штаб, Министерството за здравство, Министерството за труд и социјална политика, единицата на локална самоуправа на општината Шуто Оризари и кризниот штаб во рамките на Општина Шуто Оризари“, се вели во заедничкото соопштение на Здружението за еманципација, солидарност и еднаквост на жените – ЕСЕ, Здружението за развој и унапредување на ромската заедница – „Романо Чачипе“ и Иницијативата за развој и инклузија на заедниците – ИРИЗ, чија работа е поддржана од Фондацијата „Отворено општество Македонија“.
Тие бараат Владата да обезбеди и опреми соодветни објекти за изолација, да се воспостави протокол со цел при појава на идни случаи на лица заболени од Ковид-19 веднаш да се направи процена на условите во кои живее семејството, да се направи тестирање на Ковид-19 на примерок на лица, соодветно на епидемиолошката процена, од ранливата населба во Шуто Оризари, каде што веќе има семејства во самоизолација, да се обезбеди тим кој редовно ќе им мери температура на лицата од ранливите населби, да се отвори пункт за земање брисови за дијагностика на Ковид-19 во рамките на ЈЗУ Здравствена станица „Шуто Оризари“ и да се спроведува здравствена едукација, особено совети за превенција, правилна самоизолација, грижа за лице заболено од Ковид-19 и сите други потребни информации.
Здрженијата бараат и да се спроведува и редовна дезинфекција на улиците, на жителите што немаат проточна вода во домаќинствата во целата општина редовно да им бидат делени средства за дезинфекција на база на алкохол, а на сите граѓани да им се поделат маски за заштита, со информации за правилна употреба на маските и да се соопштува бројот на заболени и починати лица од Ковид-19 во општината Шуто Оризари, со што ќе се овозможи соодветно преземање превентивни мерки, особено во најранливите населби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се’ уште гори кај Јасен, активни пожари на четири локации низ Македонија

Денес до 18 часот се регистрирани вкупно 10 пожари на отворен простор. Од нив, четири се активни и моментално се гаснат, додека шест се целосно изгаснати.
Активните пожари се лоцирани во различни делови на земјата. Еден од нив е во Националниот Парк Јасен во општина Македонски Брод, каде што гори мешана шума. Друг пожар е пријавен во село Теарце, општина Теарце, каде што се гори ниска вегетација. Во општина Сарај, во село Радуша, исто така се активни пожари кои зафаќаат сува трева и мешана шума. Четвртиот активен пожар е во општина Кичево, на потегот помеѓу селата Челопејци и Миокази, каде исто така гори мешана шума, соопшти Центарот за управување со кризи.
Надлежните служби постојано апелираат до граѓаните да ги почитуваат сите препораки и забрани за палење оган на отворен простор, со цел да се спречи ширење на пожарите и да се заштитат природните ресурси.
Македонија
Најмногу туристи ни дојдоа од Турција во јуни

Според податоците од Државниот завод за статистика, во јуни годинава во земјата биле регистрирани вкупно 126.415 туристи, од кои 20,1 отсто се домашни, а 79,9 проценти странски туристи.
Од странските туристи кои ја посетиле земјата во јуни 2025 година, најмногу дошле од Турција – вкупно 34.366 лица, следат Србија со 8.897, Германија со 8.011 и Холандија со 3.604 туристи.
Во периодот јануари – јуни 2025 година, во однос на истиот период од претходната година, вкупниот број на туристите е зголемен за 13,5%, со намалување од 2,5% кај домашните туристи и зголемување од 19,7% кај странските туристи. Вкупниот број на ноќевања во првото полугодие се зголемил за 8,5%, при што кај домашните има мало намалување од 1,1%, а кај странските зголемување од 13,3%.
Македонија
Забрана за нови вработувања, поткуп, користење државен имот за кампања – ДКСК потсетува на забраните од денот на распишувањето на изборите

Државната комисија за спречување на корупцијата (ДКСК) информира дека во периодот од распишувањето на локалните избори во 2025 година до конституирањето на советите на општините и Градот Скопје важат специфични забрани и мерки.
Нови инвестиции и вонредни исплати од буџетот не смее да почнат или се извршат, освен ако претходно се обезбедени средства во согласност со законот.
Забрането е почнување постапки за нови вработувања или престанок на работен однос во државните и во јавните институции, освен во итни случаи.
Политичките партии и кандидатите не смее да користат противправни или анонимни извори на финансирање.
Државниот имот и буџетските средства не смее да се користат за изборна кампања или финансирање политички активности.
Поткупот на избирачи и давањето или ветувањето подарок за гласање е строго забрането.
Во периодот од 20 дена пред изборната кампања до нејзиното завршување не смее да се одржуваат јавни настани поврзани со изградба или пуштање во употреба објекти со државни средства.
Министерството за финансии е задолжено да ги објавува сите буџетски исплати во изборниот период, освен редовни плати, пензии и комунални трошоци.
Јавните фондови, претпријатијата и другите субјекти со државен капитал треба да достават податоци за моторните возила до ДКСК во рок од десет дена од распишувањето на изборите.
Користењето службени простории, опрема и возила за изборни активности е забрането.
Забранети се притисокот и заплашувањето гласачи и нивните блиски лица.
ДКСК ќе ја следи законитоста на изборниот процес и ќе презема мерки при сомневање за прекршување на законите.
Во изборниот период Комисијата нема надлежност да дава мислења по барања поврзани со постапките на државните и на локалните органи.
ДКСК ги повикува медиумите, здруженијата на граѓани и јавноста да пријавуваат прекршувања на забраните предвидени во законот.