Македонија
Задоцнета и селективна правда во случајот со „Маѓар телеком“, велат од „Транспаренси интернешнл“
Од „Транспаренси интернешнл“ гледаат задоцнета и селективна правда во случајот со „Маѓар телеком“.
„Транспаренси интернешнл – Македонија“ од 2012 година за предметот што се води во правосудниот систем на Република Северна Македонија укажува на селективност во постапката, со намера да се покаже минимален придонес кон борбата против корупцијата и да се одбегне водење постапка против домашните функционери и поранешни политичари“, се појаснува во официјалната реакција од „Транспаренси интернешнл“.
Основниот Кривичен суд во Скопје пресуди вина за обвинетите Атила Сендреј, Ролф Плат и Золтан Кишјухас во случајот „Маѓар телеком“, на кои им е пресудено во отсуство бидејќи не се достапни за органите на прогонот. Во согласност со пресудата обвинетите се огласени за виновни за кривичното дело несовесно работење во службата од чл. 353 – в. ст. 4 в. в. со ст. 3 в. в. со ст. 1 од КЗ и се осудуваат на казни затвор од 8 години за секој од обвинетите.
Воедно, со пресудата обвинетите се задолжени солидарно да ја надоместат штетата од 67.407.760 денари на оштетената Република Северна Македонија, како и судските трошоци за постапката.
Од „Транспаренси интернешнл – Македонија“ велат дека го следат овој случај уште од 2012 година по објавата на резултатите од истрагата на американската куќа „Вајт и Кејс“ поведена по укажувањата на внатрешната ревизија во „Маѓар телеком“.
„Постоеле сомневања во законитоста на склучени и исплатени договори, од кои би произлегле низа коруптивни кривични дела, предвидени со Законот за странските коруптивни постапки – Foreign Corrupt Practices Act (FCPA) на САД, односно казниви според македонското и законодавствата на други држави.
Анализата на „Транспаренси интернешнл – Македонија“ покажа дека помеѓу 2000 и 2006 година мала група поранешни високи извршни лица на компанијата и на македонски филијали на компанијата одобриле трошење од речиси 24 милиони евра во повеќе од 20 сомнителни договори за консалтинг, лобирање и други договори (вклучувајќи одредени договори помеѓу компанијата и нејзини филијали, од една страна, и филијали на кипарска консалтинг-компанија, од друга).
Јавното обвинителство (ЈО) не повело постапка против организаторите на коруптивната шема и наредбодавците, туку само против извршителите. Органите во САД ги товарат токму овие лица занемарувајќи ги оние што (ако не биле тие, ќе биле некои други), само ја спровеле наредбата и формално ставиле потпис на документите.
Бројот на договори и трансакции што ги третираат органите од САД е поголем од бројот на договорите и трансакциите што ги третираат органите на прогонот во Р. Македонија.
Разлики, како што велат, постојат и во вкупната сума пари. ЈО на Р. Македонија нема поведено обвинение против правното лице, иако кривична одговорност за правните лица во нашето кривично законодавство има од 2004 година. Одговорноста за делата на неговата филијала во Република Македонија, односно „Македонски телеком“ АД Скопје, „Маѓар телеком“ непобитно ја признава во спогодбата со Министерството за правда.
„Прашањето за опфатеност на дејствата според македонското право истакнува околности поврзани со реформата во кривичното законодавство, која мора да се води со уште поголемо внимание отколку до сега:
Дејствата еднаш опишани и санкционирани според еден член од Кривичниот законик во негово подоцнежно изменување и дополнување доживеале своја разработка и биле преточени во друг член од Законикот, при што оригиналниот текст веќе не постои и според начелата на кривичното право понатаму не може успешно да се искористи во постапка против дело сторено претходно. Само за пример, делото предвидено со член 283 – создавање монополска положба и предизвикување растројство на пазарот од 14.9.2009 година се преточи во спречување, ограничување или нарушување на конкуренцијата („Службен весник на РМ“ бр. 114).
Интересот на „Транспаренси интернешнл – Македонија“ произлезе од причини што некои од овие договори се тесно поврзани со филијали на „Маѓар телеком“ во Македонија, како „Македонски телеком“ АД Скопје и „Камени Мост комуникации“ АД Скопје, а „Вајт и Кејс“ истакнуваат основан сомнеж со наводи за корумпирање функционери и челници на политички партии во Македонија од страна на раководни лица во „Македонски телекомуникации“ АД, сѐ заради стекнување погодности на пазарот на телекомуникациските услуги во 2005 и 2006 година.
