Македонија
Ефтимов: Препораките во извештајот од Комитетот за заштита од тортура мора да се сфатат сериозно, потребни се итни реформи на затворскиот систем

Државниот секретар Дајанчо Ефтимов присуствуваше на тркалезната маса што ја организира Советот на Европа во Скопје, на која имаше дискусија за препораките во извештајот од Комитетот за заштита од тортура.
Во обраќањето Ефтимов се осврна на проблемите со кои се соочуваат затворските установи и неопходноста од реформи со цел да се овозможи ресоцијализација и рехабилитација на осудените лица.
„Состојбата е сериозна и ние сме свесни дека е потребно навистина многу голем труд и посветеност. Мора да воспоставиме правда и правна сигурност, да покажеме дека имаме вредности, дека сме достојни за држава и дека сите ние заедно сме подготвени да градиме подобра иднина за нашата држава. Реформите во затворскиот систем се повеќе од потребни и Министерството за правда и јас како државен секретар со големо внимание ги следиме сите забелешки од Комитетот за заштита од тортура нотирани во извештаите бидејќи тие се потребен и се неопходен коректив во нашиот стремеж за достигнување на развиените системи на европските држави“, рече Ефтимов.
Државниот секретар Дајанчо Ефтимов порача дека нотираните забелешки во извештајот од Комитетот за заштита од тортура се сфаќаат многу сериозно и во иднина ќе се работи на нивно отстранување.
„Нашата работа допрва почнува и мора да бидеме максимално посветени затоа што иднината зависи од нас. Нема да се лажеме дека ќе биде лесно. Нема да биде лесно. Од нас се очекуваат зрелост и сериозна посветеност. Да се држиме до планот за развој и да се бориме искрено, чесно, одговорно –-тогаш успехот ќе биде неизбежен и промените ќе бидат видливи“, порача Ефтимов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ го оцени како ефикасно справувањето со пожарите во Македонија, во споредба со земјите од регионот

ВМРО-ДПМНЕ оценува дека институциите под водство на оваа Влада успешно реагираат на пожарите кои ги зафатија повеќе подрачја во Македонија, посочувајќи дека нашата држава покажува ефикасно справување.
Вчера во Македонија беа регистрирани 20 пожари на отворен простор, од кои десет се активни, пет се ставени под контрола, а пет се целосно изгаснати. За разлика од останатите држави во регионот, заклучува партијата, кај нас нема евакуирани и раселени лица, ниту човечки жртви, а причинетата штета е ограничена само на шумски површини.
„Ова не е резултат на среќа, туку на брза, организирана и професионална интервенција на сите надлежни служби“ се наведува во соопштението на партијата.
Во Турција, над 3.500 граѓани се евакуирани, а загинаа 17 лица, од кои дури 13 пожарникари. Огнот зафати и градски области, предизвикувајќи уништување на куќи и инфраструктура.
Во Албанија, каде што активни се 45 пожари, евакуирани се над 2.000 луѓе, изгореа над 20 куќи, а целосно се испразнети села. Огнените стихии во Грција зафатија станбени квартови и предизвикаа огромни штети, додека илјадници граѓани беа евакуирани. Апокалиптични сцени има и во Бугарија, каде што се регистрирани над 240 активни пожари и е причинета значителна материјална штета.
Македонија
Променливо облачно време повремено со пороен дожд и грмежи

Времето денес ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен западен, а долж Повардарието северен ветер, кој попладне наместа ќе засилува. Максималната температура ќе биде во интервал од 27 до 35 степени.
Во Скопје, променливо облачно, во претпладневните часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер.
Максималната температура ќе достигне до 33 степени.
Македонија
Комисијата утврди дискриминација врз професионалните војници – синдикатот бара итни законски измени

Комисијата за спречување и заштита од дискриминација утврди индиректна дискриминација врз професионалните војници од страна на Министерството за одбрана, информира Независниот синдикат на професионални војници СО Скопје.
Претставката до Комисијата ја поднел Александар Насковски, претседател на синдикатот и професионален војник, на 12 ноември 2024 година. Според него, Министерството со години не го трансформира работниот однос на професионалните војници од определено на неопределено време, спротивно на член 46 од Законот за работни односи.
„Професионалните војници се единствената категорија вработени во државата кои работат и по 25 години со договори на определено време, често продолжувани и по седум или осум пати, без можност да остварат право на пензија“, изјави Насковски.
По долготрајна институционална игнорација, синдикатот на 3 јуни 2025 година достави предлог-закон за изменување и дополнување на Законот за служба во Армијата до Собранието и сите пратенички групи. Со предложените измени се предвидува конечно уредување на статусот на професионалните војници и спроведување на препораките од Комисијата.
Синдикатот очекува Министерството за одбрана и пратениците да постапат по препораките и да ја исправат, како што велат, децениската неправда, со што ќе се постигне и буџетска заштеда за институцијата.