Во кривичниот суд за денеска е закажано ново рочиште за предметот „Труст“, во кој првообвинет е бизнисменот Сеад Кочан. Денеска одбраната треба да ги даде своите завршни зборови.

На минатото рочиште, на предлог на специјалното јавно обвинителство, беа пуштени 10 необјавени бомби. Најголемиот дел од разговорите се меѓу ексдиректорот на ЕЛЕМ, Влатко Чинговски, и поранешниот генерален секретар на Владата, Кирил Божиновски.

Во еден од разговорите Чинговски и Божиновски се договараат како да ги задоволат и Сеад Кочан и Горан Иванов (Ѕинго), за добивање на тендерот на ЕЛЕМ.

Кирил Божиновски на Чинговски му вели: „На Ибицата да му направиме филм дека ќе го добие Брод-Гнеотино“, на што Божиновски му одговара дека и двајцата нема да бидат задоволни.

Кирил Божиновски му вели на Чинговски да не биде Горан Иванов тој кој што би можел да биде извисен: „Да не е Дебелиот тој што ќе го зае*еме“.

Чинговски на Божиновски му објаснува дека машините на Сеад Кочан, кои му се под лизинг, може да му ги уважат за негови.

Во друг разговор, Божиновски му вели на Чинговски дека за да го добие тендерот требало да има 27 камиони, а тој имал само 20.

„Да не зборуваме за цени, може нѐ прислушуваат“, Чинговски го предупредува Божиновски.

Во предметот „Труст“, Кочан и управителите на фирмите „Трансмет“, „Силекс“ и ВАТО се обвинети дека со фалш документи учествувале на тендер на „Електрани на Македонија“ во вредност од 17 милиони евра.