Заменик-министерот за надворешни работи, Андреј Жерновски, во Министерството за надворешни работи со поздравен говор ја отвори Регионалната школа за безбедност 2019, на тема „Хибридните закани и нивниот импакт на демократијата – предизвици за регионална соработка“.

Тој посочи дека нашите општества се соочуваат со сериозен предизвик од оние што сакаат да управуваат со стратешките приоритети на другите земји за свои интереси, од хибридни закани, сајбер-напади и најекспонираните во нашиот регион – лажните вести.

„Овие закани имаат голем потенцијал да ги нарушат политичката сцена, економијата и работата на јавните служби преку насочени кампањи за дезинформации, па до непријателски воени или субверзивни активности, со цел да се наметне нивното влијание. Напорите да се дестабилизираат државите со поткопување на јавната доверба во владините институции, со предизвик на основните вредности на општествата, веќе станаа познат заеднички именител“, истакна Жерновски.

Во согласност со основната задача на НАТО за колективна безбедност, додаде тој, Република Северна Македонија како идна 30-та земја членка на алијансата е подготвена да продолжи тесно да соработува со НАТО како силен и сигурен сојузник подготвен да го заштити националниот сајбер-простор за време на соработката и размената на информации на национално и меѓународно ниво обезбедувајќи истовремено отворен, бесплатен, доверлив и безбеден компјутерски простор.

Тој соопшти дека Северна Македонија има предложено првиот Регионален центар за обука и истражување од областа на сајбер-безбедноста да биде отворен во Скопје.

На настанот имаше интерактивни дебата помеѓу студенти и професори од Република Северна Македонија, Бугарија и од Грција, како и меѓу претставници од релевантни институции од земјата.

Школата е во организација на Факултетот за безбедност – Скопје со поддршка на Фондацијата „Конрад Аденауер“ и Центарот за европски студии „Вилфред Мартенс“ од Брисел, а во соработка со Центарот за истражување и креирање политики.