Македонија
ЕСМ: Се поставуваат цевките на топловодот од РЕК „Битола“

Почна поставувањето на цевките на топловодот од РЕК „Битола“ до Битола. Со засилен интензитет се подготвува трасата низ која ќе поминува топловодот, кој ќе обезбеди топлинска енергија за Битола, Новаци и за Могила – трите општини во близина на РЕК „Битола“.
Првите цевки се поставени на излезот од РЕК „Битола“ кон Новаци и тие треба да ја прифаќаат топлинската енергија што се создава како нуспроизвод во текот на производството на електрична енергија и да ја спроведуваат во системот за парно греење на трите општини.
Изведувачите на работите, фирмите „Рапид билд“ и „Гранит“ во оваа фаза имаат трасирано повеќе од два километра од топловодот обезбедувајќи работен простор за машините што ги транспортираат и поставуваат цевките.
Почетокот на проектот „Топлификација на Битола, Новаци и Могила“ беше означен во декември минатата година. Проектот е во вредност од 46 милиони евра, од кои 39 милиони се кредит од германската банка КфВ, а 7 милиони се средства на АД ЕСМ. Рокот за изведба на проектот е две години. Во согласност со планот, на почетокот на топлификацијата ќе се приклучат 35 општински и државни институции во Битола, кои ќе искористат една третина од капацитетот на системот. Со другите две третини ќе се задоволат потребите на големите станбени и деловни згради и на индивидуалните куќи во Битола, Новаци и во Могила.
Еколошките придобивки од топлификацијата се исклучително значајни. Со воведување ваков вид греење во голема мера ќе се исфрли од употреба загревањето на горива што загадуваат како во институциите така и во домовите. На тој начин создаваме долгорочно и одржливо решение за намалување на загадувањето во Битола и околината.
Топловодот дополнително ќе даде можност и за загревање земјоделски оранжерии, со што ќе се обезбеди поддршка на развојот на земјоделството во Пелагонискиот Регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Борче Стамов и д-р Ирфан Ахмети ќе ја примат државната награда „Мајка Тереза“

Борче Стамов од „Донирај компјутери“ и доц. д-р Ирфан Ахмети од Универзитетската клиника за ендокринологија, денеска во Собранието ќе ја примат државната награда „Мајка Тереза“.
„На 26 август 2025 година (вторник), во Кристалната сала на Собранието на Република Северна Македонија, во 11:00 часот, Одборот за доделување на државната награда „Мајка Тереза“ ќе ја додели државната награда „Мајка Тереза“ за 2025 година за особено значајни остварувања од интерес на државата во областа на хуманоста и човечката солидарност и за потикнување, унапредување на меѓусебното разбирање и развој на соработката, како меѓу народите, така и меѓу припадниците на различните заедници, култури и вери“, соопштија од Собранието.
Македонија
Без струја делови од Центар и Карпош

Без струја денеска ќе останат делови од Центар и Карпош, извести Регионалниот центар за управување со кризи на Град Скопје.
Поради технички зафати во електродистрибутивната мрежа на ден 26.08.2025 година (вторник), без електрична енергија ќе останат:
· од 08:00 до 15:00 часот, корисниците на бул. Партизански Одреди бр. 15, односно стамбените објекти околу објектот – Луна Бизнис Центар. (Општина Центар )
· од 11.00 до 15.00 часот, корисниците од дел од ул. Козле крак -22. (Општина Карпош)
Македонија
Патот Македонски Брод – Скопје сѐ уште е затворен за сообраќај

Поради пожар во националниот Парк Јасен, регионалниот пат Р1106 Македонски Брод – Скопје сѐ уште е затворен за секаков вид на возила, информира АМСМ.
Сообраќајот на останатите државни патишта се одвива непречено, по суви коловози.
Интензитетот на сообраќај на патните правци надвор од градските средини поради летните одмори е зголемен меѓутоа на граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.