„’Транспаренси интернешнл – Македонија’ има изработено информација уште во 2012 година заснована врз релевантни и јавни документи следејќи го отворањето на епилогот на истрагата за работењето на ‘Маѓар телеком’ во периодот од 2000 до 2007 година, стои во соопштението од таму“, се истакнува во реакцијата од „Транспаренси интернешнл“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Апасиев: Доста ни е од веќе видени пратеници и од гласање за помалото зло
„Во програмата имаме 13 поглавја кои го опфаќаат секој аспект од општественото живеење. Главната порака до граѓаните е да го заокружат бројот 5 на гласачкото ливче и да дозволат млади неподмитливи луѓе да ги застапуваат, бидејќи доста ни е од веќе видени пратеници и од веќе видено гласање за помалото зло. На тој начин ќе спречиме многу штетни политики“, рече лидерот на Левица, Димитар Апасиев од Прилеп, презентирајќи ја предизборната програма на неговата партија во пресрет на парламентарните избори.
-По првиот круг не паѓаме со духот, туку продолжуваме со првичната замисла, додаде Апасиев.
Партијата Левица очекува поддршка од прилепчани каде, како што велат од оваа партија, имаат реална основа за тоа.
– Земјоделството мора да биде планско. Планираме да се пополнуваат стоковите државни резерви строго со домашно производство, со однапред склучени договори за земјоделците да имаат некаква сигурност во производството. Планираме фиксни откупни цени, државни откупни центри за да не можат прекупците да ја местат цената како што ним им одговара, ладилници за складирање на произведената храна од кои ќе се снабдуваат Армијата, градинките, училиштата, болниците. Мерките, генерално ни се насочени кон државна интервенција во земјоделството, а не да биде оставено стихијно. Во стопанството планираме рестартирање или отворање државни профитабилни фирми во секоја стратешка стопанска гранка, рече носителот на кандидатската листа на пратеници во четвртата изборна единица, Сашко Јанчев при претставувањето во Прилеп.
Македонија
Спасовски од Шуто Оризари: Да не се попречува изборниот процес
Носителот на листа на кандидати за пратеници од СДСМ и коалицијата за европска иднина од ИЕ2, Оливер Спасовски, имаше свое обраќање во Шуто Оризари.
„Денеска продолжуваме со изборната кампања во Шуто Оризари на разговор со граѓаните за претседателските и парламентарните избори на 8 мај. Сакам да се сретнеме со сите граѓани, да влеземе во секоја куќа во општината Шуто Оризари, да поразговараме со секого за нашата перспектива на Македонија”, рече Спасовски. Притоа, тој ја истакна важноста да се гласа на 8 мај.
„Многу е важно граѓаните да останат смирени и овој втор круг од изборите да помине во демократска атмосфера. Упатувам порака до сите оние се дрзнуваат на било кој најчин да го попречуваат изборниот процес, да се закануваат, да навредуваат, да останат на ниво на демократски вредности. Да ги почитуваат граѓаните и на мирен, фер и демократски начин да заврши изборниот процес. Воедно ги повикувам сите граѓани масовно да излезат на изборите на 8 мај, да гласаат за нашиот претседател Стево Пендаровски заокружувајки го бројот 1, и да гласаат за листата на пратеници исто така под број 1 за коалицијата за европска иднина”, порача Спасовски.
Македонија
Меџити: Сите бегаат од ДУИ како од корона
Изет Меџити, лидерот на Демократското движење, чија партија е дел од коалицијата ВЛЕН рече дека „на ВМРО-ДПМНЕ ѝ треба албански партнер како ВЛЕН, за да биде целосна сликата“.
-Од ДУИ денес сите бегаат како од корона. Дури и ВМРО-ДПМНЕ и Максим Димитриевски бегаат од ДУИ и не сакаат влада со нив, рече Меџити на средби со граѓани во општина Чаир и во Сарај.
Ветува решавање на клучните проблеми на граѓаните во нивните општини.
За Меџити, само на тој начин ќе се претендира за европски вредности и европски фронтови. Немањето канализација и елементарни услови за живот е недозволиво, истакнува тој.