Македонија
Завеани и неисчистени патишта, сообраќајот во колапс

Снегот повторно ги затекна надлежните и предизвика револт и незадоволство кај возачите кои изутринава возеа по завеани и неисчистени патишта. Дел од патните правци од синоќа беа забранети за сообраќај за камиони и автобуси, но отежнато е движењето и на автомобили, особено од Тетово кон Попова Шапка, каде наврна еден метар снег.
Скопскиот аеродром синоќа беше затворен за сообраќај, откако воздухоплов на компанијата „Германија“ тип Ербас 321 со околу 200 патници, пред полетување за Цирих заглавил во нанос од снег. Авионот беше одглавен со помош на возила за push back од ТАВ, но и изутринава приодот до аеродромот е отежнат, а паркингот е нерасчистен од наносите со снег.
,,Добро утро Македонија Чат Пат! Вам гледам ви е утро, нас мрак пред очи ни паѓа од вас. Еве вака изгледа автопатот Тетово- Гостивар, утрово во 8 часот и патот накај познатиот скијачки македонски центар – Маврово. Не дај Боже некој да мора да тргне на пат, или уште повеќе, не дај Боже некој да посака на сред зима (кога ќе има снег во Маврово), да се рекреира (ма ајде тоа луксуз, дома нека седат). Гадно ќе нафрка. Срам сте за државата, години наназад”, коментираат револтираните граѓани на Фејсбук.
Исто така Општина Сопиште е отсечена од Скопје по обилните врнежи на снег, поради кој жителите не можат да се движат кон градот. Автобусите не одат кон Сопиште, Св. Петка, Добри Дол и Соње заради тоа што не е исчистен патот од Припор кон овие места.
Ветерот,пак, прави проблеми на екипите на ЈП „Македонија пат“ на патот Велес-Штип во овчеполскиот регион. Кај селата Сарамзалино и Павлешинци поради силниот ветер на коловозите се прават и наноси од снег, но екипите се постојано на терен и ги расчистуваат, за да се одвива сообраќајот во зимски услови.
Од 6.40 часот на патниот правец Велес-Катланово е укината забраната за движење на тешки моторни возила, информира АМСМ.Во 7.10 часот укината е и забраната за камиони на планински превој Ѓавато и Буково.
Забрани за тешки товарни возила синоќа имаше на следниве патни правци крак Маврово-Дебар, Дебар-Струга, Кичево-Охрид преку планинскиот премин Пресека, крак Стража-Кичево а за осатанатите возила задолжително употреба на зимска опрема,Македонски Брод-Прилеп преку планискиот премин Барбарас, Ресен-Битола преку планискиот премин Ѓавато, Прилеп-Градско преку планнискиот премин Плетвар, Велес-Катланово, Крива Паланка-Деве Баир и Тетово-Попова Шапка каде има забрана и за автобуси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Талески: Интерепелацијата за Тошковски не е политика, туку прашање дали ќе опстои државата

Господине Тошковски, вие сте 15 месеци веќе министер во МВР, и во овие месеци министерството го претворивте во комплетно нефункционално министерство, министерство со најголем број скандали, каде што преовладуваат селективноста, неказнивоста и целосно е нарушена безбедноста на граѓаните, му се обрати пратеникот од СДСМ, Миле Талески на министерот Тошковски.
Според него, гласот „за“ интерпелацијат на министерот Панче Тошковски не е прашање на политика, туку прашање дали ќе опстои државата, дали ќе има правда, безбедност и сигурност.
„Не е само истрагата за трагедијата во Кочани, која одзеде толку многу животи, иако непобитен факт е дека МВР потфрли на повеќе основи дента на пожарот како институција со клучна улога во обезбедувањето. Не бил направен оперативен план, не бил обезбеден просторот, не бил затворен објектот иако во него било регистрирано присуство на малолетници, не се реагирало за пиротехнички средства и многу други пропусти. Голем број осомничени, приведени и притворени лица од трагедијата во Кочани до денес е со цел да се разводнат сите случаи и да се одолговлекуваат до бескрај, да се создаде привид дека МВР и Владата се борат против криминалот и корупцијата. Но не е така. Ова е тежок популизам, препознатлив за ВМРО-ДПМНЕ. Но, ајде да ја почекаме истрагата за да видиме дали и кој од надлежните командири, началници и заменик-командири на полицијата ќе бидат опфатени и кој ќе понесе одговорност“, рече Талески.
Тој заклучи дека Тошковски требал да понесе морална одговорност за трагедијата.
Македонија
„Ги изгоревте децата со вашата алчност и негрижа“, родителите на жртвите од Кочани бараат оставки и одговорност

