Македонија
Општина Аеродром: Заврши криминалот на СДСМ во Аеродром, по четири години, децата добија топол оброк преку транспарентна постапка

Првпат по четири години, во општина Аеродром учениците на првиот училиштен ден имаа топол оброк, обезбеден во транспаретна и законска постапка, без фаворизирање блиски фирми, како што беше случајот во времето на владеењето на СДСМ.
Фактот дека по неколку години, конечно, е срушен монополот на фирмата блиска до СДСМ, е причина за нервозата и незадоволството во редовите на партијата. Помина времето кога парите на граѓаните на Аеродром дадени за храна за децата во училиштата завршуваа во партиската каса на СДСМ, велат од таму.
Оваа година, според информациите од училиштата добиени по завршувањето на набавката, основните училишта на нашата територија избраа 4 снабдувачи, а во минатите четири години локалното партиско раководство на СДСМ со примена на разни методи се погрижи само една блиска фирма да го добива тендерот во сите училишта.
Повторувањето едно исто соопштение по неколкупати е само бесмислен и смешен начин на замајување на јавноста од погубните процеси и политики што оваа партија ги спроведува во Македонија и идеја што произлегува од тендерската матрица во која функционира СДСМ подолг временски период.
Жално е да зборуваме за тендери и мед во период кога во општината Аеродром се работи законски, кога децата првпат имаат квалитетен и навремено обезбеден оброк, кога се градат училишта и градинки и кога општината, конечно, доживува промени по четиригодишен застој, се додава во соопштението од Општина Аеродром.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наскоро зонско паркирање во Автокоманда

Во скопската населба Автокоманда наскоро ќе биде воведено зонско паркирање, најави кандидатот за градоначалник на Општина Гази Баба, Бобан Стефковски.
„ Со особено задоволство ги информирам жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање – решение кое жителите на Автокоманда го очекуваат повеќе од една деценија“, рече Стефковски.
Тој додава дека во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок.
Стефковски најави дека секое домаќинство ќе добие две бесплатни картички за паркирање.
Македонија
Уапсена сопругата на докторот кој беше застрелан во Куманово, била вмешана во обидот за неговото убиство

Полицијата ја уапси сопругата на докторот кој беше застрелан вчера во Куманово. Тој со повреди беше пренесен во болница, но се наоѓа во стабилна состојба. Според информациите на МВР, сопругата е осомничена дека е вмешана во обидот за неговото убиство.
„Вчера полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско“, велат од МВР.
Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес.
По целосно документирање на случајот, против сопругата ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава.
Од Министерството за здравство вчера соопштија дека во вооружениот напад во Куманово е повреден докторот Зекирија Шаини. Од таму известија дека повредите не се животно-загрозувачки и дека докторот е во стабилна состојба и се опоравува.
Од ДУИ, пак, информираа дека станува збор за нивен кандидат и носител на листата во Општина Липково.
Македонија
Евакуации во објектите околу плоштадот „ВМРО“ поради куфер оставен на плочникот, полицијата утврди дека е празен

Обезбедувањето на Јавното претпријатие за државни патишта пријавило во полиција дека две лица денес оставиле куфер на плочникот пред нивниот објект сместен на плоштадот „ВМРО“ веднаш до седиштето на владејачката партија ВМРО-ДПМНЕ. Полицијата веднаш излегла на терен, почнала евакуација на вработените од објектите околу плоштадот, а проверките покажале дека куферот е празен.
„Денеска (08.10.2025) во 12.55 часот лице од обезбедувањето на ЈП ‘Државни патишта’ пријавило дека на видеонадзор пред канцелариите на ЈП ‘Државни патишта’ на плоштадот ‘ВМРО’ во Скопје биле забележани две лица како го разгледуваат местото, а едно од лицата оставило куфер. Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен“, соопшти МВР.