Македонија
„Еуроникел“ ќе ја тужи Слаѓана Тасева за клевета

„Еуроникел“ ќе поднесе тужба против „Транспаренси интернешнл – Македонија“ и нејзината претседателка Слаѓана Тасева за клевета, за изјава дадена на 25 април. Од компанијата велат дека побарале изјавата да биде повлечена, но тоа не се случило.
„Спротивно, и ‘Транспаренси интернешнл – Македонија’ и Тасева продолжија одлучно и неосновано да го напаѓаат не само ‘Еуроникел’ и компанијата основач ГСОЛ туку и јавниот процес пропишан со закон кој строго и транспарентно беше спроведен од сите учесници во стечајната постапка“, велат од компанијата.
Од таму додаваат дека „Транспаренси интернешнл – Македонија“ и Тасева целосно ги игнорираат фактите кои јасно укажуваат дека „ГСОЛ/Еуроникел„ јавно, транспарентно и недвосмислено во целиот изминат период ги искажува своите деловни намери за преземање на „Фени индустри“, согласно со важечката легислатива на Република Македонија и правилата на стечајната постапка.
Единствена основа и извор за неиздржани наводи на Тасева и „Транспаренси интернешнл – Македонија“, велат од компанијата, се претходните сопственици кои го довеле „Фени“ во стечај.
„Оттука, поттикнати од целосното отсуство на интерес од ваша страна за причините кои го уништија ‘Фени’, како и за транспарентните обиди за негово заживување, а земајќи го предвид обемот на досегашна инвестиција на ‘ГСОЛ/Еуроникел’, која преставува една од најголемите еднократни инвестиции во изминатата декада во Република Македонија, како и клеветничката намера и резултатите на вашето однесување, ве информираме дека ќе бидете соочени со тужба за да ги докажете вашите наводи и да ги аргументирате вашите неиздржани заклучоци за инволвираноста на ‘ГСОЛ/Еуроникел’ во стечајната постапка на ‘Фени’, пред надлежните судови и органи, а со цел не само да го заштитиме нашиот углед и репутација и да ја обелодениме мотивацијата за вашите јавни појавувања и реакции во врска со стечајниот процес и иднината на ‘Фени’, туку и заради искоренување на ризиците по иднината на фабриката, нејзините вработени, засегнатите страни, нашата инвестиција и интересите на македонската економија“, стои во писмото од „Еуроникел“ до Тасева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Гори на планините Кожуф и Добра Вода, под контрола се четири пожари

Денеска, до 07:00 часот, на територијата на Македонија имало вкупно 34 пожари на отворен простор, од кои два се активни, четири се под контрола, а 28 се изгаснати, извести Центарот за управување со кризи.
Активни се пожарите во општина Гевгелија: Кожуф планина, кај село Петрово (букова шума) и во општина Македонски Брод: Планина Добра вода (ниска вегетација).
Како што информира ЦУК под конртола се четири пожари: Општина Гази Баба 1: с. Трубарево (електричен отпад); Општина Гази Баба 2: с. Виниче, м.в. Муратица (нискостеблеста шума); Општина Студеничани: с. Батинци (ниска вегетација и мешана шума); Општина Кочани: с. Бали (депонија).
Изгаснати се 28 пожари.
Македонија
Левица се заплетка во лагите за парите кои завршиле во џебовите на раководството, велат од ВМРО-ДПМНЕ

Левица на прес-конференција практично признаа дека податоците добиени од свиркачи за парите кои од сметката на партијата завршиле во џебови на тесното раководство се точни, велат од ВМРО-ДПМНЕ.
Според владејачката партија, парите од сметката на партијата Левица по разни основи завршиле кај тесното раководство на Левица. Мојсоска која самата изнесе информација дека била сметководител на Левица, додаваат од ВМРО-ДПМНЕ, требало да знае дека доколку ја говори вистината, актот е противзаконски.
„Правниците од Левица би требало да знаат дека во Законот за пратениците јасно е наведено:
– Член 4: „Функцијата пратеник во Собранието се врши професионално.“
– Член 5: „Пратеникот нема право да врши други јавни функции или професии, кои согласно со закон се неспојливи со функцијата пратеник.“
– Член 9: „Функцијата пратеник е неспојлива со вршењето на дејности со профитна цел.“
Законот е јасен Јована Мојсоска како пратеник, не смеела да остварува профит и да врши сметководствени услуги за Левица. Доколку е вистина улогата на сметководител, Мојсоска сериозно го прекршила Законот.
Левица бегајќи од вистината се заплетка во сопствените шеми за извлекување на партиски средства за лични потреби на раководството“.
Вистината, според ВМРО-ДПМНЕ, излезе на виделина.
„Левица под закрила на идеологија, чесност и приказни за неподмитливост испумпува пари на личните трансакциски сметки.
Пропагандата на Левица за чесност и неподмитливост се претвори во параван зад кои се испумпуваат пари.
Левица не е имуна на корупција и не се бори против неа, туку е дел од неа“.
Македонија
Нормализиран сообраќајот на регионалниот пат Велес-Градско

Од 08 часот и 20 минути, утрово, сообраќајот на регионалниот пат Велес-Градско е нормализиран, извести АМСМ.
Сообраќајот беше во прекин поради сообраќајна несреќа.