Македонија
Жена фантом ги расплака службениците откога првпат доби извод од Матичната книга на родените

Со солзи и неколкупати повторено благодарам, жена што досега била фантом, невидлива за државата, денес првпат зеде в раце извод од Матичната книга на родените. Нејзината реакција ги расплака и службениците во Управата за водење на матичните книгим кои кришум си ги бришеа солзите. Премиерот Димитар Ковачевски го врачи првиот извод на едно од лицата што досега не биле евидентирани и покрај тоа што се родиле и израснале во земјата.
„Денес, ставивме крај на еден горлив, тридецениски проблем што го имаат стотици граѓани што се родиле на територијата на нашата држава, но не беа впишани во матичната евиденција и немаа изводи на родени. Овие наши граѓани немаа документи за идентификација, не можеа да се лекуваат, ниту да се вработат, не можеа да склучат брак ниту, пак, да го регулираат статусот на своите деца, едноставно, ги немаше во системот на државата. Овие проблеми веќе се минато. Измените во законот го отворија патот за решавање на 526 човечки судбини, од кои досега на 409 лица им е извршен упис во Матичната книга на родените, а другите 117 лица ќе бидат впишани до крајот на годината“, рече премиерот Ковачевски и ги охрабри граѓанските здруженија што работат на оваа проблематика, доколку сѐ уште постојат неевидентирани лица, да ги поттикнат да ја почнат процедурaта за добивање извод од Матичната книга на родените.
Најзаслужни за евидентирање на досега невидливите лица за државата, покрај Министерството за правда и Управата за водење на матичните книги, премиерот смета дека се пратеничките Соња Мираковска, Љатифа Шиковска и Снежана Калеска-Ванчева оти ги подготвиле амандманите на Законот за матичната евиденција, со кои системски се реши проблемот на неевидентираните лица.
Министерот за правда, Кренар Лога, рече дека со овој чекор Македонија е на прво место во Европа и на второ во светот за решавање на проблемот со неевидентираните.
„Овие лица повеќе нема да бидат маргинализирани, дискриминирани, лишени од здравствена и социјална заштита, образование и пристап до правдата“, рече министерот Лога.
Законот за неевидентираните лица во Матичната книга на родените беше донесен во 2020 година, а измените на овој закон Собранието ги изгласа на 14 јуни годинава. Законот го гарантира правото на упис во Матичната книга на родените на секое дете родено на територијата на Република Северна Македонија веднаш, а најдоцна 45 дена од денот на раѓањето на детето, независно од државјанството и личниот статус на неговите родители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се излеа Маркова Река кај Батинци

Маркова Река се излеа денес по обилните врнежи од дожд.
Во селото Батинци, водата е надојдена, излевајќи се на неколку места околу речното корито.
Ангажирана е механизација за санирање на штетата, а градоначалник на Студеничани, Азем Садики, објави дека забележана е материјална штета во дворовите од куќите кои се наоѓаат во близина на реката.
Засега, според градоначалникот, нема потреба од евакуација.
Фото: ТВ21/скриншот
Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.