„Пожарот ги зеде телата, системот ги уби душите“, „Каде да фатиме врски за да ги вратиме другарите“, „Селективна одговорност е неодговорност“, „Не умираме од несреќи, умираме од корупција!“ „Ги изгоревте децата со вашата алчност и негрижа“, ова се дел од транспарентите што ги носеа учесниците на маршот на семејствата на жртвите во пожарот во дискотеката „Пулс“ во Кочани, што се одржува во Скопје.
Пред Јавното обвинителство тие побараа оставка од повеќе поранешни и актуелни функционери, обвинители, директори, градоначалници…
„Дали Зоран Заев е затворен, дали Крсто Муковски е затворен. Учесниците од 24 април 2017 може да ги прогласат за терористи со илјадници години затвор, а дали направиле некаква ревизија во дискотеката. Тие се соучесници затоа што го криеле криминалот. Вие сте узурпатори, не сте вие државата, ние сме државата. Ве плаќаме илјадници евра да правите криминали“, рече Владимир Апостолов, таткото на едно од загинатите деца.
Тој потоа читаше имиња и презимиња на актуелни и поранешни министри во МВР, во Министерството за економија, директори во Државниот пазарен инспекторат, директори во Дирекцијата за заштита и спасување, кои, според него, требало да бидат уапсени, а не се.
„Не знаат кој да апсат, имам список кои се највиновни – од Јавното обвинителство – господинот Коцевски, кој ќе го апси него, кој ќе го апси Љубомир Јовевски, дали се уапсени – не се уапсени. Панче Тошковски, кај се началниците што ги постави Тошковски. Дали се во затвор тие началници – не. Пред него Оливер Спасовски дали е приведен, не е, Наќе Чулев, Нухиу, Чавков, Јанкулоска – дали се уапсени – не. И министрите за економија, и директорите од Државниот пазарен инспекторат, и од Дирекцијата за заштита спасување. И градоначалниците на Кочани – не знаеле за тоа што се случува? Барем една проверка да направеа, еднаш да санкционираат“, рече Апостоловски.
„Повикуваме сите да излезете од Собранието, пуштени се некои ботови од родителите да го контаминираат овој наш марш. Не плашете се, не сме вооружени, дојдовме со срце затоа што ни убивте сè, ама не нè убивте и нас. Партијата не ве плаќа, ние ве плаќаме, напуштете ја оваа институција, еден по еден да си одите дома кај вашите деца – не плашете се, не сме терористи, само одете си. Тешко ќе се докажело кој е крив, ако е тешко, ако не ве бидува, марш, гитла“, рече Апостоловски пред зградата на Јавното обвинителство.
Тој праша што повеќе може да ни земат од ова. „И нашите души ни ги зедоа со душите на децата“, рече Апостоловски.
Маршот продолжува кон Собранието.
Македонија
Исени на средба со бугарскиот амбасадор

Заменик-министерот за внатрешни работи Астрит Исени оствари работна средба со амбасадорот на Република Бугарија во земјата, Жељаско Радуков.
На средбата беа потврдени заложбите за одржување и унапредување на односите меѓу двете соседни земји, а особено беше потврдена одличната соработка меѓу министерствата за внатрешни работи, и исто така заеднички беше констатирано дека работат врвни професионалци.
Со посебен фокус се разговараше и за можностите за дополнително унапредување на веќе воспоставената плодна соработка како од аспект на билатералните договори така и оперативната меѓусебна соработка на Министерствата за внатрешни работи на двете земји. Притоа и заменик-министерот за внатрешни работи Исени и амбасадорот Радуков изразија безрезервна отвореност за нејзино натамошно продлабочување.
Воедно, на состанокот стана збор и за меѓусебната соработка во рамките на меѓународните организации и регионалните иницијативи, кои се од заеднички интерес и придонесуваат за одржување и зајакнување на регионалната безбедност, стабилност и просперитет.